ভারতকী উপ রাস্ত্রপতি, শ্রী এম. ভেঙ্কয়া নাইদুনা ঙসি মীপুম খুদিংমক্কী য়াইফনবগীদমক মমল লৈবা মহৈ মশিং পীবা মথৌ তাই হায়না ফোঙদোকখ্রে‍। একাদমিক্সকী ৱাংমদা চত্তুনা মমল লৈবা মহৈ মশিং তাকপীবা অমদি তম্বনা ঐখোয়গী এজুকেসন সিস্তেমগী থাদোক্নবা য়াদ্রবা শরুক অমা ওইহন্নবা ৱাফম থমখি‍।

উপ রাস্ত্রপতিনা ৱাফমসি শ্রী রাম চন্দ্র মিসননা য়ুনাইতেদ নেসন্স ইন্ফোর্মেসন সেন্তর ফোর ইন্দিয়া অমসুং ভুতানগা খুৎশম্নরগা পাঙথোকপা ‘হর্তফুলনেস ওল ইন্দিয়া এসে রাইতিং ইভেন্ত’ ওনলাইন্দা হৌদোকপগী থৌরমদা ৱা ঙাঙলদুনা ফোঙদোকখিবনি‍। থৌরম অসি চহী খুদিংগী জুলাই অমসুং নভেম্বরগী মরক্তা য়ুনাইতেদ নেসন্স ইন্তরনেসনেল দে ওফ দি য়ুথ নীংশিংদুনা পাঙথোকপনি‍।

শ্রী নাইদুনা থৌরাং অদুবু থাগৎলদুনা অসিগুম্বা থৌরমসিনা নহা ওইরিবশিংগী ৱাখল থৌদুনা মখোয়গী পুন্সিদা অফবা ৱাখল খলহল্লি‍ হায়না হায়খি‍। থৌরম অসি লোন কয়া য়াওবা ইংলিসকী মথক্তা অতোপ্পা ভারতকী অচৌবা লোন ১০দা এন্ত্রী কৌবসিদা নুংঙাইবা ফোঙদোক্লদুনা তুংদা ভারতকী লোন পুম্নমক শুনা য়াওহল্লক্কনি হায়না থাজবা ফোঙদোকখি‍।

নেসনেল এজুকেসন পোলিসী – ২০২০বু মমল লৈবা মহৈ মশিংদা মিৎয়েঙ থম্বগীদমক্তা থাগৎলদুনা, ভেল্যুদা মীৎয়েঙ থমবসিনা ঙল্লিঙৈ মতমদগী ঐখোয়গী তাকপী তম্বিবগী থাদোক্নবা য়াদ্রবা শরুক অমা ওইদুনা লাক্লি  হায়না শ্রী নাইদুনা হায়খি‍।

হৌজিক্কী খোঙজেল য়াঙলবা আই.তি.না থৌবা মেতরিএল ৱর্ল্দগী ইন্ফোর্মেসন, তেক্নোলোজী, খুৎশু খুৎলায় অমসুং পাউ কয়ানা চমম্নবা করিগুম্বা মতমদা লান্না লমজিংবা য়াওরক্লিবা মতমসিদা ভেল্যুদা য়ুম্ফম ওইবা মহৈ মশিংগী মরুওইবা অসি হেনগৎলক্লি হায়না মহাক্না ফোঙদোকখি‍।

মালেমগী ওইবা ভেল্যুদা য়ুম্ফম শেমবগী মথৌ তাবা ফোঙদোক্লদুনা শ্রী নাইদুনা ঐখোয়গী মরুদা হনঞ্জিন্দুনা ঐখোয়গী চৎনরমবা তাকপী তম্বিবগী মওং মতৌগী কান্নবশিং লৌশিন্নবা ৱাফম থমখি‍।

