ভারতকী উপ-রাস্ত্রপতি শ্রী এম. বেঙ্কয়া নাইদুনা লাক্কদৌরিবা মতমশিং অসিদা ভারতপু আত্মানির্ভর ওইহন্নবা নহাশিংদা ওন্তোপ্রিনরেল তেলেন্তশিং য়োকখৎনবা হায়খ্রে। মহাক্না ঐখোয়না লৈবাক মীয়াম পুম্বগী মীওইশিংগী ওন্তোপ্রিনরেল তেলেন্তশিং অমসুং তেক্নোলোজীদা লৈরিবা হৈ-শিংবশিং অসি শিজিন্নদুনা ঐখোয়গী লৈজরিবা রিসোর্সশিং অসিগী মতেংনা মীওইবা খুন্নাইবু তেংবাংগদবনি হায়খি।

অচার্য় বিনোবা ভাবেনা গান্ধীজিগী ৱাখল্লোনবু খুন্নাই চাউখৎনবদা তেংবাংখিবা অমসুং ভুদান ইহৌ হৌদোকখিবগী মতাংদা পাঙথোকপা ৱেবিনার অমদা মহাক্না ৱা ঙাংখিবনি।

বিনোবাজি অমসুং গান্ধীজিনা মঙলম্বা সশাক্তা ভারত, স্বাভিমান ভারত অমসুং আত্মানির্ভর ভারত অমা শেম্বগী মতাংদা ৱা হৌদোক্লদুনা উপ-রাস্ত্রপতিনা হায়খিবদা ভারতকী মরোমদোম লেপচবা হায়রিবা ৱাখল্লোন অসি ঐখোয়গী লৈবাক্কী খক্তা খনবা নত্তে অদুবু মালেমগী য়াইফ য়ুম্বালগীদমক্তা মরু ওইবা খোঙলোই অমা ওইবা ঙম্নবনি হায়খি।

মহাত্মা গান্ধীগী মতম নাইদ্রবা ৱাখল্লোনগী মতাংদা পল্লদুনা শ্রী নাইদুনা গান্ধীজিনা ঐখোয়গী লমজিং মৈরা ওইরি মরমদি মহাক অসি মতম পুম্বদা চাংয়েং তৌদুনা অনৌবা থৌওং পুথোকপা মীওইনি হায়না হায়খি।

গান্ধীজিনা শোকপদা মাংই হায়না লৌনরম্বা খ্বাইদ্গী অকনবা খুদোংচাদবা কয়াগী মতাংদা থবক পায়খৎপগী থৌনা লৈরম্মি হায়না মহাক্না হায়খি। “ঐখোয়না মহাক্কী পুকচেল শেংবা, থমোয় শেংবা অমসুং মহাক্না সেবা তৌজরিবা মীওইশিংগী য়াম্না খনবীবা মতৌ অসিগীদমক্তা ইকায় খুম্নরি”, হায়না মহাক্না মখা তানা হায়খি।

হরিজন সেবক সংঘ অসি মহাত্মা গান্ধীনা য়াম্না থাজবা পুনা এক্তকী ইথিলদগী ইং ১৯৩২দা হৌদোকখি অমসুং মঙোন্দদি পুনা পেক্ত অসি শোত্থরবা মীওইশিংগী পুন্সিবু থাক ৱাংনা পুখত্তুনা মখোয়গী ফংফম থোকপা অচুম্বা ৱায়েল অমসুং ইকায় খুম্নবা পীনবা পাম্বৈ অমনি হায়না খনখি হায়না শ্রী নাইদুনা হায়খি।

