কেন্দ্রগী মাইক্রো, স্মোল অমসুং মেদিয়ম ইন্তর্প্রাইস অমসুং রোদ ত্রান্সপোর্ত অমসুং হাইৱে মন্ত্রী শ্রী নিতিন গদকরিনা অনৌবা পোলিসী কয়া শেম্নবগীদমক্তা ৱাখল খনবা মীওইশিংনা সেক্তর অমসুং ইন্দস্ত্রীশিংগী লৈমায়গী থাক্তা লৈবা খুদোংচাদবা কয়া য়েংশিন্দুনা মখোয়না হায়রকপশিং খন্নবগী থৌওংদা মিৎয়েং চংগদবনি হায়খ্রে। মহাক্না ৱাফম অসি ৱেবিনার অমদা ৱা ঙাংবদা হায়খিবনি। এম.এস.এম.ই.গী মেম্বর বোদিশিং অমসুং এফ.আই.সি.সি.আই.গী সেক্তোরেল এসোসিএসনগা ৱারী শাবদা মহাক্না প্লাস্তিক, ফি-রোল, শউন, ফার্মাস্যুতিকেলসনচিংবা সেক্তর অমসুং ইন্দস্ত্রীশিংগা মরী লৈনবা খুদিংমক মশাগী তোপ তোপ্পা খুদোংচাদবা কয়া লৈ হায়খি। মহাক্না এফ.আই.সি.সি.আই. অমসুং মরী লৈনবা অতোপ্পা  ইন্দস্ত্রীশিংনা ৱাখল খনবা মীওইশিংগী খুত্থাংদা মখোয়গী লৈমায়গী থাক্তা লৈবা খুদোংচাদবা কয়া খঙদোক্তুনা মখোয়না হায়বশিং অদু খঙহল্লক্তুনা খুদোংচাদবশিং অসিগী ৱারোইশিন পুরকপা য়াবা পোলিসী শেম্বগী ৱারেপ লৌবদা তেংবাংনবা হায়খি। 

মহাক্না ইন্দস্ত্রীগী লুপশিং অসিনা আত্মা নির্ভর ভারত অভিয়ানগী খোঙথাংদা শরুক য়াদুনা মীরমদগী পোত্থোক লৈবদা চংলিবা শেনফমশিং অসি হন্থহন্দুনা লৈবাক অসিগী পোত্থোক পুথোকপগী থৌওং অমসুং পথাপশিংদা হেন্না চাউখৎহন্দুনা অহেনবা থবক পীবগী খুদোংচাবা শেম্নবা হায়খ্রে।

 “ঐখোয়না খুঙ্গং, ত্রাইবেল অমসুং লৌউ-শিংউবগী মফমশিংদা মরু ওইবা মিৎয়েং থমদুনা লৈবাক শিনবা থুংনা ইন্দস্ত্রীগী ক্লস্তর শেম্নবা কন্না হোৎনরি” হায়না শ্রী গদকরিনা হায়খ্রে। সোসিএল মাইক্রো ফাইনান্স ইন্সতিত্যুসনশিংগী পোলিসী শেম্বা লোয়রে হায়না মহাক্না হায়খি অমসুং মসিনা য়াম্না পিকপা ওন্তোপ্রিনরশিং, কারবার অমসুং দুকান ফম্বশিংদা লুপা লাখ ১০ ফাওবগী শেল থাদবা য়াহল্লগনি হায়না মহাক্না মখা তানা হায়খি।

সোসিএল দিস্তেন্সিং তৌবনা অনৌবা মহৌশা ওইরকপা অসিনা এম.এস.এম.ই.শিংবু ওতোমেসন অমসুং দিজিতাইজ তৌবা অসি পাক শন্না পাঙথোক্কদবনি হায়বগী ৱাফমসু মন্ত্রীনা ফোঙদোকখি।

ইন্দস্ত্রীগী লুপশিংগী মীহুৎশিংদা মকোক থোংবা এম.এস.এম.ই. ৫০,০০০গী ওনলাইনগী দাইরেক্তোরী অমা শেম্নবা হায়খ্রে অমসুং মসিগা লোয়ননা অতোপ্পা পাউতাক কয়া পীরকপগা লোয়ননা আত্মা নির্ভর ভারত অভিয়ানগী পান্দম ফংনবা মপুং ফানা শৌগৎলক্নবসু হায়খ্রে।

******