মন্ত্রী মন্দল অসিদা লৈবিরিবা ঐহাক্কী খোংবুরোই ওইবিরিবা শ্রীমান রাজনাথজী, চীফ ওফ দিফেন্স স্তাফ জেনরেল বিপিন রাৱতজী, সেনাগী ৱিং অহুমগী মকোক, ভারত সরকারগী সুপরিতেন্দেন্ত, ইন্দস্ত্রীগী মরূপ পুম্নমকপু খুরুমজরি।

ভারত্তা দিফেন্স পুথোকপগা শম্নরিবা মরুওইবা স্তেকহোলদরশিং অসি মফম অসিদা লৈবিরিবা অসিদা ঐহাক্না নুংঙাইবা ফোংদোকচরি। সেমিনার অসি পাংথোক্নবগীদমক্তা রক্ষামন্ত্রী রাজনাথজী অমসুং মহাক্কী তীমদা য়াওরিবা পুম্নমক্তা য়াম্না নুংঙাইবা ফোংদোকচরি। ঙসি মফম অসিদা পাংথোক্লিবা ৱাখল চুংশিন্নরিবা অসিদগী ফংবা মহৈনা দিপেন্স পুথোকপগী লমদা আত্মনির্ভরতা ওইহন্নবা ঐখোয়না হোৎনরিবশিং অসিদা শোয়দনা থৌনা হাপকনি, খোংজেল হেনগৎহনগনি অমসুং অদোম পুম্নমক্না হায়বিরকপশিং, ঙসি অদোম্না ৱাখল চুংশিন্নবিরি, মসিনা লাক্কদৌরিবা মতমগী ওইনা য়াম্না কান্নবা পীরগনি।

রক্ষামন্ত্রী শ্রী রাজনাথজীনা মসিগী থবক অসিগীদমক্তা মিশন মোদতা মপুং ওইনা মাই ওনশিনবিরিবা অসিগীদমক্তসু নুংঙাইবা ফাওই। । মখোযগী চোকথবা নীইদ্রবা হোনবশিং অদুগী মরম্না অসুক্কী মতীক ফরবা মহৈ শোইদনা ফংগনি হাযবা ঐহাক্না থাজৈ।

মরূপশিং, ভারত অসি চহি কয়া-কয়াদগী মালেমদা খ্বাইদগী চাউবা দিফেন্স পুশিল্লকপশিংগী মরক্তা অমা ওইরি হায়বসি কনা অমত্তনা খংদবা লৈত্রবনি।  ভারতনা নিং-খা তম্বা ফংখিবা মতমদা দিফেন্স পুথোকপগীদমক্তা ভারত অসি য়াম্না ঙম্বা অমা ওইরম্মি।  মতম অদুদা ভারত্তা চহি ১০০দগী হেন্না লৈরক্লবা দিফেন্স পুথোকপগী ইকোসিস্তেম ওইরম্মি।  অদুগা ভারতকুম্বা থবক তৌবা ঙম্বা অমসুং পোতেন্সিএল লৈবা লৈবাকশিং অসি থোইনা লৈরমদে। অদুবু ভারতকী লাইবক থিবা অমনা চহি কয়াফাওবা হিরম অসিদা খন্নগদবশিং অদু নিংথিনা খন্নবিরমদবনি।  মখল অমদা মসি মতম নাইনা পাংথোকপা থবক ওইরে, লুনা অমত্তা খন্নবিরমদ্রে। অদুগা ঐখোয়গী মতুংদা হৌদোকখিবা লৈবাক কয়ানসু চহি ৫০গী অসিদা ঐখোয়দগী য়াম্না হেন্না মাংজিল থাখ্রে। অদুবু হৌজিক্তি ফীভম অসি হোংলে।