ঐখোয়গী নিং-তম ইহৌ অসি শুপ্নতগী রাজনিতীগী ইহৌ অমা নত্তা, মসিদি লৈবাকপু নৌনা শেমগৎপা অমসুং সোসিও-কলচর য়াহৌবনি হায়না শ্রী নাইদুনা হায়খি। মীয়াম পুম্ববু মপাঙ্গল হাপ্পা অসি নিংতম ইহৌগী মচং অমনি হায়বগী মহাক্না থাজবা লৈ হায়খি অমসুং গান্ধীজিনা ভারতপু লোইলম লৈঙাক্কী মায়োক্তা পুন্না লৈবা, ঐখোয়গী নাৎ, লোলদা চাউথোকচবা ফাওজবা অমসুং ঐখোয়গী মাংখ্রবা পাঙ্গলবু নৌহৌননা অমুক ফংবগী ৱাখল্লোনগা লোয়ননা মীয়াম পুম্ববু লৈহন্নিংঙম্মি।

অচার্য় বিনোবা ভাবেবু গান্ধীজিগী অচানবা শেবোক্নি হায়রদুনা শ্রী নাইদুনা মহাক্না ভারতকী মচা ওইবগী ৱাখল্লোন্দা থাজবা থম্মি অমসুং অতোপ্পা মীওইশিংদা নুংশি-চাননা তৌবগী মওং চেনবগা লোয়ননা কত্থোকপা অমসুং মীওইবগী সেবা তৌবগী ইথিলসু চেল্লি হায়খি।

অচার্য় বিনোবা ভাবেগী ভুদান ইহৌগী মতাংদা ৱা ঙাংলদুনা উপ-রাস্ত্রপতিনা হায়খিবদা গান্ধীজিগা য়াম্না মান্নবা ওইনা বিনোবাজিনা নম-হাবা, খৎন-চৈনবা তৌদনা অহোংবা পুরক্নবা হোৎনখি অমসুং মীয়াম্না শরুক য়ারবদি অফবা ৱাখল্লোন, তুংকোইনা লাকপা অহোংবা পুরকপা ঙম্মি হায়বসি থবক ওইনা পাঙথোকখি।

বিনোবাজিনা চহি ১৪গী মনুংদা অপুনবা কিলোমীতর ৭০০০০গী অরাপ্পা খোঙনা চৎখিবা অদুগী মহৈ ওইনা লম লৈজদবা লৌউবশিংগীদমক্তা লৌ উনবা অপুনবা একর লাখ ৪২গী লম কৎলকখিবা থৌদোক অদু পল্লদুনা শ্রী নাইদুনা হায়খিবদা পোচম্পল্লিগী শ্রী বেদিরেরাম চন্দ্র রেদ্দীনা বিনোবাজিগী থৌওং অসিগী পাউখুম ওইনা মশাগী লম একর ১০০ পীখিদুনা লম কৎলকখিবা অহানবা মীওই ওইখি হায়খি।

বিনোবাজিগী সর্বোদয়া ইহৌ অমসুং গ্রামদনগী ৱাখল্লোন্না গান্ধীগী খুঙ্গং নৌনা শেমগৎপা অমসুং থাক ৱাংনা পুখৎপগী ৱাখল্লোনবু খুদম ওইনা উৎখিবগী থৌওং পল্লদুনা শ্রী নাইদুনা মীওইবগী অফবা মগুন্দা থাজবা অমসুং ইনাকখুনবশিংনা মখোয়গী মরন-মথুম্বু লৈত লাইরশিংদা তেংবাংবা হায়বসি খোঙজংশিং অসিগী ময়ায় ওইবা ৱাখল্লোন্নি হায়খি। “থৌওং অসি খুঙ্গংগী সোসিও-ইকোনোমিক থাক ৱাংহনবগী খুৎশম্ননা পাঙথোকপা পথাপ অমনি”, হায়না মহাক্না মখা তানা হায়খি।

শ্রী নাইদুনা হায়খিবদা বিনোবাজি অসি মীয়ামগী খুন্নাই অমসুং শেন্মিৎলোনগী হীরমদা অফবা পুরক্নবা পাউতাক পীখিবা লৈবাক নিংবা মীওইশিংগী শাংলবা পরিংগী মনুংদা চনবা মীওই অমনি হায়খি। মহাক্কী ১২৫শুবা মপোক কুমওন পাঙথোকপগী মওংদি ঐখোয়গী অপুনবা মীশিংগী ৬০%গী শরুক ওইরিবা খুঙ্গংগী অপুনবা মীওইশিংনা পুন্না থবক পায়খৎমিন্নবগী থৌওংনা খ্বাইদগী চান্নবা মওং ওইগনি হায়খি। শ্রী নাইদুনা নহাশিংদা অফাওবা লুচিংবশিংগী পুন্সি অমসুং থবক্কী মরমদা তাকপীবগী তঙাই ফদবগী মতাংদসু পনখি।

