ਵਣਜ ਤੇ ਉਦਯੋਗ ਮੰਤਰੀ ਸ਼੍ਰੀ ਪੀਯੂਸ਼ ਗੋਇਲ ਨੇ ਅੱਜ ਸੂਬਿਆਂ ਦੇ ਉਦਯੋਗ ਮੰਤਰੀਆਂ, ਕੇਂਦਰ ਸ਼ਾਸਤ ਪ੍ਰਦੇਸ਼ਾਂ ਦੇ ਪ੍ਰਸਾਸਕਾਂ ਤੇ ਕੇਂਦਰ ਤੇ ਸੂਬਾ ਸਰਕਾਰਾਂ ਦੇ ਉਚ ਅਧਿਕਾਰੀਆਂ ਨਾਲ ਵਰਚੂਅਲ ਮੀਟਿੰਗ ਕੀਤੀ । ਇਸ ਮੀਟਿੰਗ ਦੌਰਾਨ ਦੇਸ਼ ਵਿੱਚ ਉਦਯੋਗਿਕ ਉਤਪਾਦਨ ਵਧਾਏ ਜਾਣ, ਸਰਮਾਏਕਾਰੀ ਨੂੰ ਅਕਰਸ਼ਿਤ ਕਰਨ, 'ਇੱਕ ਜਿਲਾ ਇੱਕ ਵਸਤੂ' ਪਹੁੰਚ ਨੂੰ ਅੱਗੇ ਤੋਰਨ ਤੇ ਆਤਮ ਨਿਰਭਰ ਭਾਰਤ ਪ੍ਰਤੀ ਇੱਕ ਕੌਮੀ ਲਹਿਰ ਨੂੰ ਹੱਲਾਸ਼ੇਰੀ ਦੇਣ ਵਰਗੇ ਮੁਦਿਆਂ ਤੇ ਚਰਚਾ ਕੀਤੀ ਗਈ।
ਸ਼੍ਰੀ ਪੀਯੂਸ਼ ਗੋਇਲ ਨੇ ਜੀ ਆਈ ਐਸ-ਅਧਾਰਤ ਭੂੰਮੀ ਬੈਂਕ ਸਿਸਟਮ ਦੀ ਈ-ਸ਼ੁਰੂਆਤ ਕੀਤੀ। ਇਹ ਸਿਸਟਮ ਉਦਯੋਗਿਕ ਸੂਚਨਾ ਪ੍ਰਣਾਲੀ ਨੂੰ ਸੂਬਾ ਜੀ ਆਈ ਐਸ ਪ੍ਰਣਾਲੀਆਂ ਨਾਲ ਜੋੜ ਕੇ ਵਿਕਸਤ ਕੀਤਾ ਜਾ ਰਿਹਾ ਹੈ। ਅੱਜ ਇਹ ਪ੍ਰਾਜੈਕਟ 6 ਸੂਬਿਆਂ ਲਈ ਸ਼ੁਰੂ ਕੀਤਾ ਗਿਆ। ਸਿਸਟਮ ਨੂੰ ਲਾਂਚ ਕਰਦਿਆਂ ਸ਼੍ਰੀ ਗੋਇਲ ਨੇ ਭਰੋਸਾ ਪ੍ਰਗਟ ਕੀਤਾ ਕਿ ਹੋਰ ਸੂਬੇ ਤੇ ਕੇਂਦਰ ਸ਼ਾਸਤ ਪ੍ਰਦੇਸ਼ ਦਸੰਬਰ 2020 ਤੱਕ ਇਸ ਸਿਸਟਮ ਨਾਲ ਜੁੜ ਜਾਣਗੇ। ਉਨਾ ਕਿਹਾ ਕਿ ਇਹ ਇੱਕ ਛੋਟਾ ਨਮੂਨਾ ਹੈ ਅਤੇ ਇਸ ਨੂੰ ਸੂਬਿਆਂ ਤੋਂ ਸੁਝਾਅ ਮਿਲਣ ਉਪਰੰਤ ਭੂੰਮੀ ਦੀ ਸ਼ਨਾਖਤ ਤੇ ਖਰੀਦ ਕਰਨ ਲਈ ਇੱਕ ਕਾਰਗਰ ਤੇ ਪਾਰਦਰਸ਼ੀ ਤੰਤਰ ਵਜੋਂ ਵਿਕਸਿਤ ਕੀਤਾ ਜਾਵੇਗਾ।
