কেন্দ্রগী দিবেলপমেন্ত ওফ নোর্থ ইন্সতর্ন রীজন (দি.ও.এন.ই.আর.)গী রাজ্য মন্ত্রী (মনিংতম্বা), এম.ও.এস. পি.এম.ও., পর্সোন্নেল, পব্লিক গ্রাইবেন্স, পেন্সন, এতোমিক ইনর্জী অমসুং এম.ও.এস. স্পেস মন্ত্রী শ্রী জিতেন্দ্র সিংহনা ঙসি ৱাফম অসি ফোঙদোক্লদুনা হায়খিবদা আই.এস.আর.ও.গী অমত্তা ঙাইরবা থাগী মিসন অসিনা থা অসি মসিগী পোলগী মপাশিংদা কোলিং পৈশিন্দুনা লৈরম্বা য়াবগী মওং উৎপা ফোতো থারক্লি হায়খ্রে। মসিগী ফোতোশিং অসিনা তাক্লিবা অসি থাগী লৈমাই অসি য়োৎকী শরুক য়াম্না য়াওবা নুঙ কয়া লৈ হায়বসি খঙলবসু  য়োৎনা কোলিং কানবগীদমক্তা রিএক্সন থোক্নবা ঈশিং অমসুং ওক্সিজেন্দি লৈতে হায়বা অসিনি হায়না মহাক্না মখা তানা হায়খি।

নেস্নেল এরোনোতিক্স অমসুং স্পেস এদমিনিস্ত্রেসন (এন.এ.এস.এ.)গী সাইন্তিস্তশিংনা হায়খিবগী মতুং ইন্না পৃথীবিগী মশাগী ওইবা এৎমোস্ফ্যার অসিনা চৈথেং পীবগী ওইরম্বা য়াই নত্ত্রগা পৃথীবিগী এৎমোস্ফ্যার অসিনা থাবুসু ঙাকথোক্তুনা থম্লম্বা য়াই হায়না অতোপ্পা ৱাহন্থোক অমা হনবসু য়াই হায়খি। মতৌ অসুম্না চন্দ্রয়ান-১গী দেতা অসিনা থাগী পোলদা ঈশিং লৈরম্বগী ওইথোকপা য়াবগী ফিভম উৎলি অমসুং সাইতিস্তশিংনা হীরম অসিগী মতাংদা অচুম্বা খঙনবা হোৎনরি।

দাঃ জিতেন্দ্র সিংহনা হায়খিবদা চন্দ্রয়ান-৩গী ওইনদি মিসন অসি ইং ২০২১গী অঙনবদা পাঙথোকপা য়াই হায়খি। চন্দ্রয়ান-৩ অসি চন্দ্রয়ান-২গা চপ মান্নবা মিসন ওইগনি অমসুং মসিদা চন্দ্রয়ান-২গা মান্নবা লেন্দর অমসুং রোভর য়াওগনি অদুবু ওর্বিত্তরদি য়াওরোই হায়খি।

তাঞ্জা অসিদা ভারতকী ইহান হানবা ওইগদবা মী পুবা গগনয়ান মিসনগী শেম-শাবগী থবক কন্না পাঙথোক্লি হায়না দাঃ জিতেন্দ্র সিংহনা হায়খি। ত্রেনিং তৌবগী থৌওং অমসুং অতোপ্পা থবকশিং অসি হৌজিক মফম চানা পাঙথোক্লি হায়না মহাক্না মখা তানা হায়খি।

কোবিদকী লায়চৎনা মরম ওইদুনা গগনয়ানগী থৌরমদা অয়েৎপা খরদি লৈরি অদুবু মিসন অসিবু ইং ২০২২ ফাওবগী মনুংদা পাঙথোক্কনি হায়না হোৎনরিবা অসিগী থবক্তি লেপ্তনা মখা তানা চত্থরি হায়না মহাক্না হায়খি।

*****