কোবিদ-১৯ লাইচৎ থেংনরিবা অসি শৌগৎপা ওইনা জাপানিজ য়েন বিল্লিয়ন ৫০(চাউরাক্নবা লুপা করোর ৩,৫০০)গী শেনফম অমা ওফিসিএল দিবলপমেন্ত এসিস্তেন্স লোন ওইনা পীরগনি হায়না জপান সরকারনা থাজবা পীখ্রে। কোবিদ-১৯ থেংন্নবা হকশেলগী থবকশিংগী লোন পীনবা য়ানবা অসি ঙসি ভারত সরকারগী ফাইনান্স মিনিস্ত্রিগী ইকোনোমিক এফেয়ার্স দিপার্তমেন্তগী এদিসনেল সেক্রেতরি, দোক্তর সি.এস মোহাপত্রা অমসুং ভারত্তা লৈবা জপানগী এম্বেসিগী এম্বেসেদর সুজুকি সাতোসিনা পুরকখিবনি।

য়ানবা পুরকখিবগী মখা তারকপা ওইনা, ঙসি নিউ দিল্লিদা ভারত সরকারগী ফাইনান্স মিনিস্ত্রিগী ইকোনোমিক এফেয়ার্স দিপার্তমেন্তগী এদিসনেল সেক্রেতরি, দোক্তর সি.এস মোহাপত্রা অমসুং জিকাগী চীফ রিপ্রসেন্তেতিপ, কাতসু মাতসুমোতোনা লোনগী য়ানচে খুৎয়েক পীনখি।

মসিগী লোন অসিনা ভারতনা কোবিদ-১৯ লাকশিন্নবা পায়খৎলিবা থবকশিং শৌগৎপা অমসুং তুংদা লাকপা য়াবা লাইচৎশিং থেংন্নবা হকশেলগী থবকশিং থৌরাং তৌনবা অমসুং লৌনগনবা লায়নাশিংদগী ঙাকথোক্নবা ভারতকী হকশেলগী থবকশিং ফগৎহন্নবা পান্দম থম্লি।

মসিগী মথক্তা, জপান সরকারদগী লুপা করোর ৭০ রোমগী গ্রান্ত অমা পীনবা ভারত সরকারগী ফাইনান্স মিনিস্ত্রিগী ইকোনোমিক এফেয়ার্স দিপার্তমেন্তগী এদিসনেল সেক্রেতরি, দোক্তর সি.এস মোহাপত্রা অমসুং ভারত্তা লৈবা জপানগী এম্বেসিগী এম্বেসেদর সুজুকি সাতোসিনা ঙসি য়ানচে খুৎশীন্নখি।

জপান সরকারগী গ্রান্ত-ইন-এদ অসিনা ভারতকী মীয়ামগী হকশেলগী থবকশিং অমসুং মেদিকেলগী সিস্তেম ফগৎহনবদা শীজিন্নগনি। মসিনা কোবিদ-১৯ লাইচৎনা মরম ওইদুনা অরুবা অনাবশিং লায়েংনবা অনা-লাইয়েংগী থবকশিং ফগৎহনগনি।

১৯৫৮দগী হৌনা ভারত অমসুং জপান্না নাকল অনিগী ওইবা মতেং পাংনদুনা লাক্লি। হৌখিবা চহি খর অসিদা ভারত অমসুং জপানগী মরক্তা শেন-থুমগী মতেং পাংনবা হেনগৎলক্লি অমসুং অচেৎপা মরুপ-মপাং অমা ওইরক্লি। মসিনা ভারত অমসুং জপানগী মরক্তা লৈনরিবা মরুওইবা অমসুং মালেমগী থাক্কী মরী অদু মপাঙ্গল কনখৎহল্লগনি।

****