ঙসি মাইনোরিতি এফেয়ার্সকী য়ুনিয়ন মিনিস্তর মুক্তার অব্বাস নাগবীনা হায়খি মিনিস্ত্রিগী মখাদা পায়খৎলিবা লেম্না কোচিং পীবা “নাইউরান” স্কিমগী মখাদা মশিং য়ামদবা কাংলুপকী নহারোল ২২ সিবিল সর্বিসেস খল্লকপা অসিনা সরকারনা মশিং য়ামদবা কাংলুপকী লাইরিক হৈবা নহারোল য়োকখৎনবা পায়খৎলিবা থবকশিংগী মহৈ চারে।

ঙসি অন্তয়োদয়া ভাবন্দা পাংথোকখিবা মাইনোরিতি এফেয়ার্স মিনিস্ত্রিগী লেম্না কোচিং পীবা স্কিমগী মতেংদগী সিবিল সর্বিসেস ২০১৯দা খল্লক্লবা মশিং য়ামদবা কাংলুপকী নহারোলশিং ওকপগী থৌরমদা মিনিস্তরনা হায়খি মশিং য়ামদবা কাংলুপকী নহারোলগী মরক্তা হৈথোই-শিংথোইবা ৱাৎপা লৈতে। মমাংদদি, মশিং য়ামদবা কাংলুপকী নহারোলগী মরক্তা লৈরিবা থৌনা মশক খঙনবা অসিগুম্বা থবকশিং পাংথোক্লমদে।

য়ুনিয়ন মিনিস্তরনা হায়খি মশিং য়ামদবা কাংলুপকী নহারোলশিং য়োকখৎনবা সরকারনা খুদোংচাবা কয়া পীরে। পায়খৎলিবা থবকশিং অসিনা মশিং য়ামদবা কাংলুপকী নহারোল কয়া মকোক থোঙবা লৈঙাক্কী থবকশিংদা খল্লে। চহি অসিদা মশিং য়ামদবা কাংলপকী মীওই ১৪৫ লেমজনিঙাই ওইরবা সিবিল সর্বিসেস খল্লে। হৌখিবা চহি অহুমদা সিবিল সর্বিসেসশিংদা মশিং য়াম্না খল্লকপা উরে।

মহাক্না হায়খি, কেন্দ্র সরকারগী সিবিল সর্বিসশিংদা মাইপাকলবা নহারোলশিং অসি খুন্নাইগী মশিং য়ামদবা কাংলপকী অমসুং শোৎথরবা কাংলুপকী মনুংদা লৈবা নহারোলশিংগী তমজনফম অমনি।

শ্রী নাগবীনা হায়খি য়ু.পি.এস.সি পরিখাশিংগী থৌরাং তৌনবা মশিং য়ামদবা কাংলপকী মনুং চনবা লাইরিক হৈবা নহারোলশিং লেম্না কোচিং পীনবা থৌরম কয়া মাইনোরিতি এফেয়ার্স মিনিস্ত্রিনা পায়খৎলি। “নাইউরান”, “নয়াসবেরা”গী মখাদা মশিং য়ামদবা কাংলুপকী নহারোলশিং সিবিল সর্বিসেস, অতোপ্পা য়ু.পি.এস.সি পরিখাশিং, মেদিকেল, ইঞ্জিনিয়ারিং, বেঙ্কিং, এদমিনিস্ত্রেতিপ পরিখাশিংগী শেম-শানবা মিনিস্ত্রিনা লেম্না কোচিং পীরি।

মহাক্না হায়খি ২০১৪গী মমাংদা মশিং য়ামদবা কাংলুপকী মহৈরোই করোর ২.৯৪ খক স্কোলারশিপ পীরমখি, অদুবু হৌখিবা চহি ৬ অসিদা হৌজিক পাল্লিবা সরকার অসিফনা মশিং য়ামদবা কাংলুপকী মহৈরোই করোর ৪.৬০দা স্কোলারশিপ পীরে। স্কোলারসিপ স্কিমশিংগী কান্নবা ফংলবশিংগী চাদা ৫০ হেন্না নুপীমচাশিংনি। অকনবা থবকশিং পায়খৎপদগী, মশিং য়ামদবা কাংলুপকী মহৈরোইশিং মরুওইনা নুপীমচাশিং লাইরিক তম্বা তোকপগী চাং ফজনা হন্থরে ।।

য়ুনিয়ন মিনিস্তরনা হায়খি”প্রধান মন্ত্রী জন বিকাস কর্য়াক্রম”গী মখাদা স্কুল, কোলজে, হোস্পিতাল, কমুনিতি সেন্তর, কমন সর্বিস সেন্তর, আই.তি.আই, পোলিতেক্নিক,নুপীমচাগী হোস্তেল, সাদবনা মান্দপ,হুনার হৎ য়াওনা প্রোজেক ৩৪,০০০ হেন্না হৌখিবা চহি ৬ অসিদা মশিং য়ামদবা কাংলুপকী মীওইশিং মশিং য়াম্না খুন্দাবা মফমশিংদা পায়খৎলে। ২০১৪গী মমাংদা অসিগুম্বা প্রোজেক ২২,০০০ খক পায়খৎলমখি। ২০১৪গী মমাংদা লৈবাক অসিদা জিলা ৯০ খক মশিং য়ামদবা কাংলুপকী চাউখৎ-থৌরাংগী মশক খঙদোকখি, অদুবু সরকার অসিনা লৈবাক অসিগী জিলা ৩০৮ মশিং য়ামদবা কাংলুপকী চাউখৎ-থৌরাং পায়খৎনবা মশক খঙদোক্লে।

থৌরম অদুদা দোনরগী রাজ্য মন্ত্রী(মনিংতম্বা) অমসুং প্রাইম মিনিস্তর ওফিসকী রাজ্য মন্ত্রী দোক্তর জিতেন্দ্র সিংহ অমসুং য়ুথ এফেয়ার্স অমসুং স্পোর্তসকী রাজ্য মন্ত্রী(মনিংতম্বা)অমসুং মাইনোরিতি এফেয়ার্সকী রাজ্য মন্ত্রী কিরেন রিজিজুসু শরুক য়াখি।

**********