শেলথুম অমসুং কোর্পোরেৎ এফিয়র্স মন্ত্রী শ্রীমতি নির্মলা সিথারমন্না ঙসি ভিদিও কনফরেন্সকী খুথাংদা সিপ্পিং, রোদ ত্রান্সপোর্ত অমসুং হাইৱে, হাউসিং অমসুং অর্বান এফিয়র্স, দিফেন্স অমসুং তেলিকম্ম্যুনিকেসন মন্ত্রালয়, মন্ত্রালয় অসিগী মখাদা লৈবা সি.পি.এস.ই. ৭কী সি.এম.দি.শিংগা লোইননা চৎলিবা শেনবা চহী অসিগী ওইবা কেপিতেল এক্সপেন্দিচরশিং য়েংশিন্নবা মীফম অমা ফমখ্রে। হায়রিবসিনা শেল-থুম মন্ত্রীনা তোঙান-তোঙানবা স্তেকহোল্দরশিংগা লোইননা কোবিদ-১৯ লাইচৎকী মতুংদা শেন্মিৎলোন ফগৎহন্নবগীদমক খন্ন-নৈনবগী তাংকক নাইনা ফমগদবা মীফমগী অহুমশুবা শরুকনি।

শেনবা চহী ২০২০-২১গী ওইনা সি.পি.এস.ই. ৭ অসিগী অপুনবা কেপেক্সকী পান্দম অসি লুপা কোতি ১,২৪,৮২৫নি। শেনবা চহী ২০১৯-২০দা সি.পি.এস.ই. ৭ অসিগী অপুনবা কেপেক্সকী পান্দম লুপা কোতি ১,২৯,৮২১দগী ফংখিবা শরুকনা লুপা কোতি ১,১৪,৭৩০নি হায়বদি চাদা ৮৮.৩৭%নি। শেনবা চহী ২০১৯-২০গী ক্বার্তর ১গী মনুংদা ফংখিবনা লুপা কোতি ২০,১৭২নি (১৫.৫৩%) অমসুং জুলাই ২০২০ (শেনবা চহী ২০২০-২১)দা ফংখিবনা লুপা কোতি ২৪,৯৩৩ (২০%)নি।

শেল-থুম মন্ত্রীনা মরী লৈনবা সেক্রেতরীশিংদা শেনবা চহী ২০২০-২১গী ক্বারতর ২শুবদা সি.পি.এস.ই.শিংগী থবকশিং য়েংশিন্দুনা কেপিতেল আউৎলেগী চাং চাদা ৫০গী কেপিতেল এক্সপেন্দিচর হঞ্জিন্নবা হোৎনগদবনি অমসুং চুন্নবা প্লান শেমগদবনি হায়খি।

সি.পি.এস.ই.শিংনা ভারতকী শেন্মিৎলোন ফগৎনবগীদমক পাঙথোক্লিবা থৌদাংশিং অসিবু য়েংশিনলদুনা শেলথুম মন্ত্রীনা সি.পি.এস.ই.শিংবু থম্লিবা পান্দমশিং অদু ফংনবা হোৎননবগী পুক্নিং থৌগৎখি অমসুং শেনবা চহী ২০২০-২১গী থাদরিবা শেনফমশিং অদু অপীবা মতমগী মনুংদা অমসুং মতীক চানা শীজিন্নবা থমখি।

মহাক্না সি.পি.এস.ই.গী থবক থৌরমশিং অসিনা কোবিদ-১৯গী শাফুদগী শেন্মিৎলোন অসি কনবা ঙমগনি হায়খি। সি.পি.এস.ই.শিংনা কোবিদ-১৯ লাইচৎনা মরম ওইদুনা মখোয়দা থেংনরিবা খুদোংচাদবশিংগী মরমদা তমখি। শেল-থুম মন্ত্রীনা হায়খি মদুদি অখন্নবা ফিবমগীদি অখন্নবা উপাই শীজিন্নদুনা হোৎনগদবনি, মসিনা ঐখোয়গী শেন্মিৎলোন ফগৎহনবদা নত্তনা ঐখোয়গী থবকসু ফগৎহনগনি।

******