কেন্দ্রগী এজুকেসন মন্ত্রী শ্রী রামেশ পোখ্রিয়াল ‘নিশঙ্ক’না ঙসি নই দিল্লীদা স্তুদেন্তস লর্নিং ইনহেন্সমেন্ত গাইদলাইনশিং ভর্চ্যুল ওইনা ফোঙখ্রে। থৌরম অদুদা ৱা ঙাংলদুনা মন্ত্রীনা হায় হৌজিক ওইরিবা কোবিদ-১৯গী লায়চৎ অসিদা এজুকেসন মন্ত্রালয়গী মখাদা লৈবা ইন্সতিত্যুসনশিংনা পুন্না থবক তৌমিন্নরি অমসুং স্কুল এজুকেসন অসি দিজিতেলগী পাম্বৈশিংনা অঙাংশিংদা ময়ুম-ময়ুমদা ফংহন্নবা কন্না হোৎনরি। অল্তর্নেতিব একেদেমিক কেলেন্দর, প্রগ্যাতা গাইদলাইনশিং, দিজিতেল এজুকেসন-ইন্দিয়া রিপোর্ত, নিশথা-ওনলাইন্নচিংবা দোক্যুমেন্তশিং অসি অঙাংশিংগী স্কুল এজুকেসন মখা চত্থনবা লৌখৎপা খোঙথাংশিংনি। মহৈরোয়শিংদা অতোপ্পা পাম্বৈশিংদা স্কুল এজুকেসন পীনবা হোৎনরিবা চৈরক অসিদা তোঙান তোঙানবা স্তেকহোল্দরগী মরী লৈনবশিংনা দিজিতেল রিসোর্সশিং ফংবা ঙমদবা মহৈরোয়শিংগী মহৈ তম্বগী মতাংদা ৱাফম কয়া থমলকখি। মসিগী মথক্তা ময়ুম ময়ুমদা স্কুল এজুকেসন ফংনবা দিজিতেল রিসোর্সশিং চাং মান্ননা ফংদবনা মরম ওইদুনা ইকুইতী অমসুং ইনক্লুজনগী খুদোংচাদবশিংনা অঙাংশিং মহৈ তম্বদা অৱাবশিং ওইহল্লে হাববসু খংলে।

হায়রিবা অসি য়েংলগা এন.সি.ই.আর.তি.না হৌজিক ওইরিবা ফীভম অমসুং লায়চৎ অসিগী মতুংগী ফীভমগীদমক এজুকেসন মন্ত্রালয়গী লুচিং মখাদা স্তুদেন্তস লর্নিং ইনহেন্সমেন্ত গাইদলাইনশিং শেমখ্রে। মন্ত্রীনা ফোঙদোকখি মদুদি মসিগী গাইদলাইনশিং, মোদেলশিং অসি মখাগী ফীভম অহুম অসিগী পুথোকখিবনি। অহানবদা দিজিতেল রিসোর্সশিং অমত্তা লৈতবা মহৈরোয়শিংগী। অনিশুবদা দিজিতেল রিসোর্সশিং অকক্ননা ফংবা মহৈরোয়শিংগী। অহুমশুবদা ওনলাইন এজুকেসনগীদিজিতেল রিসোর্সশিং ফংবা মহৈরোয়শিংগী।

মন্ত্রীনা হায় মসিগী গাইদলাইনশিং অসিনা স্কুলগা পুন্না থবক তৌমিনরিবা কম্ম্যুনিতীশিংনা মহৈ মশিং তম্বগী মচাকশিং ৱার্কবুকশিং, ৱার্কশীৎশিং অসিনচিংববু ওজাশিং অমসুং ভোলুন্তীয়রশিংনা অঙাংশিংগী ময়ুমদা থিবদা মীৎয়েং থম্লি। মসিনা কম্ম্যুনিতী সেন্তরশিংদা মফম অদুগী মহৈরোয়শিং ভোলুন্তীয়রশিং নত্রগা ওজাশিংনা তেলিভিজন থমদুনা অমসুং সোসিএল দিস্তেন্সকী কাঙলোনশিং ঙাক্তুনা তাকপী-তম্বীনবসু হায়রি।

পোখ্রিয়লনা হায় গাইদলাইনশিং অসিনা কম্ম্যুনিতীগী অমসুং পঞ্চায়তি রাজকী মীহুৎশিংগী মতেংগা লোয়ননা কম্ম্যুনিতী সেন্তরদা হেল্পলাইন অমা থম্নবগী মতাংদা য়াওরি। মসিনা মমা-মপাশিংনা মখোয়গী অঙাংশিংগী মহৈ মশিং তম্বদা মতেং পাংবা অমসুং শরুক য়ানবগী ওরিয়েন্তেসন তৌনবা হায়রি। মহাক্না মখা তারদুনা ফীভম অহুমমক্তা এল্তর্নেতিব একাদেমিক কেলেন্দর শীজিন্নবা অমসুং হাপনবা ৱাখল্লোন ফোঙদোকখি। গাইদলাইনশিং অসিদা মখোয়না পীরিবা ৱারোলশিং অসি কেন্দ্রিয়া বিদ্যালয় সঙ্গাথন, নভোদিয়া বিদ্যালয় সমিতিগী স্কুলশিং অমসুং সেন্ত্রেল বোর্দ ওফ এজুকেসনদা দিগিতেল রিসোর্সশিং ফংহনবরা হায়বগী মতাংদা এন.সি.ই.আর.তি.না লৌখৎপা সর্ভে অমসুং এজুকেসন মন্ত্রালয়না রাজ্যশিং/য়ু.তি.শিংগীদমক শেম্বা মহৈ মশিং লেপ্তনা তম্নবা থৌরাংদা য়ুম্ফম ওইবনি।

মন্ত্রীনা হায় গাইদলাইনশিং অসিনা ওজাশিং নত্রগা ভোলুন্তীয়রশিংগা লোয়ননা ময়ুমদা মহৈ মশিং তম্নবগী দিজিতেল রসোর্সশিংগী খুদোংচাবশিং লৈতবা অঙাংশিংদা মতেং পাংলগনি। মসিগী মথক্তা, রেদিও, তি.ভি., স্মার্ত ফোন অসিনচিংবশিং শীজিন্নদুনা তোঙান তোঙানবা পাম্বৈশিংগী খুত্থাংদা ময়ুমদা মহৈ মশিং তম্লিবা মহৈরোয়শিংনা থেংনরিবা অৱাৎপশিং কোকহন্নবা ঐখোয়না হোৎনবদসু মসিনা মতেং পাংলগনি।

স্তুদেন্তস লর্নিং ইনহেন্সমেন্ত গাইদলাইনশিংগীদমক মসিদা নম্বীয়ু:

********