ঐগী নুংশিরবা ইরৈচাশিং,

খুরুমজরি!

১. ৭৪শুবা নীংতম্বা নুমিৎ লাকপদা লৈবাক অসিদা অমসুং মপানদা লৈরিবা ভারতকী মীয়াম পুম্নমক্তা নুংঙাইবা ফোংদোকচরি অমসুং য়াইফ-পাউজেল পীজরি। ওগস্ত ১৫দা ঐখোয় পুম্নমক্না মচু অহুমগী ফিরাল পাইহন্দুনা, থৌরম অসিদা শরুক য়াজদুনা অমসুং লৈবাক নীংবগী ঈশৈশিং তাবদা হরাওবা পোকই। নুমিৎ অসিদা, ভারতকী নহারোলশিংনা মনীংতম্লবা লৈবাক অমগী নাগরিক ওইবগী চাউথোকচবা পোক্কদবনি। ঐখোয়বু মনীংতম্বা লৈবাক অমদা হিংবা ঙম্ননবা থৱায় কৎখ্রবা ঐখোয়গী নীংতম লান্মীশিং অমসুং অথৌবশিংবু ঐখোয়না নীংশিংগদবনি।

২. ঐখোয়গী নীংতম ইহৌগী ফিদমশিং অদুনা অনৌবা ভারতকী য়ুম্ফম থোনখিবনি। মিৎয়েং শানবা ঐখোয়গী লুচিংবশিংনা লৈবাক্কী অমত্তা ওইবা ৱাখল্লোন অমা শেমগৎনবা মালেমগী খেন্নবা মিৎয়েংশিং অমত্তা ওইনা পুনশিনখিবনি। মখোয়না ভারত ইমাবু মপান লৈবাক্কী নাপল কারবা লৈঙাক্কী মখুৎতগী কন্নবা অমসুং মহাক্কী মচাশিংগী তুংগী য়াইফনবা থবক পাংথোকখি। মখোয়গী ৱাখলশিং অমসুং থবকশিংনা অনৌবা লৈবাক অমা ওইনা ভারতকী শক্তম শেমখি।

৩.মহাত্মা গান্ধীনা ঐখোয়গী নীংতম ইহৌগী লমজিং মৈরা ওইখিবা অসি ঐখোয়গী লাইবক ফবনি। মহাক্কী মতৌদা উখিবা সাধু অমসুং রাজনিতীগী লুচিংবা অমগী মগুন অদু, ভারত খক্তদা ওইথোকপা ঙম্লিবনি। খুন্নাইগী লৈতাদবা, শেন-থুমগী খুদোংচাদবশিং অমসুং অইং-অশাগী খল কাইরকপদগী থেংনরিবা অৱাবশিং গান্ধীজীগী পাউতাকশিং লৌদুনা অৱাবা কোক্নবা হোৎনরি। থোং মান্নবা অমসুং অচুম্বগীদমক মহাক্না হোৎনখিবা অদু ঐখোয়গী লৈবাক অসিগী লাইৱা অমনি। নহা ওইরিবা মীরোলশিংনা গান্ধীজীবু অমুক হন্না খঙননবা হোৎনবা উবদা ঐ হরাওই।

ঐগী নুংশিরবা ইরৈচাশিং,

৪.চহি অসিগী নীংতম্বা নুমিৎ অসি হান্নদগী পীক্না পাংথোক্লগনি। মসিগী মরম ময়েক শেংলি। হৌজিক মালেম শীনবা থুংনা তমথিরবা ভাইরস অমা মায়োক্নদুনা থবক খুদিংমক অকায়বা পীরি অমসুং মসিনা মী য়াম্না শিহল্লে। লাইচৎ অসিগী মমাংদা ঐখোয়না হিংলম্বা মালেম অদু ভাইরস অসিনা হোংহল্লে।