মহাক্না লৈঙাক, মমা মপা, ওজা, ইন্সতিত্যুসন অমসুং ভোলুন্তরী ওর্গনাইজেসনশিংদা মহৈরোয়শিংদা মরুওইবা পুন্সিগী পরাশিং তম্বিবদা মকোক চিংনবা ৱাফম থমখি‍। করিগুম্বা ঐখোয়না মায়কৈ অসিদা চঙশিল্লবদি মালেম্না মতৌ তম্নরক্কদবা মমল লৈবা মহৈ মশিংগী ইহৌ অমা পুরক্পদা ভারতনা মকোক চিংগনি হায়না মহাক্না ফোঙদোকখি‍।

মহৈ মশিংবু ঐখোয়গী লম লমগী খেন্নবশিংগী কান্নবা চপ চানা লৌনবা ৱাফম থম্লদুনা উপ রাস্ত্রপতিনা ঐকোয়গী য়ুনিভর্সিতীশিংদা ভারতপু লৌশিং অমসুং অনৌবা ৱাখল্লোনগী মকোন ওইহন্নবা থাক ৱাংখৎহনবা পাম্মী হায়না ফোঙদোকখি‍।

ঙসিগী নহাশিংবু হয়েংগী লুচিংবনি হায়রদুনা উপ রাস্ত্রপতিনা লৈবাক্কী মরাইবক নহাশিংনা শেমগদবনি হায়বা ৱাফম ফোঙদোকখি‍‍।

থিজিন হুমজিনবা অমদি একাদমিয়া অমসুং ইন্দস্ত্রী পুন্না চৎমিন্নবদা হেন্না হোৎননবা ৱাফম থম্লদুনা, পব্লিক অমসুং প্রাইভেত সেক্তর অনিমক্না থিজিন হুমজিনবদা অহেনবা শেনফম থাদবা মথৌ তাই হায়না শ্রী নাইদুনা হায়খি‍।

কোবিদ-১৯ লাইচৎনা ওইহল্লক্লিবা শীংনবা ফীভমশিংদা পুক্নীং চিংশিল্লদুনা, লৈবাকশিংনা অকনবা ফিরেপ উত্তুনা ফীভমসিদগী পুন্না অমদি মপাঙ্গল কন্না থোরক্নবা পুন্না হোৎনমিন্নরি হায়বা ৱাফমসু মহাক্না থমখি‍।

মীওই অমগী মচৎপু চাংয়েং তৌরকপদা মতমনা য়েক্নবা ওইরকই হায়রদুনা, ঐখোয়না পাঙ্গল কন্না পুন্না হোৎনমিন্নবদা লান্থোকপা ঙম্লোইদবা খুদোংথিবা ফীভম অমত্তা লৈতে হায়না মহাক্না হায়খি‍।

লাইচৎ অসিনা মীয়ামগী পুক্নীং ৱাখলদা অৱাবা খরা পোকহল্লে অমদি ফীভমসিদগী নান্থোক্নবা খ্বাইদগী ফবা লম্বীদি ইমুং মনুং পুন্না লৈমিন্নবা অমদি হিরি কোনমিন্নবনি হায়না শ্রী নাইদুনা হায়খি‍।

‘য়েন্নবা অমদি চেকশিনমিন্নববু’ ভারতকী ৱাংউলোনগী নুংগী ওইবা মচৎনি হায়রদুনা, নহাশিংগী মরক্তা মিনুংশি লৈবা, অৱাবা খঙবা, অহল লমনশিংবু ইকায়খুম্নবা অমদি লাইনিংগী খাঙবা কনবা মতৌ উৎননবা ৱাফম উপ রাস্ত্রপতিনা থমখি‍।

হৌজিক লৈরিবা লাইচৎ অসিগুম্বা মতমদা লায়রবা অমদি ইন্থোকপিরবা মীওইশিংদা মতেং পাংননবগীদমকসু মহাক্না আপিল তৌখি‍।

“অদোম্না অতোপ্পগীদমক হিংলবদি, অদোমসু কুইনা হিংগনি”, হায়না মহাক্না মখা তাখি‍।

ফীভমসিদা মীয়াম্না পেন্থোক্তুনা লৈথোক্তনবা অমদি মথৌ তাবা চেকশিন থৌরাং মখা তানা লৌখৎনবা মহাক্না মীয়ামদা পাউতাক পীখি অমদি মালেম পুম্বদা চত্থরিবা ভেক্সিনগী চাংয়েং অসিনা নোংম নৎত্রগা নোংমদি মহৈ য়াল্লকখিগনি অমদি ঐখোয়না মহি অসিবু মায়থিবা পীবা ঙম্লকখিগনি হায়না থাজবসু ফোঙদোকখি‍।