ঐখোয়না হোৎনরিবা সেক্তর অসিগা মরি লৈনবা অপনবা খুদিংমক থুগাইনবা লেপ্তনা হোৎনরি হৌখিবা চহি খরসিদা অদোম্না খংবিরম্লগনি। ঐখোয়গী পান্দম অসি ভারত্তা মেনুফেকচরিং অসি চাউখৎহনবা, অনৌবা তেক্নোলোজীশিং অসি ভারত্তা শেমগৎপা অমসুং প্রাইভেৎ সেক্তরদা মসিগী লম অসিদা অদুক্কী মতীক পাকথোক-চাউথোকহনবনি। অমদি মসিগী লাইসেন্সিংগী থবক চত্থবা অসি ফগৎহনবা, লেভেল প্লেয়িং ফীল্দ শেমগৎপা, এক্সরপোর্তকী থবক চত্থবগী মওং অসি লাইথোকহনবা, ওফসেতকী থৌরাংশিং ফগৎহন্নবনচিংবা থবক কয়া পায়খৎখ্রে।

মরূপশিং, ঐহাক্না খঞ্জবদা মসিগী খোংথাংশিং অসিদগী হেন্না মরুওইবা অসি দিফেন্সকী সেক্তরদা লৈবাক অসিগী অনৌবা ৱাখল্লোন অসি ঐখোয় খুদিংমক্না উবা ফংলি, অনৌবা ৱাখল্লোন অমা থোরক্লি। অনৌবা অমসুং আত্মনির্ভর ভারত ওইহন্নবগীদমক্তা দিফেন্স সেক্তরদা ইশানা থাজবগী ৱাখল্লোন অসি তঙাই ফদবা ওইরে।  শাংলবা মতমদগী চীফ ওফ দিফেন্স স্তাফ খন্ননবা ৱা খন্নখি অদুবু ৱারেপ লৌবা ঙমদ্রি। মসিগী ৱারেপ অসিনা অনৌবা ভারতকী মশানা থাজবা থম্বগী খুদম্নি।  

অসুক কুইরবা মতম ফাওবা দিফেন্স পুথোকপদা মীরৈবাক্না ইনভেস্ত তৌবদা অয়াবা ফংখিরমদে। ইকাইখুম্ননিংঙাই ওইরবা অতলজীগী সরকারগী মতমদা অনৌবা থৌরাংশিং হৌদোকখি। ঐখোয়গী সরকার অসিনা লাক্লবা মতুংদা মসিদা হেন্না ফগৎহনখ্রে অমসুং হৌজিক অহানবা ওইনা সেক্তর অসিদা চাদা ৭৪ ফাওবা এফ.দি.আই. অসি ওতোমেতিক ওইবা মওংদা লম্বি অসি হাংলক্লি। মসি অনৌবা ভারতকী মশানা থাজবা থম্বগী মহৈনি।

চহি কয়াদগী ওর্দনান্স অসি ইন্দস্ত্রীশিংদা সরকারগী বিভাগশিংগুম্না থবক পাংথোকহল্লমখি। অকক্নবা ভিজনগী মরম্না লৈবাক অসিদা অমাং-অতাশিং থোকখ্রে, মফমদুদা থবক তৌরিবশিংদা লৈরম্বা হৈ-শিংবা, অচেৎপা ৱাশক, হোৎনবা কনবা এক্সপরিএন্সনা থল্লবা হোৎনবা কল্লবা লেবরগী কাংলুপশিং অসিদা অদুক্কী মতিক অমাংবা ওইহনখ্রে।

সেক্তর অসিদা মীওই কোতী কয়ানা থবক ফংনবগী খুদোংচাবা লৈরম্বা অদুদা ইকোসিস্তেম অসি অকক্নবদা লৈখ্রে। হৌজিক ওর্দনান্স অসি ইন্দস্ত্রীশিংদা কোর্পোরেতিজেসন তৌনবগী মায়কৈরোমদা ঐখোয়না মমাং থানা চংশিল্লি। মসিগী চত্থবা থবক অসি মপুং ফানা পাংথোক্নবা মতুংদা লেবরশিং অমসুং সেনা অনিমক্কী থৌনা ফংগনি। মসি অনৌবা ভারতকী মশানা থাজবা থম্বগী মহৈনি।  