৫. মসি খজজিন্নীংঙাইনি মদুদি শিংনবা অসিবু মায়োকননবগীদমক কেন্দ্র সরকারনা মাংজৌননা শেম-শাবগা লোইননা, মতম লৈরিঙৈদা, মতিং লৈবা খোংথাং লৌখৎখি। অসিগুম্বা অখন্নবা থৌরাংশিং অসিগী মরমদগী মী কুংনা তাবা অমদি তোঙান তোঙানবা ফিভম কয়া মায়োক্নরিবা ঐখোয়গী চাউরবা লৈবাক অসিনা শিংনবা অসি মায়োক্নরি। রাজ্য সরকারশিংনা মফম অদুগী ফিভমগী মতুং ইন্না খবক থবকশিং পায়খৎলি। মীয়ামসু থৱায় হকচাং য়াওনা শৌগৎলি। হোৎনবা কয়া অসিদগী ঐখোয়না লাইচৎ অসি লাকশিনবদা অমসুং মীওই কয়াগী পুন্সি কনবা ঙম্লে। মসি মালেম পুম্নমক্না মতৌ তমজনীংঙাইনি।

৬. মসিগী ভাইরস অসি থেংনবদা মাংজিল থারিবা দোক্তরশিং, নর্সশিং অমসুং হকশেলগী মীওইশিংদা লৈবাক অসিনা লমন তোল্লে। লাইবক থিবদি, মখোয় কয়া লাইচৎ অসি থেংনবদা থৱায় থাখ্রে। মখোয় লৈবাক্কী অথৌবশিংনি। কোরোনা লান্মী খুদিংমক থাগৎফম থোকই। পুন্সি কয়া কন্নবা অমসুং তঙাইফদবা থবকশিংগীদমক মখোয়না মশাগী মথৌগী ৱাংমদা থবক তৌখি। হায়রিবা দোক্তরশিং, হকশেলগী মীওইশিং, দিজাস্তর মেনেজমেন্ত কাংবুগী মীওইশিং, পুলিসকী মীওইশিং, সেনিতেসনগী শিন্মীশিং, গারী, রেলৱেজ অমসুং এবিয়েসনগী মীওইশিংনা পাংথোক্লিবা থবকশিং, সরকারগী থবক তৌরিবশিং, মীয়ামগী থবক তৌরিবা লুপশিং অমসুং পুকচেল চাউরবা মীয়াম্না থৌনা ফবা অমসুং কৎথোকপগী থবকশিংগী ইথিল পীবা ৱারীশিং ইরি। শহর অমসুং তাউনশিং চেক-মোক লাউদ্রবা অমসুং লম্বীশিং মী তাক্লবা মতমদা, মীয়ামদা হকশেল, ঈশিং, শঙ্গোম, মনা-মশিং, মৈ, চানবা, হিদাক-লাংথকশিং, চৎথোক-চৎশিন, অমসুং তঙাইদবা অতৈ পোৎলমশিং ফংহন্নবা চোকথবা লৈতনা থবক পাংথোকখি। ঐখোয়গী পুন্সি অমসুং হিংনবা লম্বী কন্নবা মখোয়না মশাগী পুন্সি খুদোংথিবা মায়োক্নখি।

৭. মসিগী অৱাবা মরক্তা, ঐখোয়না নোংচুপ বেঙ্গল অমসুং ওরিশাদা নোংলৈ-নুংশিৎ অম্ফান মায়োক্নখি। দিজাস্তর মেনেজমেন্ত তীমশিং, কেন্দ্র অমসুং রাজ্যগী এজেন্সীশিংনা মতেং পাংবদগী মী শিবা হন্থহনখি। অৱাং-নোংপোক অমসুং নোংপোক থংবা রাজ্যশিংদা ঐখোয়গী মীয়াম ঈশিং ইচাউনা অকায়বা থোকহনখি। অৱাবা তারবশিং মতেং পাংনবা খুন্নাইগী কাংলুপ খুদিংমক্না পুনশিনবা উবদা অপেনবা পোকই।

ঐগী নুংশিরবা ইরৈচাশিং,

৮. লায়রবশিং অমসুং নোংমগী খুৎশুমল তাল্লগা হিংলিবশিং লাইচৎ অসিনা খম থেংনা শোকহনখি। মখোয়বু শৌগৎনবা য়াইফ-থৌরাং কয়া পায়খৎলে। সরকারনা প্রধান মন্ত্রী গরীব কল্যান য়োজনা হৌদোক্তুনা মীওই করোর কয়া হিংনবা লম্বী পীরে, লাইচৎ অসিনা থবক লেপখিবা, লৈফম হোংহনবা অমসুং অকাইবা পীখিবা অদু কোকহল্লে। পুকচেল চাউনা কোর্পোরেৎশিং, মীয়ামগী লুপশিং অমসুং মীয়াম্না শৌগৎতুনা থৌরাং কয়াগী মখাদা সরকারনা মখা তানা মতেং পাংলি।

