মালেমগী ওইনা কোবিদ লাইচৎ থেংনরিঙৈ চৈরক অসিদা, কেমিকেলস অমসুং ফর্তিলাইজরস মিনিস্ত্রিগী কেমিকেলস অমসুং পেত্রোকেমিকেলস দিপার্তমেন্তগী মখাদা লৈবা ওতোনোমস ইন্সতিতুউৎ অমা ওইরিবা ইন্সতিতুৎ ওফ পেস্তিসাইদ ফোরমুলেসন তেক্নোলোজি(আই পি এফ তি)না মাইপাক্না অনৌবা তেক্নোলোজি অনি হায়বদি “মমাইদা শীজিন্ননবা দিসইনফেকতেন্ত স্প্রে” অমসুং “মনা-মশিং অমসুং উহৈ-ৱাহৈশিংগী দিসইনফেকতেন্ত স্প্রে” পুথোক্লে।

ইন্সতিতুৎ অসিগী চেরোল অমনা হায়খি তোঙান-তোঙানবা মমাইশিং হায়বদি থোংগী খুৎপায়ফমশিং, চৌক্রিগী পায়ফমশিং, কম্পুতর কিবোর্দ অমসুং মাউস তেপশিং অসি হকথেংন্না নৎত্রগা নাকোইন্না পায়রুবা মীওইশিংদা মহিক শন্দোরকপা য়াই। মসি য়েংলগা ইন্সিতুতুৎ অসিনা বেক্তরিয়া আমসুং ভাইরসনা থোকহনবা তোঙান তোঙানবা লায়নাশিংদগী ঙাকথোক্নবা পাম্বীদগী শুংবা মহিক হাৎপা ঙম্বা মচলশিং য়াওবা য়ুদগী শুংবা “দিসইনফেকতেন্ত স্প্রে” পুথোক্লে। মচল অসি মমাইশিংদা তৈরবা মতুংদা অথুবা মতমদা মনিল ওনখিদুনা কংগনি অমসুং মচু, মনম অমসুং লেমহৌবা অমতা লৈহৌরোই।

মনা-মশিং অমসুং উহৈ-ৱাহৈশিংদা পক্তুনা লৈহৌবা তিলহাৎ হিদাকশিং লৌথোক্নবা ইন্সতিতুৎ ওফ পেস্তিসাইদ ফোরমুলেসন তেক্নোলোজিনা “দিসইনফেকতেন্ত স্প্রে” পুথোক্লে। উহৈ-ৱাহৈশিং অমসুং মনা-মশিং অসি নোংমগী তঙাইফদনা চঙদ্রবা য়াদ্রবা মচি ওইবা চীঞ্জাকশিংগী শরুক অমনি। করিগুম্বা মতমদা নিয়ম লান্না তিলহাৎ হিদাকশিং শীজিন্নবদগী মনা-মশিং অমসুং উহৈ-ৱাহৈশিংদা তিলহাৎ হিদাকশিং মখা তানা য়াওদুনা লৈখি অমসুং মসিনা চাবা মতমদা হকচাং শোকহল্লি।

মনা-মশিং অমসুং উহৈ-ৱাহৈশিং মীওইবনা চাবদা চাদা ১০০ শোক্তনবা ইন্সতিতুৎ ওফ পেস্তিসাইদ ফোরমুলেসন তেক্নোলোজিনা ঈশিংদা তুহল্লগা শেম্বা মচল অমা পুথোক্লে। হিদাক মচল অসিদা মনা-মশিং নৎত্রগা উহৈ-ৱাহৈশিং মিনিত ১৫-২০ ফাওবা তিংদুনা থম্লবা মতুংদা ঈশিং অচম্বদা ফজনা চামথোক্কনি। মসিগী অচম্বা থবক অসিনা মনা-মশিং অমসুং উহৈ-ৱাহৈশিং মপুংফানা তিলহাৎ হিদাক য়াওহন্দ্রে।

হরিয়ানাগী গুরুগ্রামদা লৈবা ইন্সতিতুৎ ওফ পেস্তিসাইদ ফোরমুলেসন তেক্নোলোজি অসি ১৯৯১গী মে থাদা কেমিকেলস অমসুং ফর্তিলাইজরস মিনিস্ত্রিগী কেমিকেলস অমসুং পেত্রোকেমিকেলস দিপার্তমেন্তগী মখাদা ওতোনোমস ইন্সতিতুউৎ অমা ওইনা লিংখৎখিবনি। ইন্সিতুতুৎ অসিনা হকচাং শোক্তবা অমসুং অকোয়বগী ফিবমদা অকায়বা পীদবা তিলহাৎ হিদাক মখল কয়া পুথোক্লি। ইন্সতিতুৎ ওফ পেস্তিসাইদ ফোরমুলেসন তেক্নোলোজিগী দিবিজন মরি লৈ হায়বদি; ফোরমুলেসন তেক্নোলোজি দিবিজন, বাইওসাইন্স দিবিজন, এনালাইতিকেল দিবিজন অমসুং প্রোসেস দিবলপমেন্ত দিবিজন্নি।

*****