মরূপশিং, দিফেন্স পুথোকপদা আত্মনির্ভরতা ওইহন্নবগী ঐখোয়গী অচেৎপা ৱাশক অসি শুপ্নতগী ৱারী শান্নবখক্তা নত্রগা চেশিংখক্তনা লোইশিনগদবা নত্তে।  মসি থবক ওইনা পাংথোক্নবগীদমক্তা থবক মথং-মতং পায়খৎলি।সি.দি.এস. শেম্লবা মতুংদা সেনাগী ব্রাঞ্চ অহুমদা প্রোক্যুর্মেন্তশিংদা নিংথিনা তেংবাং পীনখি, মসিদগী দিফেন্সকী ইক্বিপমেন্তশিং লৈবা অসি হেনগৎহনবদা মতেং ফংলি। লাক্কদৌরিবা মতম অসিদা ইরমগী ইন্দস্ত্রীশিংগী ওইনা ওর্দরশিংগী সাইজ অসিসু হেনগৎলগনি। মসি ওইহন্নবগীদমক্তা রক্ষা মন্ত্রালয়গী কেপিতেল বজেৎকী শরুক অসি হৌজিক ভারত্তা শাবা খুৎলায়শিংগী ওইনা তোঙান্না থমখ্রে।

দিফেন্সকী আইতেম ১০১ অসি মপুং ওইনা ইরমগী ওইনা লৈনবগীদমক্তা শোই-ঙামহন্দনা তৌখ্রে হায়বসি অদোম্না হন্দক্তা উবিরম্লগনি। লাক্কদৌরিবা মতম খরসিদা মসিগী লিস্ত অসি হেন্না পাকথোক-চাউথোকহল্লগনি, মসিদা অতৈ আইতেমশিং অদুম হাপচিনগনি। মসিগী লিস্ত অসিগী পান্দমদি ইম্পোর্ত তৌরকপা থিংবদা নত্তনা ভারত্তা ইন্দস্ত্রীশিং অসি পুক্নিং থৌগৎনবা খোংথাং লৌখৎখ্রে।  মসিদগী অদোম মরূপশিংনা প্রাইভেৎ সেক্তর ওইরো, এম.এস.এম.ই.ওইরো, স্তার্ত অপ ওইরো পুম্নমক্কী ওইনা সরকারগী ৱাখল্লোন অমদি তুংদা ওইরক্কদবশিং অসি হৌজিক অদোমগী মাংদা ময়েক শেংনা লৈরে।

মসিগা লোয়ননা প্রোক্যুর্মেন্তকী চত্থবা থবক অসি হেন্না কনখৎহন্নবগীদমক্তা তেস্তিংগী থৌরাং অসি স্ত্রীমলাইন ওইহন্নবগীদমক্তা ক্বালিতী মথৌ তাবশিং অসি রেস্নেলাইল তৌনবগীদমক্তসু লেপ্তনা থবক পাংথোক্লি। অদুগা হোৎনরিবশিং অসিদা সেনাগী ব্রাঞ্চ অহুমসিদা অদুক্কী মতিক তেংবাং পীনবগী মওংদা মতেং য়াম্না ফংলি, মখল অমা ওইনা প্রো-এক্তিব ওইনা থৌদাং লৌরি।

মরূপশিং, অনৌবা খুৎলায়শিং অসিদা আত্মনির্ভরতাগীদমক্তা তেক্নোলোজী অসি থাক ৱাংখৎহনবগী মথৌ তাই। হৌজিক শারিবা খুৎলায়শিং অসিগী মথংগী মরোল অমা শেগৎনবগীদমক্তসু থবক তৌবগী মথৌ অমসুং মসিগীদমক্তা দি.আর.দি.ও. নত্তনা প্রাইবেৎ সেক্তরদা অমসুং একাদমিক ইন্সতিত্যুসন্দসু রিসর্চ অমসুং ইনোবেসন অসি পুক্নিং থৌগৎলি।  তেক্নোলোজী ত্রান্সফরগী খুদোংচাবদগী ফোরেনগী পার্তনরশিংগা জোইন্ত ভেঞ্চরশিংদগী কো-প্রদক্সনগী মোদেল অসিদা পাঙ্গল হাপ্লি। ভারতকী কৈথেলগী সাইজ অসি য়েংলগা ঐখোয়গী ফোরেন পার্তনরশিংগী ওইনা  হৌজিক ভারত্তা খক্তমক প্রদক্সন তৌবা অসি খ্বাইদগী অথোইবা ওপ্সন্নি।  

