কেন্দ্রগী লৌউ-শিংউ অমসুং লৌমীশিংগী য়াইফ-থৌরাং, খুঙ্গং চাউখৎ থৌরাং অমসুং পচায়তী রাজ মন্ত্রী শী নরেন্দ্র সিংহ তোমারনা ঙসি ভর্চুএল ওইনা রাজ্য ৯ (গুজরাৎ, এম.পি., মহারাস্ত্রা, ওরিশা, অসম, নাগালেন্দ, ত্রিপুরা, উত্তরাখন্দ অমসুং কর্নাতাকা)দা ৱাগী ক্লস্তর ২২ হাংদোকখ্রে।  নেসনেল বেম্বু মিসনগী লোগো অমসু ফোংখ্রে। নেসনেল বেম্বু মিসন্না মায় পাকপসিদা হরাউবা ফোংদোক্লদুনা শ্রী তোমারনা হায়খি মদুদি লৈবাক অসিনা হৌজিক্তি ৱাগী পোত্থোকশিং মপান লৈবাকশিংদা থাদোকপদা মাই ওনশিল্লগনি।

ভিদিও কনফরেন্স অদুদা ৱা ঙাংলদুনা কেন্দ্রগী লৌউ-শিংউ মন্ত্রীনা হায়খি মদুদি প্রধান মন্ত্রী শ্রী নরেন্দ্র মোদীনা মতম চুপ্পদা লোকেল ইন্দস্ত্রীশিং অসিবু ঙাকপী শেনবীগদবনি অমসুং লোকেল আর্তিসানশিং অসিবু হিংনবগী লম্বী পীবীনবগীদমক খুমাং চাউশিলহনগদবনি হায়না চপ য়ুংনা লেপ্তুনা লাক্লি। সরকার অসিনা ৱাগী সেক্তরদা  থম্লিবা পান্দমদু বেম্বু মিসনগী স্তেকহোল্দরশিংনা কন্না হোৎনদুনা ফংলি। ৱাগী মরুওইবশিংবু খঙলদুনা ইন্দিয়ন ফোরেস্ত এক্ত ১৯২৭সু ২০১৭দা শেমদোক্তুনা উগী কাংলুপতগী ৱা লৌথোকখ্রে, মসিগী মরম্না হৌজিক্তি কনাগুম্বা অমহেক্তনা ৱা থাদুনা অমসুং মসিগী পোত্থোকশিংবু লল্লোন ইতীক তৌবা য়ারগনি। শ্রী তোমারনা হায়খি মদুদি ৱা শীজিন্নবা হায়বসি ভারত্তা থাইনদগী তৌদুনা লাক্লি অমসুং হৌজিকসু অনৌবা তেক্নোলোজীগী মতেংনা চত্থরি। নহাশিংসু ৱাগী ইন্দস্ত্রীগীদমক ত্রেনিং কয়া অমা পীরি।

মন্ত্রীনা রাজ্যশিংদা মিসন অসিগী পান্দম মমাংদা থমদুনা প্রধান মন্ত্রীনা আত্মনির্ভর কৃশিগী মখাদা আত্মনির্ভর ভারত ফংনবগীদমক হোৎনরিবসিদা মতেং পাংনবগীদমক পুক্নিং চিংশিনখি। মিসন লমদম অসিদা হৌবা ৱাশিংগী মখাদা লোকেল আর্তিসানশিংদা মতেং পীরিবা অসিনা ভোকেল ফোর লোকেল ফংনবা হোৎনবদা মতেং ওইরগনি। মসিনা লৌমীশিংগী চাগা লাকহনলগনি অমসুং মতম অমত্তদা রো মতিরিএল খরা মপান লৈবাক্তগী পুশিল্লক্তুনা শীজিন্নবসু হন্থহল্লগনি। ভারত্তা ৱা মরাং কাইনা হৌবগা লোইননা ভারতনা ইঞ্জিনীয়র তৌদুনা অমসুং খুৎনা শাবা পোত্থোকশিং মালেমগী কৈথেলদা থাদোক্নবা পান্দম থমগদবনি।