৯. লায়রবশিংদা লেম্না চঙ পীবদগী ইমুং অমত্তা চারা হেন্দ্রে। থা খুদিংগী লায়রবা মীওই করোর ৮০ হেনবদা মতেং পাংনবা মালেমদা খ্বাইদগী চাউবা লেম্না চানবা পোৎলম পীননবা থৌরম অসি ২০২০গী নবেম্বর ফাওবা শাংদোকলে। কোইনা চৎলগা থবক শুরিবা রেসন কার্দ পায়বা শিন্মীশিং লৈবাক অসিগী মফম অমদা হেক্তা চেঙ ফংনবা রাজ্য খুদিংমক ‘লৈবাক অমা-রেসন কার্দ অমা’গী স্কিম চৎনরে।

১০.‘বন্দে ভারত মিশন’গী মখাদা মালেমগী তোঙান-তোঙানবা লৈবাকশিংদা পন্দুনা লৈরম্বা ভারতমচা লাখ ১০ হেন্না পুরকখ্রে। মীয়াম চৎথোক-চৎশিন তৌনবা অমসুং পোৎ-চৈ পুনবা হৌজিক ওইরিবা অরুবা ফিবমশিং অসিদা ভারত রেৱেজনা ত্রেনশিং থারি।

১১. ঐখোয়গী থৌনাদা থাজবা লৈবদগী, অতোপ্পা লৈবাকশিংনা কোবিদ-১৯ থেংনবদা ঐখোয়না মতেং পাংলি। হিদাক-লাংথকশিং পীনবা হায়জরকপদগী, অৱাবা তারবা মতমদা লৈবাক অসিনা মালেমগী মীয়ামগীদমক লৈরি হায়বা ভারতনা অমুক হন্না উৎখি। লাইচৎ অসি মপুংফানা লাকশিন্নবা মফম অমগী ওইবা অমসুং মালেমগী ওইবা লাল্লোংশিং পুথোকপদা ভারতনা মাংজিল থারি। ভারতনা মতেং পাংবদা অপেনবা পোকপদগী য়ুনাইতেদ নেসন্স সেক্যুরিতী কাউন্সিলদা নন-পর্মনেন্ত সীৎকী মীখলদা মাইপাকখিবা অসি ঐখোয়না মালেমগী অফবা থবক তৌবদগী ফংলিবা কান্নবগী খুদমনি।

১২. ঐখোয় খক হিংনবা ঐখোয় ইশাগী থবক তৌবা নত্তবা, অদুবু মালেম অসিগী য়াইফনবা থবক তৌবা অসি ভারতকী চৎনবীনি। ভারতকী মশাগী ওক্নবা পুথোকচবা অসিগী ৱাহন্থোক্তি মালেমদগী তোখাইনা লৈতনা নৎত্রগা নাইতোম লৈবা নত্তনা মশাগী কোন্ননবা পুথোকচবা হায়বনি। মসিগী শক্তম অসি ঙাক্না থবক তৌরিঙৈদা ভারতনা মালেমগী শেনমিৎলোনগা লোইননা মখা তানা থবক তৌমিন্নগনি।