উপ-রাস্ত্রপতিনা কাস্ত, ধর্ম অমসুং মফম নাইদনা মান্নবা মওংদা চাউখৎমিন্নবা অমসুং মীওইশিংবু মখোয়গী খুন্নাই অমসুং শেন্মিৎলোনগী ফিভমদা য়েংদনা মীওই অমনি হায়না য়েংবগী থৌওংদা মিৎয়েং চংগদবনি হায়খি। খুন্নাই অমসুং শেন্মিৎলোন্দা মান্নবা পুরক্নবা সরবোদয়া অমসুং অন্তোদয়া অসি তঙাই ফদে হায়না মহাক্না মখা তানা হায়খি।

কোবিদ-১৯গী হকশেলগী তঙাইফদবশিংগী মরমদা পল্লদুনা শ্রী নাইদুনা হৌজিক ওইরিবা লুরবা তাঞ্জা অসিদা ঐখোয়না অমত্তা ওইনা পুন্দুনা ভাইরস শন্দোকপা থিংমিন্নবতা নত্তনা লোকদাউন্না শোকহল্লবা মীওইশিংসু গান্ধীগী ৱাখল্লোনগী তুং ইন্দুনা তেংবাংগদবনি হায়খি। “মীওইবগী পুক্নিংনা অসিগুম্বা মতম অসিদা অতোপ্পা মীওইবু তেংবাংবগী খ্বাইদগী নীংথিবা মওং পুরকপা ঙম্মি” হায়না মহাক্না মখা তানা হায়খি।

শ্রী নাইদুনা মখা তাদুনা হায়খিবদা অসিগুম্বা মতম অসিদা ঐখোয়না সরকারগী নত্তবা লুপশিংনা পাঙথোকপা থবকশিংবু শিংথানগদবনি অমসুং ঐখোয়গী দাক্তরশিং, পেরামেদিকশিং, ঐখোয়গী সেক্যুরিতীগী মীওইশিং অমসুং ঐখোয়বু তেক্ত কায়দনা লৈহল্লিবা অতোপ্পা মীওইশিংবুসু মখোয়গী কত্থোকপগী থৌওংশিং অসিবু শক খঙগদবনি হায়খি। ঐখোয়গী চানবা ৱাৎহন্দ্রিবা লৌউবশিংবুসু ঐখোয়না কাওরোইদবনি হায়না মহাক্না হায়খি।

থৌরম অদুদা হরিজন সেবক সংঘগী প্রসিদেন্ত দাঃ সঙ্কর কুমার সনয়াল অমসুং লুপ অসিগী সেক্রেতরীদাঃ রজনিশ কুমারসু শরুক য়াখি।

মখাদা পীরিবা অসি মহাক্কী অপুনবা ৱারোলনিঃ

অচার্য় বিনোবা ভাবেনা গান্ধীজিগী ৱাখল্লোনবু খুন্নাই চাউখৎনবদা তেংবাংখিবা অমসুং ভুদান ইহৌ হৌদোকখিবগী মতাংদা পাঙথোকপা ৱেবিনার অসিদা ঐহাক্না ময়ামগা পুনবা অসিদা নুংঙাইবা ফাওই।

হরিজন সেবক সংঘনা সন্ত বিনোবাজিগী ১২৫শুবা মপোক নুমিৎকী শঙ্গাবগী থৌওং ওইনা থৌরম অসি পাঙথোকপদা ঐহাক্কনা ৱাখল নুংঙাইবা ফাওই। মমাংগী চহিদা মহাত্মা গান্ধীগী ১৫০শুবা মপোক কুমওন পাঙথোকপা ওইনা ঐখোয়না ইশাবু মহাক্কী ছ্বছাতা মিসন্দা কত্থোকখি। হন্দক্কী চহিদনা মহাক্কী লাইনিং লাইশোলদা থৱাই লুপ্পা মখা তাবা সন্ত বিনোবাজিগী মপোক কুমওন পাঙথোক্লি।