মরূপশিং, ঐখোয়গী সরকারনা হেক হৌবদগী রিফোর্ম, পর্ফোর্ম অমসুং ত্রান্সফোর্ম তৌনবগী লাইশোন অসি শোন্দুনা ঐখোয়না থবক তৌরি। রেদ তেপিজম হন্থহনবা অমসুং রেদ কার্পেৎ থানবা ঐখোয়না হোৎনরি। লল্লোন-ইতিক তৌবা লায়হন্নবগীদমকর্তা ২০১৪দগী হৌজিক ফাওবদা ফগৎহল্লক্লিবশিং অসিগী মহৈ মালেম পুম্বনা উনরে। ইন্তলেকচুএল প্রোপর্তী, তেক্সেসন, ইন্সোলভেন্সী অমসুং বেঙ্করপসী, স্পেস অমসুং এতোমিক নর্জীগম্বা লুরবদগী লুরবা হিরমশিংনি হায়না খন্নরম্মি, হিরমশিং অসিদসু ঐখোয়না রিফোর্ম তৌদুনা উবা ফংহনখ্রে। অদুবু হৌজিক্তি লেবর লোশিংদা রিফোর্মশিং মথং-মথং থবক তৌবা হৌখিবা অসি লেপ্তনা চত্থরি হায়বসি নিংথিনা খংবিরে। 

চহি খরগী মমাপাওবা অসিগুম্বা হিরমশিং অসিগী মতাংদা খনবফাওবা খন্নরমদে। অদুবু ঙসি রিফোর্মশিং অসি পাংথোকপা ঙমখ্রে। রিফোর্মসিংগী থবক চত্থবা হৌখিবা অসি লেপ্লরোই, ঐখোয় অসুম মমাংলোমদা চংশিল্লগদবনি। মরম অসিনা লেপ্পসু লেপহল্লরোইদবনি অমদি চোকথবসু চোকথরোইদবনি; ঐনসু চোকথরোইদবনি অমসুং অদোম্নসু চোকথবিরোইদবনি। ঐখোয়না তুংদসু মমাং থানা চংশিনগদবনি অমসুং ঐখোয়গী মায়কৈদগী ঐহাক্না মসি ঐখোয়গী ৱাশক্নি হায়বসি ঐহাক্না হায়জরি।  

মরূপশিং, দিফেন্স কোরিদোরদা য়াংনা থবক চংশিল্লিবা ইনফ্রাস্ত্রকচরগী ৱাফম অসি উত্তর প্রদেশ অমসুং তমিল নাদুগী সরকারশিংনা পুল্লগা স্তেত ওফ আর্ত ইনফ্রাস্ত্রকচর অসি শেমগদৌরে। মসিগীদমক্তা লাক্কদৌরিবা চহি মঙাগী ওইনা লুপা কোতী লিশিং ২০ ইনভেস্ত তৌনবা পান্দম থমখ্রে। এম.এস.এম.ই. অমসুং স্তার্ত-অপশিংগা মরি লৈনবা ওন্তর্প্রিন্যুরশিং অসি পুক্নিং থৌগৎনবগীদমক্তা আই.দি.ই.এক্স.গী খোংথাং লৌখৎখ্রিবা অসিদগীসু অফবা মহৈ ফংলি। প্লেৎফোর্মগী থোংদগী স্তার্ত-অপ ৫০দগী হেনবা সেনাগী ইন্দস্ত্রীশিংগী ওইনা তেক্নোলোজী অমসুং প্রদকশিং অসি শেমগৎখ্রে।