মখাদা পীরিবা অসি ঙাঙখিবা ৱাফমগী মপুং ফাবা ৱারোলনি –

“শ্রী রাম চন্দ্র মিসননা য়ুনাইতেদ নেসন্স ইন্ফোর্মেসন সেন্তর ফোর ইন্দিয়া অমসুং ভুতানগা খুৎশম্নরগা পাঙথোকপা ‘হর্তফুলনেস ওল ইন্দিয়া এসে রাইতিং ইভেন্ত’ অসি হৌদোকপদা ঐ য়াম্না নুংঙাই‍।

থৌরম অসি চহী খুদিংগী জুলাই অমসুং নভেম্বরগী মরক্তা য়ুনাইতেদ নেসন্স ইন্তরনেসনেল দে ওফ দি য়ুথ নীংশিংদুনা পাঙথোকপনি অমদি চহী খুদিংগী শরুক য়াবা মীওই মিলিয়ন অমা হেনবনা এন্ত্রীশিং থাজিল্লকই খঙবদা ঐঙোন্দা নুংঙাইবা ফাওই‍।

থৌরম অসি লৈবাক্কী থাক্তা ইংলিস অমসুং হিন্দীদা অদুগা স্তেতকী থাক্তা অতোপ্পা ভারতকী লোন মাপন – বেঙ্গলি, গুজরাতি, কনারা, মলয়ালম, মরাথি, ওরিয়া, পঞ্জাবি, তামিল অমসুং তেলুগুদা এন্ত্রী থাজিল্লকপা মল্তি-লিঙ্গুএল ওইবা থৌরম্নি হায়বা খঙবদা হেন্না নুংঙাইহল্লে‍।

লৈবাক্কী মরাইবক নহাশিংনা লেপ্পী‍। ঙসিগী নহাশিংনা হয়েংগী লুচিংবশিং ওইগদৌরিবনি‍। ভারত অসি চহী চা কয়াগী ৱাখল, লৌশিং, কাঙলোন অমসুং মঙাল থোকপা ৱাখল্লোননা ঐখোয়দা কমদৌনা পুন্সি থাক ৱাংনা হিংগদগে হায়না তাকপীবগী লাইবক ফরবা ফীভম মতম পুম্নমক্তা লৈ‍। ঐখোয়গী ঙল্লিঙৈ মতমগী তাকপী তম্বিরমবশিংনা মীওই অমগী খুন্নাই, পুক্নীং, ৱাখল, হকচাঙ, লৌশিং অমসুং নুংগী ওইবা পুন্সিগী মশক্কী ফীভম ফগৎহন্নবা মমল লৈবা মহৈ মশিংদা মীৎয়েঙ থম্লি‍। ২০২০দা মায়খুম হায়দোকখিবা নেসনেল এজুকেসন পোলিসীনা মমল লৈবা মহৈ মশিংদা অহেনবা মীৎয়েঙ থম্লি‍।

মসিনা মীওই অমবু অচুম্বা হৈনবী, মমল, হৌন-লোনচৎ, মতম চানা থবক তৌবা অমদি অতৈ কয়াগী লমদা  ফীভম ফগৎহনগদবা এজুকেসন সিস্তেমগী মরুওইবসু পল্লি‍। মসিনা মহৈরোয়শিংবু হীরম কয়াদা চঙশিন্দুনা মপুং ফানা ফীভম ফগৎহন্নবা মীৎয়েঙ থম্লি‍।

নুংশিরবা ইচিন ইনাউশিং,

মালেম পুম্বনা হৌজিক অওনবা কয়া লাক্লিবা কোবিদকী চৈথেঙ থেংননবা লৈরিবা শীংনবশিং লান্থেংনরি‍। লৈবাক কয়ানা খোঙফম চেৎনা লেপ্তুনা মপাঙ্গল কনবা মতৌ উত্তুনা ফীভমসিদগী মপাঙ্গল কন্না থোরক্নবা পুন্না হোৎনমিন্নরি‍।