নৌনা শেমদোক্লবা নেসনেল বেম্বু মিসন অসি ২০১৮-১৯দা সেক্তর অসিগী মপুং ওইবা ভেল্যু চেন চাউখৎনবা হৌদোকখিবনি। মিসন অসি হব (ইন্দস্ত্রী) অমসুং স্পোক মোদেলদা লৌমীশিংবু কৈথেলগা শম্নহন্দুনা পোত্থোক পুথোকপা লৌমীশিংদা ৱা থাবগী কৈথেল হেনগৎনবা অমসুং দোমেস্তিক ইন্দস্ত্রীশিংদা রো মতিরিএল পীবা হেনগৎনবা মরুওইবা পান্দম থমদুনা থবক ওইনা পায়খৎলি। মিসন অসি ইন্দিয়ন ফোরেস্ত এক্তপু ২০১৭দা ৱাবু উগী কাংলুপ্তগী লৌথোক্তুনা শেমদোকখিবদুগী মখা তারকপা ওইনা হৌদোকখিবনি, মসিনা মরম ওইদুনা উমংগী মপান্দা হৌবা ৱাশিংদি য়ানবা অমসুং পুথোক পুশিন তৌবগী পর্মিসন চঙলরোই।

ৱাগী ইকোসিস্তেম অসি রাজ্য ২৩দা অৱাং নোংপোক্কী রাজ্য ৮ য়াওনা মতেং পাংদুনা মপাঙ্গল কনখৎহল্লে। ইন্দস্ত্রী অসিনা খ্বাইদগী তঙাইফদবা মরুওইবা জাৎ ১০সু শকখঙলে অমসুং মগুন লৈনা থানবগী পোৎচৈসু লৌমীশিংদা ফংহল্লে। অসমদি মাংজৌননা থাবগী চাং ৱাংখৎনবগীদমক এফ.পি.ও.শিংদা থবক শিন্নখ্রে। অনৌবা এফ.পি.ও.শিংসু হন্দক্তা নৌনা অয়াবা পীখ্রবা দি.এ.সি.এফ.দব্ল্যু.গী মখাদা চহী ৫দা এফ.পি.ও. ১০.০০০ শেম্নবা পান্দম থম্লিবা স্কিম অসিগী মখাদা হাংদোক্লগনি। মখা তানা প্রাইমরী প্রোসেসিং তৌনবা সি.এফ.সি.শিংসু থারিবা মফমশিং অদুগী ময়া নক্না লিংখত্তুনা ৱা পুন্না থাবদা চঙবা মমলশিং হন্থনবা, লোকেল ওন্ত্রপ্রিনর্শিপ হেনগৎনবা অমসুং জিরো ৱেস্তকী লম্বীদা চঙশিন্নবা হোৎনরি।

হায়রিবশিং অসি নর্সরি অমসুং প্লান্তেসন অমসুং/নত্ত্রগা ফর্নিচর, অগর্বতি, ভেনেতিয়ান ব্লাইন্দ, চোপস্তিক, তুথব্রজ, লাইফস্তাইলগী পোত্থোকশিং, লৈতেংগী পোত্থোক, বোত্তল, য়োগা মেৎ, মৈতাল অসিনচিংবা হেংৎনবা হীরমদা শীজিন্নগনি। ইন্দস্ত্রিএল প্রদক্তশিংগা লোইননা, নেসনেল বেম্বু মিসন অসিনা মহৌশাগী ৱাগী খুৎহৈবশিংবু হৌজিক্কী কৈথেলদা পাম্লিবা মওংদা ইন্তর্প্রাইজ অমসুং মকোক থোংবা ইন্সতিত্যুৎশিংগা পুন্দুনা ঐখোয়গী নাৎকী লমচৎশিং অসি মখা তানা লৈহৌনবগীদমক ত্রেনিং পীগনি। নেসনেল স্কিল দিবেলপমেন্ত এজেন্সীগী মখাদা লিংখৎলিবা সেক্তর স্কিল কাউন্সিলনা মহৌশাগী খুৎহৈবশিংদা স্কিল অমসুং রিকগনিসন ওব প্রাইয়র লর্নিংগী মহৈ পীগনি। মসিনা নহাশিংবু মখোয়গী ইমুংগী চৎনবী মখা তানা হিংহন্নবা হোৎনবদা মতেং পাংবীরগনি।

লোগো চাংদম্নবগী মকোক থোংলবা তেলঙ্গানাগী শ্রী সাই রাম গৌদি এদিগীবু মাইগোব প্লেৎফোর্মদা লৈবাক শীনবা থুংবদগী থাজিল্লকখিবা এন্ত্রী ২০৩৩দগী খনগৎখিবনি। লোগো অসিদা য়াওরিবা ইন্দস্ত্রীগী চক্রগী তংখাই অমা অমসুং লৌমী তংখাই অমগী ময়াইদা ৱাগী মউ অমা য়াওরি, মসিনা এন.বি.এম.গী পান্দম উৎলি। লোগো অসিগী অশংবা অমসুং হঙ্গাম্পাল মচুনা অশংবা সনানি হায়না লৌনরিবা ৱাগী মহুৎ শিল্লি।

*****