ঐগী নুংশিরবা ইরৈচাশিং,

১৩. চহি কয়াগী মমাংদা ঐখোয়গী সাধুশিংনা হায়খি: মালেমগী মীয়াম অসি ইমুং অমনি; ‘বাসুধৈব কুতুম্বকম’ মসি হৌজিক মালেম্না খঙলে। অদুবু মীওইবা খুন্নাইগী মাংদা তারিবা খ্বাইদগী চাউবা শিংনবশিং থেংননবা মালেমগী মীয়াম পুনশিনবা দরকার ওইরিঙৈ চৈরক অসিদা, ঐখোয়গা য়ুমথংনবা লৈবাক খরনা লম লৌশিন্নবা মখোয়গী অরানবা থবকশিং চৎথরি। ঐখোয়গী ঙমখৈশিং ঙাক্নবা ঐখোয়গী থৌনা ফরবা লান্মীশিংনা মখোয়গী থৱায় কৎলি। ভারত মাতাগী মতিক চারবা মচাশিং লৈবাক্কীদমক হিংলি অমসুং থৱায় থারি। গালৱান তম্পাক্তা থৱায় থাখ্রবা অথৌবশিং লৈবাক অসিনা ইকায়খুম্নবা উৎলি। মখোয়গী ইমুং-মনুংগী মীওইশিংদসু ভারতমচা খুদিংমক্না ইকায়খুম্নবা উৎলি। লানফমদা উৎখিবা মখোয়গী থৌনা অদুনা ঐখোয়না শান্তিদা থাজবা থম্লিঙৈদা, খুৎ থানবা হোৎনরকপদা মতিক চাবা পাউখুম পীনবা ঐখোয়গী থৌনা লৈরি হায়বা উৎলে। ঐখোয়গী ঙমখৈশিং ঙাক্লিবা অমসুং ঐখোয়গী লৈবাক মনুং ঙাক্লিবা ঐখোয়গী লান্মীশিং, পেরামিলিতরী ফোর্সশিং অমসুং পুলিসকী মীওইশিংগীদমক ঐখোয় চাউথোকচবা পোক্লি।

১৪. কোবিদ-১৯ থেংনবা মতমদা পুন্সি অমসুং হিংনবা লম্বী অনিমক মরুওই হায়বা ঐনা থাজৈ। হৌজিক থেংনরিবা অৱাবা অসি লৌমীশিং অমসুং অপীকপা ওন্ত্রপ্রিনরশিং কান্নবা ফংনবা শেন-থুমগী ফিবম অমুক ফগৎলক্নবা অওনবশিং পুরক্নবা খুদোংচাবা অমনি হায়না ঐখোয়না থাজৈ। লৌউ-শিংউগী লমদা অচৌবা অহোংবশিং পুরক্লে। হৌজিক লৌমীশিং অথিংবা লৈতনা ললোন-ইতিক পাংথোকপা য়ারগনি অমসুং লৈবাক্কী মফম অমদা হেক্তা মখোয়গী পোৎথোকশিং খ্বাইদগী য়াম্বা মমলদা য়োনবা য়ারগনি। লৌমীশিংদা অপনবা পীরম্বা নিয়ম খর লৌথোক্নবা ইসেন্সিএল কমোদিতিস এক্ত শেমদোক্লে। মসিনা লৌমীশিংগী শেন্থোক হেনগৎহনবদা মতেং পাংগনি।

ঐগী নুংশিরবা ইরৈচাশিং,

১৫. ২০২০দা ঐখোয়না অরুবা পারা খর তম্লে। মীওইবনা মহৌশাগী মপুনি হায়বা মঙলান অদু মীৎনা উবদা ঙমদবা ভাইরসনা থুগাইরে। মীওইবনা মসিগী লম্বী চুমথোকপা অমসুং মহৌশাগা নুংশিন্না হিংমিন্নবা অসি হৌজিক য়াম্না থেংবা নত্তে হায়বা ঐনা থাজৈ। অইং-অশাগী খল হোংলকপদা ৱাখল তাহল্লকপা অসিগুম্না লাইচৎ অসিনা মালেমগী মীয়াম মিকপ থোকহল্লে। হৌজিক লৈরিবা ফিবম অসিদা ‘শেনমিৎলোন্দা য়ুম্ফম ওইবা থবকশিং’দগী ‘মীওইবদা য়ুম্ফম ওইবা মতেং পাংনবা’ অসিনা হেন্না মরুওই হায়না ঐনা খল্লি। মসিদা হেন্না অহোংবা পুরকপনা মীওইবা খুন্নাইগী হেন্না অফবা ওইগনি। ২১শুবা চহিচা অসি মীওইবনা খেন্নবশিং নাকলদা থম্লগা গ্রহ অসি কন্নবা পুন্না থবক তৌমিন্নবা চহি চা অমা ওইনা নীংশিংগদবনি।