হরিজন সেবক সংঘনা “অনৌবা য়ুগতা গান্ধী” অমসুং “বিনোবা জি”গী মতাংদা মখোয়গী ৱারোলশিংবু গ্রাস রুত লেবেলদা পুরক্নবা ৱেবিনার কয়াগী থৌরাং তৌরিবা অসিদা য়াম্না নুংঙাইবা ফাওই।

মহাত্মা গান্ধীগী ৱাখল্লোন অসি লাক্কদৌরিবা মতম শাংলবা কয়া ফাওবদা ঐখোয়গী থমোয়দা য়ৈদুনা অদুম লৈখিগনি হায়বগী ঐহাক্না থাজবা লৈ।

মসি মহাক্কী মতম নাইদ্রবা অচুম্বা থীবা অমসুং হিংশা তৌদবা, শান্তি লৈনা অমগা অমগা লৈমিন্নবা অমসুং তুং কোইবা চাউখৎপা পুরক্নবা হোৎনখিবা থৌদাংশিং অদুননি।

গান্ধীজিনা চাংয়েংগা লোয়ননা অনৌবা থৌওং কয়া পাঙথোকখিবা অসিগী মরম্না মহাক অসিগী ঐখোয়গী লমজিং মৈরা ওইরি।

গান্ধীজিনা শোকপদা মাংই হায়না লৌনরম্বা খ্বাইদ্গী অকনবা খুদোংচাদবা কয়াগী মতাংদা থবক পায়খৎপগী থৌনা লৈরম্মি। ঐখোয়না মহাক্কী পুকচেল শেংবা, থমোয় শেংবা অমসুং মহাক্না সেবা তৌজরিবা মীওইশিংগী য়াম্না খনবীবা মতৌ অসিগীদমক্তা ইকায় খুম্নরি।

হরিজন সেবক সংঘ অসি মহাত্মা গান্ধীনা য়াম্না থাজবা পুনা এক্তকী ইথিলদগী ইং ১৯৩২দা হৌদোকখি অমসুং মঙোন্দদি পুনা পেক্ত অসি শোত্থরবা মীওইশিংগী পুন্সিবু থাক ৱাংনা পুখত্তুনা মখোয়গী ফংফম থোকপা অচুম্বা ৱায়েল অমসুং ইকায় খুম্নবা পীনবা পাম্বৈ অমনি।

ঐখোয়গী নিং-তম ইহৌ অসি শুপ্নতগী রাজনিতীগী ইহৌ অমা নত্তে, মসিদি লৈবাকপু নৌনা শেমগৎপা অমসুং সোসিও-কলচর য়াহৌবনি।

গান্ধীজিনা ভারতপু লোইলম লৈঙাক্কী মায়োক্তা পুন্না লৈবা, ঐখোয়গী নাৎ, লোলদা চাউথোকচবা ফাওজবা অমসুং ঐখোয়গী মাংখ্রবা পাঙ্গলবু নৌহৌননা অমুক ফংবগী ৱাখল্লোনগা লোয়ননা মীয়াম পুম্ববু লৈহন্নিংঙম্মি।

ঐখোয়গী চাউখৎপগী ইথিল অসি মহাত্মা গান্ধীগী পুন্সি অমসুং ৱাখল্লোন্দা লোন্দুনা লৈখ্রবনি। হায়ব ইন্দবগী মতাংদা ফাওবা মহাক্না থকশি-নাইবা থৌওং উৎখি। মহাক্না ভারতকী “য়েন্নসি অমসুং য়েংশিনমিন্নসি” হায়বা ভারতকী ৱাখল্লোনবু মীওই অমগী নুংগী ৱাখল্লোন ওইহনখি। গান্ধীগী ৱাখল্লোন ইনবা মীওই কয়ানা মহাক্কী অইবা অমসুং ৱারোল কয়াদগী ইথিল লৌরি। বিনোবা জি অসি মহাক্কী অসিগুম্বা শেবোক অমনি।

