ঙাকশেল মন্ত্রালয়
দি.আর.দি.ও.না হাইপর্সোনিক তেক্নোলোজী দেমোন্সত্রেতর ভেহিকল মায় পাক্না ফ্লাইৎ চাংয়েং তৌখ্রে
Posted On:
07 SEP 2020 2:56PM by PIB Imphal
দিফেন্স রিসর্চ এন্দ দিবেলপমেন্ত ওর্গনাইজেসন (দি.আর.দি.ও.)না হাইপর্সোনিক তেক্নোলোজী দেমোন্সত্রেসন ভেহিকল (ঐচ.এস.তি.দি.ভি.) ফ্লাইৎ চাংয়েং তৌবগা লোয়ননা হাইপর্সোনিক এয়র-ব্রীথিং স্ক্রামজেৎ তেক্নোলোজী ঙসি ওরিশাগী সমুদ্র খোঙবান্দগী খরা চৎলগা লৈবা হ্বীলর আইলেন্দদা লৈবা দোক্তর এ.পি.জে. অব্দুল কলাম লোঞ্চ কম্প্লেক্সতগী ঙসি পুং ১১০৩ তাবা মতমদা মায় পাক্না চাংয়েং পাঙথোকখ্রে।
হাইপর্সোনিক ক্রুজ ভেহিকল অদু প্রোভন সোলিদ রোকেৎ মোতোর অমা শীজিন্নদুনা থাগত্তুনা কিলোমীতর ৩০গী অৱাংবদা পুখত্তুনা এরোদাইনামিক হীৎ সিল্দশিং হাইপর্সোনিক মেচ নম্বরদা খাইদোকখি। ক্রুজ ভেহিকল অদু লোঞ্চ ভেহিকলদগী খাইদোক্তুনা এয়র ইন্তেক হান্না থৌরাং তৌখিবগী মতুং ইন্না হাংদোকখি। হাইপর্সোনিক কম্বস্সন অদুম্মক চত্থদুনা ক্রুজ ভেহিকল অদু মশাগী ফ্লাইৎ লম্বীদা খোঞ্জেলগী অয়াঙবগী শরুক তরুক হেনবা, হায়বদি সেকেন্দা কি:মি: ২গী ময়াদা সেকেন্দ ২০ হেন্না পাইখি। ফ্যুল ইঞ্জেক্সন অমসুং স্ক্রামজেৎগী ওতো ইগ্নিসন্নচিংবা মরুওইবা থৌরমশিং মপুং ফাবা তেক্নোলোজীগী মতৌ উৎখি। স্ক্রামজেৎ ইঞ্জিন অদু মওং চুম্না মথৌ তৌখি।
স্ক্রামজেৎ ইঞ্জিন য়াওনা লোঞ্চ অমসুং ক্রুজ ভেহিকলগী পেরামীতরশিং মশিং য়াম্লবা ত্রেকিং রেদারশিং, ইলেক্ত্রো-ওপ্তিকেল সিস্তেমশিং অমসুং তেলিমিত্রী স্তেসনশিংদগী শেন্নখি। স্ক্রামজেৎ ইঞ্জিন অদু অৱাংবা দাইনামিক প্রেসরদা অমদি য়াম্না ৱাংবা মৈশাদা মথৌ তৌখি। হাইপর্সোনিক ভেহিকলগী ক্রুজ তাঙ্কক মনুংদা তৌরিবা মথৌ শেন্ননবা বে ওফ বেঙ্গলদা জহাজ অমসু মথৌ তৌদুনা লৈখি। মথৌ তৌবগী পেরামীতর পুম্নমক মিসন অদুগী চাউনা মায় পাকপগী মতৌ উৎখি।
মায় পাক্না চাংয়েং তৌখিবগা লোয়ননা হাইপর্সোনিক মেনোভরগী এরোদাইনামিক কনফিগরেসন, মৈ হৌহনবা অমসুং হাইপর্সোনিক ফ্লোদা মখা তানা মৈ চাকহনবদা স্ক্রামজেৎ প্রোপল্সন শীজিন্নবা, মৈশা ৱাংবা মচাক মথুমশিংগী থর্মো-স্ত্রকচরেল করেক্তরাইজেসন, হাইপর্সোনিক খোঙজেলদা খাইদোকপগী মেকানিজমনচিংবা মরুওইবা তেক্নোলোজী কয়া মায় পাকপগী খুদম ফংখি।
ঙাকশেল মন্ত্রী শ্রী রাজনাথ সিংহনা প্রধান মন্ত্রী নরেন্দ্র মোদীগী আত্মনিরভর ভারতকী মঙলান মঙফাওনহনবগী মায়কৈরোমদা মশক থোকপা মায় পাকপা অমা ফংবা ঙমখিবগীদমক দি.আর.দি.ও.বু থাগৎখি। প্রোজেক্ত অদুদা থবক তৌরিবা সাইন্তিস্তশিংগসু মহাক্না ৱারী শাখি অমদি অসিগুম্বা অচৌবা মায় পাকপা অদুগীদমক মখোয়বু থাগৎপা ফোঙদোকখি। ভারতনা মখোয়গীদমক চাউথোকচৈ, হায়না মহাক্না মখা তাখি।
দিপার্তমেন্ত ওফ দিফেন্স আর. এন্দ দি.গী সেক্রেতরী অমসুং দি.আর.দি.ও. চেয়রমেন দোক্তর জি সথিস রেদ্দীনা সাইন্তিস্ত, থিজিল্লোয় অমসুং ঐচ.এস.তি.দি.ভি. মিসনগা মরী লৈনবা থৌমী পুম্নমকবু মখোয়গী ফিরেপগীদমক অমদি লৈবাকসিগী ঙাকশেলগী মতিং হেন্না মপাঙ্গল কনখৎহনবগীদমক থাগৎপা ফোঙদোকখি অসুম্না মায় পাক্না চাংয়েং পাঙথোকখিবা অসিনা লৈবাকসিনা হাইপর্সোনিক কাঙলূপ্তা চঙশিন্দুনা হেন্না খুমাঙ চাউশিনবা হায়পর্সোনিক ভেহিকলশিংগী লম্বী য়াৎলে।
http://pibphoto.nic.in/documents/Others/20209778978978245.mp4
*****
(Release ID: 1652088)
Visitor Counter : 227