১৬. অনিশুবা পারাদি মহৌশা লাইরেম্বীগী মমাংদা ঐখোয় খুদিংমক অমত্তনি অমসুং হিংনবা অমসুং চাউখৎনবা ঐখোয় খুদিংমক ঐখোয়গা লৈমিন্নরিবশিংগী মখা পোল্লি হায়বনি। মীওইবা খুন্নাইনা শেম্লিবা খুৎশেমগী খেন্নবশিং কোরোনাভাইরসনা খঙদে। মীওইবনা শেম্বা খেন্নবশিং অমসুং অথিংবশিং নমখাইদুনা থবক তৌবা ঐখোয় দরকার ওইরে। মীনুংশিং খঙবা অমসুং অমগা অমগা মতেং পাংনবা অসি ভারতকী মীয়াম্না মরুওইবা গুনশিং ওইনা লৌরি। মসিগী অফবা গুন অসি ঐখোয়গী থবকশিংদা মখা তানা লৈহনবা ঐখোয় দরকার ওইরি। ঐখোয় মীওইবা খক্তনা ঐখোয় পুম্নমক্কী হেন্না ফবা তুংগী ফিবম অমা শেম্বা ঙমগনি।

১৭. অহুমশুবা পারাদি হকশেলগী মচাক-মথুমশিং ফগৎহনবগী মতাংনি। কোবিদ-১৯ থেংননবা সরকারগী হোস্পিতালশিং অমসুং লেবোরেতোরীশিংনা মাংজিল থারি। লাইচৎ অসি থেংনবদা সরকারগী হকশেলগী থবকশিংনা লায়রবশিং মতেং পাংলি। মসিদা, সরকারগী হকশেলগী মচাক-মথুমশিং পাকথোক-চাউথোকহনবা দরকার ওইরে।

১৮. মরিশুবা পারাদি সাইন্স অমসুং তেক্নোলোজীগী মতাংনি। সাইন্স অমসুং তেক্নোলোজীগী লমদা চাউখৎ-থৌরাংগী থবকশিং য়াংশিনহনবা দরকার ওইরে হায়বা লাইচৎ অসিনা তাক্লে। লোকদাউন মনুং অমসুং হাংদোরকপা মতমদা, লৈবাক ঙাকপা, লাইরিক তম্বা, ললোন-ইতিক, ওফিসকী থবকশিং অমসুং মীয়ামগা পাউ ফাউনবদা ইনফোরমেসন অমসুং কম্যুনিকেসন তেক্নোলোজী অসি অফবা খুৎলায় অমা ওইরে। পুন্সি কয়া কনবা অমসুং মহৌশাগুম থবক অমুক হৌবদা মসিনা মতেং পাংলে।

১৯. ভারত সরকার অমসুং রাজ্য সরকারশিংগী ওফিসশিংনা মখোয়গী থবকশিং পাংথোকপদা ভর্চুএল ওইনা উনবগী থবকশিং ফজনা পাংথোকলে। অচুম্বা ৱায়েল পীনবা জুদিসিয়রীনা ভর্চুএল কোর্ত প্রোসিদিংশিং পাংথোক্লে। রাস্ত্রপতি ভবন্দসু ভর্চুএল কনফরেন্স পাংথোক্নবা তেক্নোলোজী শীজিন্নরে অমসুং থবক কয়া পাংথোক্লে। ইনফোরমেসন অমসুং কম্যুনিকেসন তেক্নোলোজীগী খুৎলায়শিং অসি ই-লার্নিং অমসুং লাপ্না লাইরিক তম্বদা শীজিন্নরে। য়ুমদগী থবক শুবা অসি চৎনবী ওইরে। তেক্নোলোজীনা মরম ওইদুনা সরকার অমসুং লনাইগী ওফিস খরদা মতম হেন্না থবক শুবা ঙমহল্লে। অসুম্না ঐখোয় তুংকোইনা হিংনবা অমসুং চাউখৎপদা মতেং পাংনবা মহৌশাগা নুংশিন্না হিংমিন্ননবা, ঐখোয়না সাইন্স অমসুং তেক্নোলোজী শীজিন্নবগী পারা তম্লে।

