“অনৌবা শিংনবশিং মায়োক্নবা” হায়বা পান্দমদা ঙসি পাংথোকপা য়ু.এস.আই.এস.পি.এফকী ৩সুবা চহিগী লুচিংবশিংগী মীফমদা পেত্রোলিয়ম অমসুং নেচরেল গ্যাসকী য়ুনিয়ন মিনিস্তর ধরমেন্দ্র প্রধান শরুক য়াখ্রে।   

কোবিদ-১৯ লাইচৎনা মালেমগী শেন-থুমদা পীরিবা চৈথেং অমসুং মখা তারকপদা ইনর্জি শীজিন্নবা হন্থরকপগী মতাংদা মিনিস্তর প্রধান্না ৱা ঙাংখি। মহাক্না হায়খি ভারত্তা তপ্না তপ্না শেন-থুমগী থবকশিং হৌরকপদগী ইনর্জি শীজিন্নবগী চাং অথুবদা কোবিদ মমাংগী চাংশিং য়ৌরক্লগনি হায়না থাজনরি।

অত্মানির্ভর ভারতকী খোঙজংগী মতাংদা মিনিস্তরনা হায়খি মশাগী ওক্নবা পুথোকপা ভারত অমা শেমগৎনবা, কোবিদ-১৯গী শিংনবশিং খুদোংচাবা ওন্থোক্নবা, লৈবাক মনুংগী পোৎথোকশিং অমসুং শীজিন্নরিবশিং মালেমগী সপ্লাই চেন্দা য়াওহন্নবা অমসুং ২১সুবা চহিচাদা ভারত মালেমগী পোৎ-চৈ শাফম অমা ওইহন্নবা প্রধান মন্ত্রী নরেন্দ্র মোদীনা খোঙজং অসি হৌদোকখিবনি।

মিনিস্তরনা হায়খি ভারত্তা অওনবা পুরকপদা ইনর্জিগী মচাক-মথুমশিং অসি মরুওইবা অমনি অমসুং ভারতকী ইনর্জিগী লমদা লৈরিবা খুদোংচাবশিং লৌনবা য়ু.এস ইন্দস্ত্রিশিং ভারত্তা থবক পায়খৎকদবনি।

মহাক্না হায়খি ভারত অমসুং য়ু.এসগী মরক্তা হায়দ্রোকার্বোনগী ললোন-ইতিক হেনগৎলক্তুনা শেনবা চহি ২০১৯-২০দা য়ু.এস বিল্লিয়ন দোল্লর ৯ য়ৌরে অমসুং কম্পেনিশিংনা য়ু.এসতগী শুংদোক্ত্রিবা থাও অমসুং এল.এন.জি লৈনবা হোৎনরিবা মরম্না মসি হেনগৎলকপা য়ারি।

মিনিস্তরনা হায়খি ২০৩০ ফাওবগী মনুংদা গ্যাস শীজিন্নবগী চাং চাদা ৫দগী চাদা ১৫দা হেনগৎহন্দুনা গ্যাসতা য়ুম্ফম ওইবা ইকোনোমি অমা শেমগৎনবা ভারতনা থবক পায়খৎলি। “লৈবাক অমা, গ্যাস গ্রিদ অমা” শেমগৎতুনা সেক্তর অসিদা য়ু.এস বিল্লিয়ন দোল্লর ৬০ থাদনবা থৌরাং তৌরি। মালেমগী থাও অমসুং গ্যাসকী মমি লৈরনবা বি.পি, সেল,তুতেল, একজোন মোবিলনা ভারত্তা থবক হৌরকপদা মহাক্না হরাওবা ফোঙদোকখি অমসুং থাও অমসুং গ্যাস থিবা অমসুং পুথোকপগী থবকশিংদা শরুক য়ানবা মথংগী থাও অমসুং গ্যাস ব্লোগ বিদ্দিং রাউন্দশিংদা শরুক য়ানবা খঙহনখি।

মিনিস্তর প্রধান্না হায়খি কোবিদ-১৯গী শিংনবা কয়া মায়োক্নরবসু মালেমগী ইনর্জিগী কৈথেলশিং ফিবম ফনা লৈহন্নবা ভারত অমসুং য়ু.এস পুন্না থবক তৌমিন্নরি, লৈবাক অনিগী মরক্তা ইনর্জি অমুক হন্না ফগৎলক্কনি হায়না ইন্দস্ত্রিগী লুচিংবশিংনা থাজবা থম্লি।

য়ু.এস.আই.এস.পি.এফকী সি.ই.ও দোক্তর মুখেস অগিনা হায়খি অত্মানির্ভর ভারত মাইপাক্নবা য়ু.এস অমসুং ভারতকী কম্পেনিশিং হেন্না মতেং পাংন্নবা য়ু.এস.আই.এস.পি.এফনা হোৎনগনি।

*****