কেন্দ্রগী রাজ্য মন্ত্রী (ইন্দিপেন্দেন্ত চার্জ), দিবেলপমেন্ত ওফ নোর্থ ইস্তর্ন রীজন (দোনর), এম.ও.এস. পি.এম.ও., পব্লিক গ্রাইবেন্সস, পেন্সন, এতোমিক ইনর্জী অমসুং স্পেসকী মন্ত্রী দাঃ জিতেন্দ্র সিংহনা ঙসি মফমসিদা ঐখোয়না ভারতকী স্পেস প্রোগ্রামগী মপা হায়না খংনরিবা দাঃ বিক্রম সারাভাইগী মপোক্কী চাম্মা শুবা চহি পালন তৌবগী লোইশিল্লকপা অসিদা আই.এস.আর.ও.না মঙোন্দা ইকায় খুম্নবগী অখন্নবা মওং অমা উৎপা ওইনা চন্দ্রয়ান ২না থাদা লৈবা “সারাভাই” কোংকুৎকী ফোতো লৌরে হায়না লাউথোক্লদুনা দাঃ বিক্রম সারাভাইদা ইকায় খুম্নবা উৎখ্রে।
 

দাঃ সারাভাইগী চাম্মাশুবা মপোক কুমওনগী থৌরম অসি ওগস্ত ১২দা লৈখ্রবনি অমসুং মসিনা মহাক্কী মফমদা পীবা থাগৎপগী ইকায় খুম্নবা অমনি হায়না দাঃ জিতেন্দ্র সিংহনা হায়খি অমসুং হন্দক্কী হৌখিবা মতমশিং অসিদা আই.এস.আর.ও.না মায় পাকখিবশিং অসিনা ভারতপু মালেমগী লৈবাকশিংগী মাংদা থম্লিবা অসি সারাভাইনা মঙলম্বা মঙলান অদুবু ওইথোকহনবনি হায়না মখা তানা হায়খি।

 “সারাভাই” কোংকুৎ অসি দাঃ বিক্রম সারাভাইগী মমিং লৌদুনা থোনখিবনি অমসুং মসিগী নোঙপোক্তগী চাউরাক্না কিলোমীতর ২৫০দগী ৩০০ ফাওবগী অরাপ্পা মফমদা এপোলো ১৭ অমসুং লুনা ২১ মিসন্না থা লৈবাক্তা তাখিবা মফমশিং লৈ।

দাঃ জিতেন্দ্র সিংহনা হায়খিবদা ভারতকী ৭৪শুবা নিং-খা তম্বগী নুমিৎ অসিদা আই.এস.আর.ও.না  দাঃ সারাভাই অমসুং মহাক্কী কাংবুশিংনা দিকেদ ৬ হেনবগী মমাংদগী হৌনা খুদোংচাদবা কয়া থেংনদুনা নিংহন্নবা লৈতনা হৌদোক্লম্বা ভারতকী মশক থোক্তুনা লৈরবা স্পেসকী খোঙচত্তা অনৌবা মায় পাকপগী থবক অমসু হাপচিল্লে হায়খি।  মহাক্না হায়খিবদা ঐখোয়দগী হান্ননা স্পেস্কী খোঙচৎ হৌখিবা লৈবাক কয়া অমনসু ভারতকী স্পেস মিসন্না পীরকপা ইনপুৎশিং অসি শিজিন্নরিবা অসিদা ভারত মচা পুম্নমক চাউথোকচবা অমসুং থাজবনা থল্লে হায়না হায়খি।

আই.এস.আর.ও.গী পাউগী মতুং ইন্না, ৩দি.দা নম্বা ফোতো  অসিনা সারাভাই কোংকুৎ অসি মসিগী ৱাংখত্তুনা লৈবা মচিন্দগী পাবদা কিলোমীতর ১.৭মুক লুই অমসুং মসিগী অঙম্বা অসি ২৫দগী ৩৫ দিগ্রী ফাওবা ওই হায়রি। মসিগী ই-পাউ অসিনা লাবানা থন্না লৈরবা থাগী মফমশিংবু নীংথিনা খঙবদা সাইন্তিস্তশিংদা মতেং পাংগনি।

চন্দ্রয়ান ২ অসি মসিবু শেম-শাখিবা মওংগী মতুং ইন্না লেপ্তনা মথৌ তৌরি অমসুং য়াম্না কান্নরবা অমসুং মরু ওইবা সাইন্তিফিক দেতা কয়া অমা পীরক্লি হায়না পাউদমখি। চন্দ্রয়ান-২গী সাইন্তিফিক দেতাশিং অসি মালেমগী মীয়াম্না শিজিন্নবা য়ানবা ওক্তোবর ২, ২০২০দগী থাদোকপা হৌগনি।

<><><><><>