নুংশিরবা ইচিল ইনাওশিং,

অচার্য় বিনোবা ভাবে অসি গান্ধীজিগী মতিক চারবা শেবোক অমনি। মহাক য়াম্না মনুং হুৎনা লাইনিং লাইশোলদা থৱাই লুপ্পা মীওই অমনি।

মহাক্না ভারতকী মচা ওইবগী ৱাখল্লোন্দা থাজবা থম্মি অমসুং অতোপ্পা মীওইশিংদা নুংশি-চাননা তৌবগী মওং চেনবগা লোয়ননা কত্থোকপা অমসুং মীওইবগী সেবা তৌবগী ইথিলসু চেল্লি।

মহাক্কী ভুদান ইহৌ অসি হৌজিক মতমগী তেলঙ্গানাগী পোচাম্পল্লিদগী হৌদোকখিবা লম য়াম্না লৈবা মীওইশিংদা মখোয়গী লম মচেৎ অমা লায়রবা লৌউবশিংদা পীনবা পুক্নিং থৌগৎপগী ইহৌ অমনি।

বিনোবাজিনা চহি ১৪গী মনুংদা অপুনবা কিলোমীতর ৭০০০০গী অরাপ্পা খোঙনা চৎখিবা অদুগী মহৈ ওইনা লম লৈজদবা লৌউবশিংগীদমক্তা লৌ উনবা অপুনবা একর লাখ ৪২গী লম কৎলকখি। পোচম্পল্লিগী শ্রী বেদিরেরাম চন্দ্র রেদ্দীনা বিনোবাজিগী থৌওং অসিগী পাউখুম ওইনা মশাগী লম একর ১০০ পীখিদুনা লম কৎলকখিবা অহানবা মীওই ওইখি হায়বসি পনবদা মতিক চাই।

গান্ধীজিগা য়াম্না মান্নবা ওইনা বিনোবাজিনা নম-হাবা, খৎন-চৈনবা তৌদনা অহোংবা পুরক্নবা হোৎনখি অমসুং মীয়াম্না শরুক য়ারবদি অফবা ৱাখল্লোন, তুংকোইনা লাকপা অহোংবা পুরকপা ঙম্মি হায়বসি থবক ওইনা পাঙথোকখি।

বিনোবাজিগী সর্বোদয়া ইহৌ অমসুং গ্রামদনগী ৱাখল্লোন্না গান্ধীগী খুঙ্গং নৌনা শেমগৎপা অমসুং থাক ৱাংনা পুখৎপগী ৱাখল্লোনবু খুদম ওইনা উৎখিবগী থৌওংনি অমসুং মীওইবগী অফবা মগুন্দা থাজবা অমসুং ইনাকখুনবশিংনা মখোয়গী মরন-মথুম্বু লৈত লাইরশিংদা তেংবাংবা হায়বসি খোঙজংশিং অসিগী ময়ায় ওইবা ৱাখল্লোন্নি। থৌওং অসি খুঙ্গংগী সোসিও-ইকোনোমিক থাক ৱাংহনবগী খুৎশম্ননা পাঙথোকপা পথাপ অমনি।

নুংশিরবা ইচিল ইনাওশিং,

বিনোবাজি অসি মীয়ামগী খুন্নাই অমসুং শেন্মিৎলোনগী হীরমদা অফবা পুরক্নবা পাউতাক পীখিবা লৈবাক নিংবা মীওইশিংগী শাংলবা পরিংগী মনুংদা চনবা মীওই অমনি। অরিবা মতমদগী য়াইফনা লৈরক্লবা অমসুং মীওইবগী মাই পাকপা অমসুং তোঙান তোঙানবা হীরমশিংদা মশক থোক্না চাউখত্তুনা লাক্লবা লৈবাক অসিগী মনুংদা লৈরবা তোপ তোপ্পা লন-থুম অসিগী মরমদা মখোয়না নীংথিনা খঙখি।