ਆਪਣੇ ਸੰਬੋਧਨ ਵਿੱਚ ਸ਼੍ਰੀ ਗੋਇਲ ਨੇ ਦੇਸ਼ ਵਿੱਚ ਉਦਯੋਗਿਕ ਸਰਗਰਮੀਆਂ ਨੂੰ ਵਧਾਉਣ ਲਈ ਸੂਬਿਆਂ ਨੂੰ ਟੀਮ ਇੰਡੀਆ ਦੀ ਭਾਵਨਾ ਨਾਲ ਕੰਮ ਕਰਨ , ਸਰਮਾਏਕਾਰੀ ਨੂੰ ਅਕਰਸ਼ਿਤ ਕਰਨ, 130 ਕਰੋੜ ਲੋਕਾਂ ਨੂੰ ਬੇਹਤਰ ਜੀਵਨ ਦੇਣ ਅਤੇ ਅਗਲੀਆਂ ਪੀੜੀਆਂ ਨੂੰ ਰੌਸ਼ਨ ਭਵਿੱਖ ਦੇਣ ਦਾ ਸੱਦਾ ਦਿੱਤਾ। ਉਨਾ ਕਿਹਾ ਕਿ ਆਤਮ ਨਿਰਭਰ ਭਾਰਤ ਨੂੰ ਇੱਕ ਸਵੈ ਨਿਰਭਰ ਦੇਸ਼ ਵਜੋਂ ਦੁਨੀਆਂ ਨਾਲ ਭਰੋਸੇ ਤੇ ਮਜ਼ਬੂਤੀ ਵਾਲੀ ਸਥਿਤੀ ਤੋਂ ਆਪਣੇ ਸਰੋਕਾਰ ਵਧਾਉਣੇ ਹੋਣਗੇ। ਉਨਾ ਕਿਹਾ ਕਿ ਭਾਰਤ ਨੂੰ 5 ਸਾਲਾਂ ਵਿੱਚ 5 ਟ੍ਰਿਲੀਅਨ ਡਾਲਰ ਦਾ ਅਰਥਚਾਰਾ ਬਣਾਉਣ ਦਾ ਟੀਚਾ ਹਾਸਲ ਕਰਨਾ ਹੈ।
ਵਣਜ ਤੇ ਸਨਅਤ ਰਾਜ ਮੰਤਰੀ ਸ਼੍ਰੀ ਸੋਮ ਪ੍ਰਕਾਸ਼ ਨੇ ਕਿਹਾ ਕਿ ਭਾਰਤ ਨੂੰ ਫੈਕਟਰੀ ਉਤਪਾਦਨ ਦਾ ਧੁਰਾ ਬਣਾਉਣ ਤੇ ਸਰਮਾਏਕਾਰੀ ਅਕਰਸ਼ਿਤ ਕਰਨ ਲਈ ਸੂਬਿਆਂ ਨੂੰ ਅਹਿਮ ਭੂਮਿਕਾ ਨਿਭਾਉਣੀ ਹੋਵੇਗੀ। ਉਨਾ ਸੂਬਿਆਂ ਨੂੰ ਹਰੇਕ ਜਿਲੇ ਦੀ ਉਸ ਵਸਤੂ ਦੀ ਸ਼ਨਾਖਤ ਕਰਨ ਲਈ ਕਿਹਾ ਜਿਸ ਨੂੰ ਪ੍ਰੋਤਸਾਹਤ ਕੀਤਾ ਜਾ ਸਕਦਾ ਹੈ।

ਵਾਈਬੀ/ਏਪੀ