২০. হায়রিবা পারাশিং অসি মীওইবা খুন্নাইদা কান্নগনি। তুংগী মীরোলশিংনা পারা অসি ফজনা খঙলে অমসুং ভারতকী তুংগী ফিবম মখোয়গী মখুৎতা লৈরে হায়না ঐনা থাজৈ। হৌজিক ঐখোয় খুদিংমক্কী অৱাবা মতমনি, ঐখোয়গী নহারোলশিংনা হেন্না ৱাবা মতমনি। ঐখোয়গী মহৈলোয়শঙশিং থিংজিনবা অসিনা ঐখোয়গী নুপীমচাশিং অমসুং নুপামচাশিং লাংতক্নহল্লে, মতমগী মতুংইন্না মখোয়গী মঙলানশিং অমসুং অনীংবশিংদা উরুম লাংশিল্লে। মসিগী অৱাবা মতম অসি কুইরোই অমসুং মখোয়গী মঙলানশিং থাদোক্লোইদবনি হায়না মখোয়দা নীংশিংহনবা ঐনা পাম্মি। অসিগুম্বা অৱাবা তানফম কয়াগী মতুংদা খুন্নাইশিং, শেন-থুমশিং অমসুং লৈবাকশিং অমুক হন্না শেমগৎপগী পুক্নিং লৌশিং ওইরবা খুদম কয়া পুৱারীদা মরাংকাইনা য়াওরি। ঐখোয়গী লৈবাক অমসুং নহারোলগী তুংগী অফবা ফিবম অমা লৈরি হায়বা ঐনা থাজৈ।

২১. ঐখোয়গী অঙাংশিং অমসুং নহারোলশিংদা তুংকোইনা চৎনগদবা লাইরিক-লাইসু তম্বীবা ফংহন্নবা নেসনেল ইজুকেসন পোলিসী চৎন্নবা কেন্দ্র সরকারনা ৱারেপ লৌরে। মসিগী থৌশিল অসি চৎনবদগী, অনৌবা মগুন লৈবা লাইরিক তাকপী-তম্বীবগী থবক চাউৎলগনি অমসুং মসিনা তুংদা থেংনগদবা শিংনবশিং খুদোংচাবশিং ওন্থোক্কনি অমসুং অনৌবা ভারত অমগী লম্বী শেমগনি। মখোয়না পামজবা অমসুং হৈশিংবগী মতুংইন্না ঐখোয়গী নহারোলশিংনা মখোয়গী সবজেকশিং মনীংতৌনা খনবা য়ারগনি। মখোয়গী তৌবা ঙম্বশিং থবক্ত ওন্থোক্নবা খুদোংচাবা মখোয়না ফংলে। অসিগুম্বা থৌনা অসিনা ঐখোয়গী তুংগী মীরোলশিংনা থবক ফংবা ঙম্বা খক নত্তনা অতোপ্পশিং থবক ফংনবগী খুদোংচাবশিং শেমগনি।

২২. নেস্নেল ইজুকেসন পোলিসীনা মিৎয়েং শানবা পান্দম অমা থম্লি। মসিনা লাইরিক-লাইসু তাকপী-তম্বীবগী লমদা ‘ইনক্লুজন, ইন্নোবেসন অমসুং ইন্সতিত্যুসন’গী চৎনবী মপাঙ্গল কনখৎহনগনি। নহারোলশিংগী ৱাখল মশা মরোমদোম চাউখৎহনবদা মতেং পাংনবা মমা লোন্দা লাইরিক তম্বীনবা থবক পায়খৎলে। মসিনা ভারতকী লোনশিং অমসুং লৈবাক্কী অপুনবগী শক্তম মপাঙ্গল কনখৎহনগনি। মপাঙ্গল কনবা লৈবাক অমা শেমগৎনবা নহারোলশিংদা শক্তি পীবা তঙাইফদে। নেসনেল এজুকেসন পোলিসী অসি মাইকৈ অসিদা থাংলকপা অচুম্বা খোঙথাং অমনি।