লোত্তুনা লৈবা মীওইবগী তৌবা ঙম্বগী মতিক মশক খঙবা ঙম্বগী মওং অমসুং মসি শিজিন্নদুনা তংদু লৈতাবা খুন্নাই অমা ওইহনবা ঙম্লিবা অসিগুম্বা অফাওবা মীওইশিং অসিনা মখোয়বু ঐখোয়গী পুৱারীগী কাওনাইদ্রবা খুদম অমা ওইরিবনি।

মহাক্কী ১২৫শুবা মপোক কুমওন পাঙথোকপগী মওংদি ঐখোয়গী অপুনবা মীশিংগী ৬০%গী শরুক ওইরিবা খুঙ্গংগী অপুনবা মীওইশিংনা পুন্না থবক পায়খৎমিন্নবগী থৌওংনা খ্বাইদগী চান্নবা মওং ওইগনি।

খুঙ্গংগী মীওইশিংগী পুন্সি মহিং ফগৎহন্নবা সরকারগী প্রোগ্রাম কয়া অমা লৈ হায়বসি ঐহাক খঙই। খুঙ্গং খুদিংমক্তা মৈ য়ৌরে, অহাঙবদা অমাং-শঙ ওইদ্রে। খুঙ্গং অয়াম্বা অসি খুঙ্গংগী লম্বীগী নেৎৱর্ক্কী চাউরাকপা কিলোমীতর লাখ ২গী খুত্থাংদা নীংথিনা শম্নহল্লে।

ঐখোয়না হৌজিক হোৎনরিবা অসি বিনোবাজি অমসুং গান্ধীজিনা খনলম্বা সশক্তা ভারত, স্বাভিমান ভারত অমসুং আত্মানির্ভর ভারতকী মঙলান অদুবু মঙফাওনহনবনি।

কাস্ত, ধর্ম অমসুং মফম নাইদনা মান্নবা মওংদা চাউখৎমিন্নবা অমসুং মীওইশিংবু মখোয়গী খুন্নাই অমসুং শেন্মিৎলোনগী ফিভমদা য়েংদনা মীওই অমনি হায়না য়েংবগী থৌওংদা মিৎয়েং চংগদবনি।

মীওই খুদিংগী য়াইফ য়ুম্বাল অমসুং মীওই খুদিংনা পুন্না শরুক য়ামিন্নদুনা খুন্নাইগী অফবা তৌবা অসি সর্বোদয়াগী মপুং ওইবা ৱাখল্লোন্নি। মসিগী মপুং ওইবা পান্দমদি ওন্তোপ্রিনরেল তেলেন্তশিং অমসুং তেক্নোলোজীদা লৈরিবা হৈ-শিংবশিং অসি শিজিন্নদুনা ঐখোয়গী লৈজরিবা রিসোর্সশিং অসিগী মতেংনা ইরোমদোম লেপচবা ঙমহনবতা নত্তনা মীওইবা খুন্নাইবু তেংবাংবনি। 

ঐহাক্না হরিজন সেবক সংঘগুম্বা লুপশিংদা মতিক চাবা মীওইশিং মশক খঙদোক্তুনা অমসুং ওন্তোপ্রিনরগী ত্রেনিং পীদুনা লাক্কদৌরিবা চহিশিং অসিদা ভারতপু আত্মানির্ভর ভারত অমা ওইহন্নবা থৌদাং পাঙথোক্নবা হায়রি।

ভারতকী মরোমদোম লেপচবা হায়রিবা ৱাখল্লোন অসি ঐখোয়গী লৈবাক্কী খক্তা খনবা নত্তে অদুবু মালেমগী য়াইফ য়ুম্বালগীদমক্তা মরু ওইবা খোঙলোই অমা ওইবা ঙম্নবনি। বিনোবাজীগী লাইশোল ওইরম্বা “জয় জগত”কী তসেংবা লাইনিংগী মতুং ইন্না ঐখোয়না মীওইবা জাতিগী য়াইফ য়ুম্বাল পুরকপনি। ঐখোয়না করিগুম্বা অমা শাগৎপদা মালেমদসু কান্নবা পীগদবনি। ঐখোয়না চাউখৎপগী ৱাখল্লোন অমগা লোয়ননা মালেম অসি মীওই পুম্নমক্না লৈবা নুংঙাইবা মফম অমা ওইহনগদবনি।

