ইলেক্সন কম্মিসন ওব ইন্দিয়ানা ইলেক্সন কম্মিসনর ওইরম্বদগী পোত্থাদুনা ফিলিপিন্সতা লৈবা মনিলাদা লৈবা এসিয়ান দিবেলপমেন্ত বেঙ্ককী প্রসিদেন্ত ওইনা থৌ পুরগদবা শ্রী অশোক লাবাসাগী কাইনা থৌরম ঙসি পাঙথোকখ্রে। শ্রী অশোক লাবাসানা ২০১৮গী জনুৱারী ২৩দগী ই.সি.আই.গী ইলেক্সন কম্মিসনর ওইনা থৌ পুখিবনি অমসুং মখা তানা ওগস্ত ৩১, ২০২০ ফাওবা ইলেক্সন কম্মিসনগী ওফিস পায়গনি।

মহাকপু বিদাই পীরদুনা, সি.ই.সি. শ্রী সুনিল অরোরানা শ্রী অশোক লাবাসাবু অহেনবা চৌবা থৌ কয়া পুদুনা অমসুং অহেনবা পুন্সিগী খোংথাং কয়া মাই পাক্না থেংনবা ওইনবগীদমক য়াইফ-মঙ্গোল পীখি। ই.সি.আই.দগী চৎখ্রবসু এ.দি.বি.গীদি তোংজবা অমনি হায়রদুনা শ্রী লাবাসাগী হৈথোই শিংথোইবশিং অসি হৌজিক্তি অহেনবা মরোল য়াম্না প্লেৎফোর্ম অমদা অমুক উবা ফংদুনা কোবিদ মতুংগী শেন্মিৎলোন্দা শেমদোক শাদোকপা ঙম্লগনি।

থৌরম অদুদা, ইলেক্সন কম্মিসনর শ্রী সুনিল চন্দ্রনা মহাক্কী ৱারোলদা শ্রী অশোক লাবাসানা শেল-থুম মন্ত্রালয়দা অঙনবা মতমদা তৌরম্বা থবকশিংগীদমক থাগৎপা ফোংদোকখি। মহাক্না শ্রী লাবাসাবু কোবিদকী মতমদা পাঙথোকখিবা মীখলশিংদা মতীক চাবা চৎন-কাংলোন কয়া লৌখৎনবা তাকপী তম্বীরম্বশিংবু পল্লদুনা শিংথাখি।

শ্রী অশোক লাবাসানা হায়খি, মহাক্না কম্মিসন অসিদা চহী অনীগা তংখাই লৈরম্বা মতম অসি কাউবা ঙম্লরোইদবা মীকুপ অমা ওইরগনি। ই.সি.আই.দা মখা তানা থৌ পুদুনা লৈবা নত্ত্রগা এ.দি.বি.গুম্বা মালেমগী ফম্বাক অমদা অমুক থৌ পুরুবা হায়বসিদা খনবদা অরুবা ওইখি হায়না মহাক্না ফোংদোকখি।

কম্মিসন অসিনা দিরেক্তর ইলেক্সন এক্সপেন্দিচর ওইরম্বা দিরেক্তর শ্রী বিক্রম বাত্রানা ইলেক্সন কম্মিসন ওব ইন্দিয়াদা থৌ পুবগী মতম লোইদুনা মহাক্কী কেদরদা অমুক হনখিবদা কাইনা থৌরম পাঙথোকখি।

ইকাইখুম্নজরিবা সুপ্রিম কোর্ত অমসুং তোঙান-তোঙানবা হাই কোর্তশিংনা জনুৱারী ২০১৭দগী মে ২০১৯ ফাওবগী হায়বদি লোক সভা জেনরেল ইলেক্সন ২০১৯ ফাওবগী জজমেন্তশিংগী চেফোং অমা ওইরিবা লেন্দমার্ক জজমেন্তকী ভোল্যুম ৬শুবসু ঙসি ফোংখ্রে। কম্মিসন অসিনা ই ভর্জন ওইনা মীয়াম পুম্বনা উবা ফংজনবগীদমক https://eci.gov.in/ebooks/landmark-judgment/index.html দসু ফোংখি। মসিদা ইলেক্তোরেলগী থৌওং কয়াগী মরমদা হায়বদি নোমিনেসন, এফিদেবিৎ, ই.ভি.এম. ভি.ভি.পি.এ.তি., মোদেল কোদ ওব কন্দক্ত, করপ প্রেক্তিস অমসুং অতোপ্পা মরী লৈনবা হীরমশিংগী মতাংদা মশক থোকপা জজমেন্ত ২৯ য়াওরি। ভোল্যুম অসিদা ই.সি.আই.না ফোংখ্রবা মমাংগী লেন্দমার্ক জজমেন্তকী ভোল্যুম মঙাসু পল্লি। মসিগী মথক্তা, ভোল্যুম অসিদা জেনরেল ইলেক্সন ২০১৯গী মমাংদা ওনরেবল সুপ্রিম কোর্ত অমসুং ওনরেবল হাই কোর্ততা ফাইল তৌরকখিবা কেস ৬৩২সু য়াওরি।

চীফ ইলেক্সন কম্মিসনর শ্রী সুনিল অরোরানা মহাক্কী ৱারোলদা হায়খি, "ঐহাক্না থাজবা থম্লি মদুদি, মসিগী চেফোং অসিনা ঐখোয়বু ইলেক্সনগী আইনশিং দোমেনগী মতাংদা খঙহনলগনি অমসুং মরী লৈনবা ওফিসিএলশিংদা মখোয়গী থবকশিংনা জুদিসিয়ারীবু ইকাইখুম্নবা হেলহনলিবনি হায়বসি খঙজদুনা অচৌবা থৌদাং কয়া পায়খৎনবা পুক্নিং থৌগৎপীরগনি।"

শ্রী অশোক লাবাসা, ইলেক্সন কম্মিসনরনা মহাক্কী ৱারোলদা হায়খি, "ভোল্যুম অসিনা লৈবাক অসিগী পাক চাউরবা মীখলশিংবু কোনশিল্লিবা আইনশিংগী মতাংদা হেন্না ৱাখল লৌশিং পীরগনি।"

 শ্রী সুশিল চন্দ্র, ইলেক্সন কম্মিসনরনা মহাক্কী ৱারোলদা মসিগী ভোল্যুম অসিনা লৈবাক অসিগী মীয়ামদা মীখলগী থৌওংশিংগী মতাং খঙনবা হোৎনবদা কান্নবা পীরগনি হায়না থাজবা ফোংদোকখি।

*****