ঐগী নুংশিরবা ইরৈচাশিং,

২৩. নুমিৎ ১০গী মমাংদা, অয়োধ্যাগী শ্রী রাম জন্মভুমিদা লাইশঙ শাবা হৌখ্রে। মসি পুম্নমক্কী চাউথোকচনীংঙাই ওইবা মিকুপ অমনি। লৈবাক অসিগী মীয়াম্না মতম কয়া খাংদুনা লাক্লি অমসুং জুদিসিএল সিস্তেমদা চিংনবা লৈতনা থম্লিবা থাজবা অদু অমুক হন্না উৎলে। মরী লৈনবা কাংবুশিং অমসুং মীয়াম্না সুপ্রীম কোর্তকী ৱায়েন ইকায়খুম্নবা উৎতুনা য়ারে অমসুং মালেমগী মমাংদা ভারতকী শান্তি, অহিংশা, নুংশিনবা অমসুং পুন্না হিংমিন্নবগী চৎনবীশিং অদু উৎলে। শিংথানীংঙাই ওইরবা মখোয়গী থবকশিং অদুগীদমক ঐনা ঐগী মীয়াম থাগৎলি।

ঐগী নুংশিরবা ইরৈচাশিং,

২৪. ভারতনা নীংতম্বা মতমদা, গনতন্ত্রদা ঐখোয়গী চাংয়েং তুংকোইনা চৎলোই হায়না মীওই কয়ানা মাংজৌন্না হায়খি। ঐখোয়গী লৈবাক ঙাকপদা অমসুং গনতন্ত্রগী নিয়মশিং ইনবদা ঐখোয়গী অরিবা চৎনবীশিং অমসুং মশিং য়াম্লবা খেন্নবশিংনা অপনবা ওইগনি হায়না মখোয়না উখি। অদুবু ঐখোয়না মখোয় অদু ঐখোয়গী পাঙ্গল ওইনা শেমগৎতুনা মালেমদা খ্বাইদগী কনবা গনতন্ত্র চৎপা লৈবাক অমা ওইরে। মীওইবা খুন্নাইগী হেন্না য়াইফনবা ভারতনা মখা তানা মাংজিল থানা থৌদাং লৌরি।

২৫. লাইচৎ লাকশিন্নবা নখোয় ময়াম্না উৎলিবা খাংবা কনবা অমসুং লৌশিং মালেম শীনবা থুংনা থাগৎলি। নখোয়না মখা তানা চেকশিন্না অমসুং দাইত্ব লৈনা থবক তৌগনি হায়না ঐনা থাজবা থম্লি।

২৬. মালেমগী শান্তি হেনগৎহন্নবা, অচুম্বা ৱাখল্লোল অমসুং পুক্নীং-ৱাখলগী থৌনা হেনগৎহন্নবা মালেমগী মীয়ামদা ঐখোয়না পীগদবা কয়া লৈরি। মসিগী ৱাখল্লোন অসিগা লোয়ননা, খুদিংমক অমসুং পুম্নমক য়াইফনবা ঐনা লাইশোল অমা পীরি:

সর্বে ভবন্তু সুখিনঃ সর্বে সন্তু নিরাময়াঃ।

সর্বে ভদ্রাণি পশ্যন্তু, মা কশ্চিৎ দুঃখভাগ্ ভবেৎ।।

হায়বদি -

পুম্নমক হরাওবা ওইরসনু,

পুম্নমক অনা-অয়েক লৈতবা ওইরসনু,

পুম্নমক অচুম্বা করিনো খঙবা ওইরসনু,

কনাগুম্বা অমত্তা ৱাদবা ওইরসনু।

মালেম পুম্বা য়াইফনবগীদমক পাউজেল অসি, মীওইবা খুন্নাইদা ভারতনা পীবা অখন্নবা খুদোলনি।

২৭. ঐনা অমুক্কা হন্না ময়াম ৭৪শুবা নীংতম্বা নুমিৎকী নুংঙাইবা ফোংদোকচরি। অদোম পুম্নমক্কী হকচাং ফনা লৈনবা অমসুং হেন্না ফবা তুংলমচৎ অমগীদমক ঐনা য়াইফ-পাউজেল পীজরি।

অদোমবু থাগৎচরি,

জয় হিন্দ!

***