হরিজন সেবক সংঘনা বিনোবাজিগী ১২৫শুবা মপোক কুমওন পাঙথোক্নবা ওনলাইনগী প্রোগ্রাম কয়াগী থৌরাং তৌদুনা লৈরি তাবদা য়াম্না নুংঙাইবা ফাওই। মান্নবা খুন্নাই অমসুং শেন্মিৎলোনগী মওং অমা পুরক্নবগীদমক্তা অফাওবা লুচিংবা কয়াগী পুন্সি অমসুং থবক্কী মরমদা অমসুং সর্বোদয়া অমসুং অন্তোদয়াগী তঙাই ফদবগী মরমদা ঐখোয়গী নহাশিংদা তাকপী তম্বীফম থোকই।

ঐহাক্না থৌরম অসিবু শিল-লাংলিবা মীওইশিংবু মতমগা চান্নবা থৌরম অসি পাঙথোকপগী থাগৎপা ফোঙদোক্লি। কোবিদ-১৯গী হকশেলগী তঙাইফদবশিং লৈরিবা অসিগী মরক্তা অমসুং হৌজিক ওইরিবা লুরবা তাঞ্জা অসিদা ঐখোয়না অমত্তা ওইনা পুন্দুনা ভাইরস শন্দোকপা থিংমিন্নবতা নত্তনা লোকদাউন্না শোকহল্লবা মীওইশিংসু গান্ধীগী ৱাখল্লোনগী তুং ইন্দুনা তেংবাংগদবনি।

মীওইবগী পুক্নিংনা অসিগুম্বা মতম অসিদা অতোপ্পা মীওইবু তেংবাংবগী খ্বাইদগী নীংথিবা মওং পুরকপা ঙম্মি।

অসিগুম্বা মতম অসিদা ঐখোয়না সরকারগী নত্তবা লুপশিংনা পাঙথোকপা থবকশিংবু শিংথানগদবনি অমসুং ঐখোয়গী দাক্তরশিং, পেরামেদিকশিং, ঐখোয়গী সেক্যুরিতীগী মীওইশিং অমসুং ঐখোয়বু তেক্ত কায়দনা লৈহল্লিবা অতোপ্পা মীওইশিংবুসু মখোয়গী কত্থোকপগী থৌওংশিং অসিবু শক খঙগদবনি। ঐখোয়গী চানবা ৱাৎহন্দ্রিবা লৌউবশিংবুসু ঐখোয়না কাওরোইদবনি।

ঙসিগী থৌরম অসিদা ঐহাক্না গান্ধীগী ৱাখল্লোন ইনবী অশেংবা মীওই অমসুং বিনোবাজিগী লাইইনিং লাইশলগী হীরমগী মচানুপী অমসুং হরিজন সেবক সংঘগী হান্নগী প্রসিদেন্ত ওইরম্বী লৈখিদ্রবা নিরমলা দেশপান্দেবু থমোয় শেংনা নিংশিংলি। মহাক্না সোসিএল ৱর্কর কয়াদা ইথিল কয়া পীরমখি।

লোইশিল্লকপদা ঐহাক্না দাঃ সঙ্কর কুমার সনয়ালজি অমসুং মহাক্কী কাংবুশিংবু মীয়ামদা ঐহাক্কী ৱাখল্লোন ফোঙদোকপগী খুদোংচাবা পীবগীদমক্তা থাগৎপা ফোঙদোক্লি। মীওইবা ফুরুপকী তেংবাংবগী থবক পাঙথোকপদা অমসুং মীওইবগী পুন্সিদা অহোংবা অমা পুরকপদা মতম পুম্বদা মাই পাকপা ওইনবা ঐহাক্না থৌনিজগনি।

জয় হিন্দ।

*********