মীওই অমগী লীচৎপু চাংয়েং তৌরকপদা মতম্না য়েক্নবা ওইরি‍। ঐখোয়না অচেৎপা ফিরেপকা লোয়ননা পুন্না হোৎনমিন্নবদা লান্থোকপা ঙম্লোইদবা খুদোংচাদবা ৱাফম অমত্তা লৈতে হায়বা ফীভম অসিনা তলক্লি‍।

নীংশিংবা থোক্ত্রবা মতমদগী হৌনা, ঐখোয়না অমত্তা ওইবা খাঙবা কনবা, মচীন মনাও ওইবা অমদি ইংনা চিক্না পুন্না হিংমিন্নবা হায়বা ৱাখল্লোনদা থাজদুনা লাক্লি‍। য়েন্নবা অমদি চেকশিনমিন্নবা হায়বসিনা ভারতকী ৱাংউলোনগী নুংগী মশক্নি অমদি হৌজিক্কী লাইচৎ অসিগুম্বা মতমসিদা লায়রবা অমদি ইন্থোকপিরবা মীওইশিংদা মতেং পাংনগদবনি‍। হৌজিক্কী মতমসিদা ঐখোয়না নহাশিংগী মরক্তা মিনুংশি, অৱাবা খঙবা, অহল লমনশিংবু ইকাই খুম্নবা অমসুং লাইনিংগী মতাঙদা খাঙবা কনবগী ৱাখল্লোন লৈহনবা মথৌ তাই‍।

হৌজিক অসি ঐখোয়গী মরুদা হঞ্জিন্দুনা অমত্তা ওইবা ৱাখল্লোনদা য়ুম্ফম শেমগৎনবা ঐখোয়গী চৎনরমবা তাকপী তম্বিবগী মওং মতৌগী কান্নবশিং লৌশিনবা মতম্নি‍। ঐখোয়গী এজুকেসন সিস্তেম্না হৌজিক একাদমিক্সকী ৱাংমদা চত্তুনা মমল লৈবা তাকপীবগী অমদি তম্বগী মওং মতৌবু থাদোক্নবা য়াদ্রবা শরুক অমনি হায়না শকখঙবা মতম ওইরে‍। মমল লৈবা মহৈ মশিং তমবগী মথৌ তাবসি ঙসিগী খোঙজেল য়াঙলবা আই.তি.না থৌবা মালেমসিদা হেন্না ময়েক শেংলক্লি‍।

নুংশিরবা ইচিন ইনাওশিং,

ভারত অসি মশীং য়াম্লবা নহাশিংনা তোপ তোপ্না কুবিরি‍ অমদি অসিগুম্বা ফীভম অসিগী কান্নবা মপুং ফানা লৌননবা মহৈ মশিংনা মরুওইবা ৱাফম ওইরি‍। ভারতপু ৱাখল লৌশিং অমসুং অনৌবা ৱাখল্লোনগী মকোন ওইহন্নবগীদমক ঐখোয়গী য়ুনিভর্সিতীশিং অমসুং হাইয়র এজুকেসন ইন্সতিত্যুসনশিং মখোয়গী থাক ৱাংখৎহনবা মথৌ তাই‍। একাদমিয়া অমসুং ইন্দস্ত্রীগী মরক্তা পুন্না চৎমিন্নবা অমদি থিজিন হুমজিনবগী লমদা অহেনবা ইনোৎ পীবা মথৌ তাই‍। অনৌবা ৱাখল্লোনশিং মখোঙ শোম্বিনবা অমদি মখোয়গীদমক মতিক চাবা ইকোসিস্তেম অমা য়োকখৎনবা পব্লিক অমসুং প্রাইভেত সেক্তর ইন্সতিত্যুসনশিংনা থিজিন হুমজিনবদা অহেনবা শেনফম থাদবা মথৌ তাই‍।

