কেন্দ্রগী রাজ্য মন্ত্রী (ইন্দিপেন্দেন্ত চার্জ), দিবেলপমেন্ত ওফ নোর্থ ইস্তর্ন রিজন (দোনের), এম.ও.এস. পি.এম.ও., পর্সোন্নেল, পব্লিক গ্রাইবেন্স অমসুং পেন্সন, এতোমিক ইনর্জী অমসুং স্পেস মন্ত্রী দাঃ জিতেন্দ্র সিংহনা হন্দক্তা ফল লাউথোকখিবা আই.এ.এস./সিবিল সর্বিস একজাম ২০১৯গী ভারতকী মায় পাক্লবা মীওইশিংবু তরাম্না ওক্তুনা ইকায় খুম্নখ্রে। মসিগী মনুংদা ভারত পুম্বগী অহানবদা লাকখিবা হরয়ানাদগী প্রদীপ সিংহ, অনিশুবদা লাকখিবা দিল্লীদগী জতিন কিশোর অমসুং অহুমশুবদা লাকখিবী উত্তর প্রদেশ্তগী প্রতিভা ভর্মা য়াওখি।

ৱারী শাবা অদুদা দাঃ জিতেন্দ্র সিংহনা হায়খিবদা হৌখিবা চহি ৫দগী মহাক্না পর্সোন্নেল অমসুং ত্রেনিং বিভাগ (দি.ও.পি.তি.)তা ভারতকী মায় পাক্লবা মীওইশিংবু নোর্থ ব্লোক্তা লৈবা দি.ও.পি.তি.গী ময়ায় লোয়শঙদা মহাক মশা য়াওনা কৌদুনা অমসুং উন্নদুনা ইকায় খুম্নবা অমসুং খুদোলপোৎ পীবগী চৎনবী অমা হৌদোক্তুনা লাকখিবনি। অদুবু হন্দক্কী চহি অসিদদি লায়চৎ অসিনা অথিংবা কয়া লৈহল্লিবা অসিনা মরম ওইদুনা থৌরম অসি হায়রিবা মওং অসিদা পাঙথোকপা ঙমদ্রে মরম অদুনা লৈবাক অসিগী তোঙানবা মফমশিংদা লৈরিবা মায় পাক্লবশিংগা ৱারী শানবা ভিদিও কনফরেন্স অমা ওইনা শিল্লে।

দাঃ জিতেন্দ্র সিংহনা দি.ও.পি.তি.না মোদী সরকারনা তৌহন্নিংবগী মতুং ইন্না লায়চৎ অসিগী মনুংদা সরকারগী মথৌশিং পাঙথোকপদা অয়েৎপা লৈহন্দবগীদমক্তা থাগৎপা ফোঙদোকখ্রে। ঙসি পাঙথোক্লিবা থৌরম অসিসু মসিগী মনুং চনবা থৌওং অমনি।

মায় পাক্লবশিংগা ৱারী শাবদা দাঃ জিতেন্দ্র সিংহনা মখোয়গী ইমুং মনুংগী মরমদা অমসুং মখোয়না তুংদা পাঙথোক্নিংবা থবকশিংগী মরমদা হংখি। মখোয়না প্রধান মন্ত্রী শ্রী নরেন্দ্র সিংহ মোদীনা লুচিংদুনা মালেমগী মমাং থাদুনা লৈরগদবা নিং-খা তম্বা ফংলবা মতুংগী ভারতকী পুৱারীগী খ্বাইদগী অফবা মতম অমদা থবক চংলগনি হায়খি। হীরম অসগী মাইকৈদগী য়েংলবদি চহি ৩০দগী ৩৫ ফাওবা মীয়ামগী সেবা তৌবা ফংগদবা নহা ওইরিবা ওফিসারশিংনা মোদীগী অনৌবা ভারত অসিগী মঙলানবু মঙফাওনহনবদা মতেং পাঙবা ফংবগী লাইবক ফরবা খুদোংচাবা ফংলগনি হায়খি।

দাঃ জিতেন্দ্র সিংহ্না হৌখিবা চহি তরুক অসিদা নহা ওইরিবা প্রোবেস্নরশিং অমসুং আই.এ.এস. ওফিসারশিংগীদমক্তা মশক থোকপা অনৌবা শেমদোকপা কয়া পুরকখ্রে হায়বা ৱাফম নিংশিংহনখি। মসিগী মউংদা রাজ্য/য়ু.তি.শিংদা মখোয়গী অপীবা কেদরশিংদা চত্ত্রিঙৈদা কেন্দ্র সরকারদা থা অহুম থবক তম্বগী থৌওং য়াওরি।

দাঃ জিতেন্দ্র সিংহনা হৌখিবা চহি খরা অসিদা মকোক তারকপা মীওইশিংগী লৈফমশিংগী অহোংবগী মতাংদা পনখি। দিকেদ অমগী মমাংদদি ভারতকী রাজ্য খরা খক্তগী ওইনা মকোক তাবশিং লৈরম্বনি অদুবু ঙসিদি হরয়ানা, পঞ্জাব অমসুং জম্মু অমসুং কশ্মির য়ুনিয়ন তেরিতরীদগীসু য়াওরে অমসুং মসি অনৌবা থৌওং অমনি হায়খি। মসিগা মান্নবা মওংদা অহানবা মকোক অহুমগী মনুংদা নুপী অমা নত্ত্রগা অমদগী হেনবসু য়াওরে হায়খি।

দাঃ জিতেন্দ্র সিংহনা হন্দক্কী চহিগী মকোক থোংবা মীওই ২৫গী মনুংদা ইঞ্জিনিয়র ১২ য়াওবা অসিবু পল্লদুনা মখোয়না মোদী সরকারনা পাঙথোকপা অখন্নবা স্কিম অমসুং প্রোগ্রামশিংদা বেল্যু হাপ্পা থবক তৌবা ঙমগনি হায়বগী থাজবা লৈ হায়খ্রে।

সি.এস.ই. ২০১৯গী মায় পাক্লবশিংবু তরাম্না ওক্লদুনা পর্সোন্নেল অমসুং ত্রেনিং বিভাগকী সেক্রেতরী দাঃ সি. চন্দ্রমৌলি মখোইবু থাগত্তুনা তুংগী পুন্সিদসু য়াইফবা ওইয়ু হায়খি। মখোয়না মীয়ামগী তঙাই ফদবা অমসুং চাউখৎপগী সেবা তৌবা ঙম্নবা সিবিল সর্বিস্পু কেরিয়র ওইনা খল্লিবা অসি মীয়াম্না নিংশিংদুনা লৈহৌরগদবনি হায়খি। মরম অদুনা মখোয়না মখোয়গী থবকশিং নীংথিনা পাঙথোক্কদবনি হায়খি।

সি.এস.ই. ২০১৯গী মকোক থোংবা ২০না ওনলাইন ভিদিও কনফরেন্সকী খুত্থাংদা ওকপগী থৌরম অসিদা শরুক য়াখি। মখোয়না মখোয়গী ৱাখল্লোন অমসুং লৈবাক সেবা তৌনিংবগী ইথিলসু ফোঙদোকখি।

প্রোগ্রাম অসিদা বিভাগ অসিগী সেনিয়র ওফিসার খুদিংনা শরুক য়াখি। থৌরম লোইশিনবগী থাগৎ ৱাহৈ অসি দি.ও.পি.তি.গী এদিস্নেল সেক্রেতরী শ্রী লোক রঞ্জন্না পীখি।

<><><><><>