উপ রাস্ত্রপতী শ্রী এম. ভেঙ্কায়া নাইদুনা ঙসি এদমিনিস্ত্রেসন য়াওনা হীরম কয়াদা মমা লোল পাকশন্না শীজিন্ননবা ফোঙদোকখ্রে। মমা লোলদা মহৈ তম্বীবনা অতৈ অতোপ্পা লোলশিংদা তম্বীবদগী অঙাংশিংনা সবজেক্তশিং মমুৎ তানা খংবা হেনগনি হায়না মহাক্না ফোঙদোকখি।

তেলুগু লোলগী নুমিৎ পাল্লন থৌরমদা পাঙথোকখিবা “অৱর লেংগ্বেজ, অৱর সোসাইতী এন্দ অৱর কলচর”গী ৱেবিনার অমদা মহাক্না ৱা ঙাংখি। থৌরম অসি সাউথ এফ্রিকা তেলুগু কম্ম্যুনিতী (এস.এ.তি.সি.)না শিনখিবনি। ভিদিও কনফরেন্স অদুদা লন্দন, সীদনী, কেনবেরা, অবু ধাবি, স্কোৎলেন্দ, হোং কোং, সাউথ এফরিকা, ন্যু জীলেন্দ অমসুং জর্মনী য়াওনা মালেম পুম্বদগী তেলুগু লোলগী এক্সপর্তশিং অমসুং তেলুগু এসোসিএসনগী মীহুৎশিং শরুক য়াখি।

থৌরম অসি তেলুগুগী লিঙ্গুইস অমা ওইরম্বা অমসুং লোল চাউখৎনবনা হোৎনরম্বা শ্রী গিদুগু ভেঙ্কৎ রামা মুর্থীগী মপোক কুমওনগা লোয়ননা থৌরম অসি চান্ননবা শীনখিবনি।

শ্রী নাইদুনা হায় লোল অমসুং নাৎনা খুন্নাই অমা চাউখৎহন্নবগী হৌরকফম ওইরি।

তেলুগু লোল য়োখৎপা মথৌ তাবগী মতাংদা পল্লদুনা মহাক্না হায় তেলুগু খুদিংমক্না ভারত্তা লৈরিবা নত্রগা মাপালদা লৈরিবা পুম্নমক্না মখোয়গী লোল অমদি নাৎ য়োখৎনবা হোৎনগদবনি।

উপ রাস্ত্রপতীনা তেলুগু লোলদা অচম্বা সাইন্তিফিক তর্মিনোলোজী শেমগৎনবা অপাম্বা ফোঙদোক্তুনা হায়খি মসিনা মীচম মীয়ামদা সাইন্স অমসুং তেক্নোলোজী হেন্না মমুৎ তানা খঙহনবদা মতেং ওইগনি।

উপ রাস্ত্রপতীনা হায় নুমিৎ খুদিংগী শীজিন্নরিবা তেলুগু অমসুং অতোপ্পা ভারতকী লোলশিংগী লৈরিবা ফীভম অসি কুপ্না য়েংশিনবা মথৌ তাই। মহাক্না হায়খি লোল অমনা খুন্নাই অমগী লন ওইরিবনি। লোলনা শান্না-খোৎনবা, লোলশিং, কুম্মৈশিং অমসুং খুন্নাই অদুদা লৈরিবা কলাবু শক্তাক্লি।

শ্রী নাইদুনা হায় লোল অমগী মতিক মঙাল ওইরিবা লনশিং অসি লাক্লিবা চারোন-শুরোনশিংদা থংদবা খক্তনা ঙাক শেনবা অমসুং য়োখৎপা ঙমগনি।

গ্লোবেলাইজেসনগী মতম অসিদা মালেমদা লৈরিবা মমা লোল কয়া অমা মুৎখিগদবগী খুদোংথিবা উরদুনা মহাক্না হায়খি করিগুম্বা মখোয়না ফীভম অসিদা অদুমক চত্থরবদি মসি মুৎখিবা য়াই। উপ রাস্ত্রপতীনা ফ্রান্স, জর্মনী, রুসিয়া, জপান অমসুং চিনাগুম্বা লৈবাকশিংনা লম পুম্নমক্তা মখোয়গী মশাগী লোলশিং অদুদা য়োখৎপগা লোয়ননা অতোপ্পা চাউখৎলবা লৈবাকশিংগী মপুং ফানা লম্বা তৌনরি হায়না ফোঙদোকখি।

শ্রী গিদুগু ভেঙ্কৎ রামা মুর্থীদা ইকায় খুম্নবা উৎলদুনা উপ রাস্ত্রপতীনা মহাক অসি সিমপ্লিফাই তেলুগু লোল হৌদোক্লম্বা অমসুং প্রজা মীয়ামদা খংহনলম্বা মল্তি-লিংগুইস্ত, হিস্তোরিয়ন অমসুং সোসিএল ভিজনরী অমনি হায়না মশক তাকখি। মহাক্কী চোকথবা লৈত্রনা হোৎনবনা লোল অসি মীয়ামদা শীন্নরম্বনি।

উপ রাস্ত্রপতীনা তেলুগু লোল ঙাশেনবা অমসুং অৱাংবা থাক্তা পুখৎপনা শ্রী গিদুগু রামা মুর্থীদা তশেংনা ইকায় খুম্নবা উৎপা ওইগনি।

দা. সি.ঐচ. রামেশ, এম.এল.এ. তেলঙ্গনা লেজিসলেতিভ এসেমব্লি; শ্রীমতী কবিতা কলবাকুনত্লা, তেলঙ্গনা জাগ্রিতীগী প্রসিদেন্ত; শ্রী বিক্রম পেতলুরু, চ্যেয়র্মেন এস.এ.তি.সি. অমসুং শ্রী গনেশ তোতেম্পুদি, জর্মনীদা বেজ তৌবা সাইন্তিস্তনা ভর্চ্যুল থৌরম অদুদা শরুক য়াখিবশিংনি।

*****