মরূপশিং, ঐহাক্না অদোমদা ৱাপম অমা থম্মোই শেংনা থম্বা পামজৈ। আত্মনির্ভর ভারতকী ঐকোয়গী ৱাশক অসি মনিংলোমদা য়েংবগী মওং নত্তে।  মালেমগী শেন্মিৎলোন অসি  হান্নগী মওংদা লৈহন্নবগীদমক্তা হেন্না তুং-কোইনা লৈনবগীদমক্তা মালেমদা ইং-তপ্না লৈনবগীদমক্তা মতিক ময়াই শুনা লৈবা ভারত অমা ওইহন্নবগী পান্দম্নি। মসিগী ৱাখল্লোন অসিনা দিফেন্স মেনুফেকচরিংদা আত্মনির্ভরতা ওইহন্নবগীদমক্তসুনি।  ভারত্তা মাগা মরূপ ওইনরিবা লৈবাকশিংগীদমক্তা খুৎলায়শিংগী থাজবা য়াবা সপ্লায়র অমা ওইহনবা ঙম্মি। মসিদগী ভারতকী স্ত্রেতিজিক পার্ত্নরশিপ অসিদা হেন্না কনশিলহল্লগনি অমসুং হিন্দ মহাসাগরগী সেক্তরদা ভারতকী অপুনবা সেক্যুরিতী পীবগী থৌদাং অসি হেন্না  কনখৎহল্লগনি।

মরূপশিং, সরকারনা হোৎনরিবা অমসুং অচেৎপা ৱাশক ঙাক্লিবা অসি অদোমগী মাংদা লৈরে। হৌজিক আত্মনির্ভর ভারতকী ৱাশক অসি ঐখোয় পুন্না মপুং ফাহনগদবনি।  প্রাইভের সেক্তর ওইরো নত্রগা পব্লিক সেক্তর ওইরো নত্রগা ফোরেন পার্ত্নর্স ওইরো আত্মনির্ভর ভারত অসি পুম্নমক্কী ওইনা মায় পাক্নবগী ৱাশক্নি। মসিগীদমক্তা অদোম্না হেন্না অফবা ইকোসিস্তেম পীনবগীদমক্তা ঐখোয়গী সরকারনা চপ-চানা লেম্লি।

মফমসিদা অদোমগী মায়কৈদগী থম্লকপা ৱাফমশিং অদু নিংথিনা পাংথোক্লগনি। অদুগা ঐঙোন্দা দিফেন্স প্রদক্সন অমসুং এক্সপোর্ত প্রমোসন পোলিসীগী দ্রাফ অসি স্তেকহোল্দরশিংগা লোয়ননা ৱা ফাওদোক্নখ্রে। অদোমগী ফীদবেক্তগী মসিগী পোলিসী অসি থুনা চৎনহনবদা মতেং ফংলগনি। মসিগী সেমিনার অসি অমু্ক্তং পাংথোকপা থৌরম অমা ওইনা লৈহন্দনা মতুংদসু পাংথোকহনবগীসু মথৌ তাই। ইন্দস্ত্রী অমসুং সরকারগী মর্তা লেপ্তনা ৱা তাথোক-তাসিন তৌনবা অমসুং ফীদমবেক পীবগী মশাগী মওং অমা ওইহনগদবনি।

অসিগুম্না পুন্না হোৎনমিন্নবশিং অসিনা ঐখোয়গী ৱাশক অসি মপুং ফাহনবা ঙমগনি হায়বসি ঐহাক্না থাজৈ। ঐহাক্না অমুক হন্না অদোম্না মতম কাইথোকপিরিবা, আত্মনির্ভর ভারত ওইহন্নবগীদমক্তা পুন্না চংশিনমিন্নরিবা অসিনা ঙসি শক্কদৌরিবৈ ৱাশক অসি মপুং ফাহনবদা ঐখোয় পুম্বনা থৌদাং নিংথিনা লৌগনি হায়বসি ঐহাক্না থাজৈ।

ঐহাক্না অমুক হন্না অদোম পুম্নমক্তা য়াইফ পাউজেল পীজরি।

 হন্ন-হন্ন থাগৎচরি।

*****