নুংশিরবা ইচিন ইনাউশিং,

ইন্ফোর্মেসনগী মতমসিদা নহাশিংদা য়াম্লবা ইন্ফোর্মেসন, তেক্নোলোজী, খুৎশু খুৎলায় অমসুং ঈ–পাউ ফংলি – মসিদা পাথোক্তুনা করিগুম্বদা চমম্নবা অমদি লান্না লমজিংবসু য়াওরকই‍। মরম অদুনা ঐখোয়গী নহাশিংদা য়াম্না নৌরিঙৈ মতমদগী হৌনা অচুম্বা ভেল্যুশিং তম্বিবগী তঙাই ফদবা লৈরে‍।

অতৈ ময়ামগী মরক্তা লৈঙাক, মমা-মপা, ওজা, ইন্সতিত্যুসন অমসুং ভোলুন্তরী ওর্গনাইজেসনশিংনা মহৈরোয়শিংদা মরুওইবা পুন্সিগী পরা তম্বিবদা নত্তনা মখোয়না অচুম্বা ৱাখল্লোনশিং খলহন্নবা অমদি থবক তৌহন্নবা অচৌবা থৌদাং লৈ‍। করিগুম্বা ঐখোয়না মায়কৈ অসিদা চঙশিল্লবদি, মালেম্না তুং ইল্লক্কদবা মমল লৈবা মহৈ মশিংগী ইহৌ অমা শাগৎপদা ভারতনা মাঙজিল থাবা ঙমগনি হায়না ঐনা থাজৈ‍।

অরোয়বা ওইনা লোইশিন্দ্রিঙৈ মমাঙদা, লাইচৎ অসিনা ওইহল্লক্লিবা শীংনবশিং অসি লান্থোক্নবা অপুনবা থৌদাংগী মথৌ তাবদু ঐনা হায়বা পাম্মী‍। মীয়াম্না খ্বাইদগী ইহান হান্না তৌগদবদি ফীভমসিদা পেন্থোক্তুনা লৈথোক্লোইদবনি‍। মীপুম খুদিংমক্না তোয়না খুৎ-শা হামদোকপা, সোসিএল দিস্তেন্সিং ঙাকপা, অমসুং ওথোরিতীনা পীরিবা চৎন-পথাপ পুম্নমক ঙাক্তুনা লৈবা মথৌ তাই‍। লাইচৎ অসিনা লৈবাক পুম্নমক্কী শেন্মিৎলোন শাথিনা শোকহল্লে অমদি নুংতিগী পুন্সিদা শাথিনা কায়হল্লে হায়বসিদা করিসু চিংননিংঙাই লৈতে‍। মালেমসিদা ভেক্সিনগী চাংয়েং পাঙথোক্নরিবা অসি নোংমা নৎত্রগা নোংমদি মহৈ য়াল্লকখিগনি অমদি ঐখোয়না মহিক অসিবু মায়থিবা পীবা ঙমগনি হায়না ঐনা থাজৈ‍।

চহী ২৮ চপ্না পাঙথোক্তুনা লাক্লিবা ওল ইন্দিয়া এসে রাইতিং ইভেন্ত অসি মমল লৈবা মহৈ মশিং য়োকখৎনবা হর্তফুলনেসকী কাঙবুগী শিংথানিংঙাই ওইবা থবক্নি‍। মমি তাবা, মুন্না য়েংশিনবা অমদি খন্ন-নৈনবনা লমচৎ শেমগৎৎলি অমদি চহী খুদিংগী খনগৎলিবা হীরম অসিনা সিস্তেম অসিগী মমল হেন্না মপাঙ্গল লৈহনগনি হায়না ঐনা থাজৈ‍।

‘ওল ইন্দিয়া এসে ইভেন্ত ২০২০’ অসি হৌদোকপদা ঐঙোন্দা য়াম্না নুংঙাইহল্লি অমদি ঐনা শরুক য়ারিবা খুদিংমকপু খ্বাইদগী য়াইফবা ওইরসনু হায়না য়াইফরোল পীজরি‍।

জয় হিন্দ!”

***