ঙসি লাদাখকী লেফতিনেন্ত গভর্নর আর.কে মাথুরনা দোনরগী রাজ্য মন্ত্রী(মনিংতম্বা), পি.এম.ও, পর্সোনেল, পব্লিক গ্রিভান্সেস, পেন্সন্স, এতোমিক ইনর্জি অমসুং স্পেসকী রাজ্য মন্ত্রী দোক্তর জিতেন্দ্র সিংহগা উনখ্রে অমসুং য়ুনিয়ন তেরিতোরি অসিগী চাউখৎ-থৌরাংগী মতাংদা ৱাফম কয়া খন্নখ্রে।

দোক্তর জিতেন্দ্র সিংহনা হায়খি লাদাখ অমসুং অতৈ মতাইদা লৈবা মফমশিং চাউখৎহন্নবা প্রধান মন্ত্রী নরেন্দ্র মোদীনা য়াম্না লুম্না লৌরি। মোদী সরকারগী মখাদা লাদাখতা য়ুনিভর্সিতি অমা, মেদিকেল কোলেজ অমা অমসুং ইঞ্জিনিয়ারিং কোলেজ অমা লিংখৎপা অসি হন্দক্কী অসিনা অহানবনি।

দোক্তর জিতেন্দ্র সিংহনা হায়খি সি.এস.আই.আরগী দিরেক্তর জেনেরেল দোক্তর সেখর মান্দেনা অথুবদা লেফতিনেন্ত গভর্নর আর.কে মাথুর উনরগনি অমসুং “লাদাখ বেরি” হায়না খঙনবা মমিং লৈরবা লাদাখকী  উহৈ অসি ললোন-ইতিক চৎথনবা অমসুং মীয়াম্না পাম্নবা হেনগৎহন্নবা অখন্নবা থৌরাং অমগী মতাংদা পাউদম্লগনি।

“কার্বোন নিউত্রিএল” লাদাখ অমা ওইহন্নবা প্রধান মন্ত্রী নরেন্দ্র মোদীনা লাউথোকখিবা অদুগী থৌশিল অমসুং থবক ওইনা পাংথোক্নবা থৌরাং শেম্নবগী মতাংদা শ্রী মাথুরনা দোক্তর জিতেন্দ্রদা পাউদমখি। মহাক্না হায়খি অৱাংবা থাক্কী ফম্নাইবশিংগী মমাংদা অথুবদা পুথোক্নবা অপুনবা থৌরাং অমা শেম্নবা য়ুনিয়ন তেরিতোরি সরকার অসিনা কন্না হোৎনরি। “লাদাখ ভিজন ২০৫০” কৌবা থৌরাং অমগী মতাংদা মাথুরনা পাউদমখি।

লাদাখকী চাউখৎ-থৌরাংগী লুপা করোর ৫০গী অখন্নবা পেকেজ অমগী মতাংদা লেফতিনেন্ত গভর্নর আর.কে মাথুরনা হায়খি লমদম অসিগী ওইনা কেন্দ্র সরকার অমনা পুকচেল চাউনা তোঙান-তোঙানবা প্রোজেকশিংগী শেন থাদরকপা অসি হন্দক্কী অসিনা অহানবনি। মসিগী অহানবা ওইনা লাদাখ লমদমগী ওইনা কৎথোক্লবা থৌরাং অমনি। লাদাখকা মরী লৈনবা ৱাফমশিং তোঙান-তোঙানবা মিনিস্ত্রিশিংদা পুখৎপগীদমক মাথুরনা দোক্তর জিতেন্দ্র থাগৎখি।

*****