মালেমগী তোঙান-তোঙানবা তুর্নামেন্তশিংদা ভারতকী মহুৎশীন্দুনা শানখিবা ভারতকী নহা ওইরিবা ফুতবোল শান্নরোই অমসুং হৌজিক কিদনি য়াদ্রবা রামানন্দা নিংথৌজমদা স্পোর্তস মিনিস্ত্রিনা শেনগী মতেং পীখ্রে। রিক্সো থৌবা অমগী মচানুপা অমা ওইবনা, মহাক লায়েংনবা মহাক্কী ইমুংগী পাম্বৈ অমতা লৈতে। হৌজিক মহাক মনিপুরগী শিজ হোস্পিতালদা লায়েংলি অমসুং কিদনি য়াদবগা লোয়ন্না মিৎ ফজনা উদবগী অৱাবা মায়োক্নরি। 

মহাক্কী হকচাংগী অরুবা মেদিকেলগী ফিবম অমসুং ইমুং-মনুংগী শেন-থুমগী ফিবম খঙবদগী শান্নরোইশিংগী শেমগৎপা পন্দিৎ দিনদয়াল উপাধ্যায় নেস্নেল ৱেলফিয়ার ফন্দগী মখাদা লুপা লাখ ৫গী এক্স-গ্রেসিয়াগী শেন্থং পীনবা য়ুথ এফেয়ার্স অমসুং স্পোর্তসকী য়ুনিয়ন মিনিস্তর কিরেন রিজিজুনা কাইথোক্লে।

ৱারেপ অসিগী মতাংদা মিনিস্তরনা হায়খি ঐখোয়গী শান্নরোইশিং য়াইফবা অসি সরকার অসিগী মরুওইবনি। তোঙান-তোঙানবা থৌরমশিংদা রামানন্দনা ভারতকী মহুৎশিনখি অমসুং ভারতকী শানবদা মতেং পাংখি। শান্নরোইশিং অসি ঐখোয়গী লৈবাক্কী লন ওইবা খক নত্তনা, মখোয় লৈবাক্কী ফিদম্নফম ঙাক্তনি মরম অদুনা শান্নরিঙৈ মনুং নৎত্রগা শান্নবা লেপ্লবসু খ্বাইদগী ফবা খুদোংচাবা ফংহনবা অসি য়াম্না মরুওই। করিগুম্বা ঐখোয়না মখোয়না ইকায়খুম্নবা পুন্সি অমা পীবা ফংহনবা ঙমদ্রবদি, শান্নবগীদমক মখোয়গী পুন্সিগী খ্বাইদগী মপান ফরিঙৈ চহি কয়া কৎথোকখিবা শান্নরোইশিং পুক্নিং থৌগৎপা ঙম্লোই। 

ইমুংগী মচানুপা অহল ওইরিবা রামানন্দা ২০১৭দা গুৱাহাতিদা পাংথোকখিবা অন্দর-১৭ এসিয়ান ফুতবোল সোক্কর চেম্পিয়নশিপ ভারতকী মহুৎশিন্দুনা শরুক য়াখি। ২০১৩দা কলয়ানিদা পাংথোকখিবা অন্দর-১২/১৩ নেস্নেল সব-জুনিয়র চেম্পিয়নশিপ অমসুং ২০১৫দা দিল্লিদা পাংথোকখিবা অন্দর-১৫ নেস্নেল চেম্পিয়নশিপ শরুক য়াখি। 

মমাংদা হায়রিবা ফন্দ অসিগী মখাদা অহল ওইরবা স্পোর্তস কমেন্তেতর নোভি কপাদিয়াদা মতেং পীখ্রে। দরকার লৈবা শান্নরোই অমনা হেক্তা মতেং লৌনবা স্পোর্তস মিনিস্ত্রিগী ৱেবসাইত্তা এপ্লাই তৌবা য়াগনি নৎত্রগা myasoffice[at]gmail[dot]com দা ইরকপা য়াগনি।

*****