ভিদিও কনফরেন্সকী খুৎথাংদা পাংথোকপা ইনভেস্ত ইন্দিয়া এক্সক্লুসিপ ইনভেস্তমেন্ত ফোরম-জপান ইদিসনগী অহুমসুবা ইদিসনদা ৱা ঙাংবদা কমর্স অমসুং ইন্দস্ত্রি মিনিস্তর পিয়ুস গোয়ালনা হায়খি মতিক চারবা ইনভেস্তরশিং ওইরম্বদগী চান্নরবা মরুপশিং ওইনবা ভারত অমসুং জপান্না মিৎয়েং থম্লি । ভারত অমসুং জপানগী ললোন-ইতিক্কী থবকশিং পাকথোক-চাউথোক্নবা জপানগী কম্পেনিশিংগী দিজিতেল রোদসো অসি য়াম্না মরুওই। য়ানদবা অমা লাকপদা মতমদা ঐখোয়না লাইনা য়ানবা পুরকপা ঙমগনি হায়না ঐনা থাজবা থম্লি। মদু জিও-পোলিতিকেল , ঙাক-শেন, ললোন-ইতিক, শেন-থুম অমসুং ইন্দস্ত্রিগী ওইবা য়াই অমসুং মরুওইনা জপান অসি খ্বাইদগী মরুওইবা অমসুং থাজবা ললোন-ইতিক্কী মরুপ অমনি।

মিনিস্তরনা হায়খি মালেম অসি কোবিদ-১৯গী অৱাবদগী ফগৎলকপদা লোয়ননা ললোন-ইতিক মখা চৎথনবা ভারত সরকারনা লাল্লোংশিং থৌরাং তৌবা খক নত্তনা ভারত্তা মালেমগী ইনভেস্তরশিং মখা তানা তরাম্না ওক্নবা থৌরাং তৌরে। য়াম্না মরুওইবা অমনা লৈবাক অসিনা হৌজিক ওইরিবা ফিবম অসি অফবা খুদোংচাবা অমা ওন্থোক্লে অমসুং অহোংবা কয়া পুরক্লে অমসুং ৱাল্দ বেঙ্কগী ইজ ওফ দুইং বিজিনেসদা হৌখিবা চহি মঙাদা ৬৫শুবা মফমদা লৈবা ঙম্লে। মসি থবক ওইনা পাংথোক্নবা ভারত সরকার অমসুং রাজ্য সরকারশিংনা য়াম্লবা থৌশিল কয়া হৌদোকপদগীনি।  

ইন্দো-জপানগী অচেৎপা মরীগী মতাংদা মিনিস্তরনা হায়খি, শেন-থুম অমসুং ঙাক-শেনগী লমশিংদা লৈবাক অনিগী অপাম্বশিং শরুক য়ামিন্নরি। ভারত অমসুং জপানগী মরক্তা লৈনরিবা শেন-থুমগী মরীশিং হেন্না ফগৎহন্না খুদোংচাবা কয়া লৈরি। ভারতকী পাক-চাউরবা কৈথেল য়াওনা মরম কয়াদগী জপান্না ভারত পাম্বা হেনগৎলক্লি। লৈবাক অসিগী য়াম্লবা মীশিং অমসুং কঞ্জুমরশিং অসিনা মরম ওইদুনা ভারত অসি জপান্না শেন থাদনবা খ্বাইদগী পাম্বা মফম অমা ওইরে। হৌজিক ভারত্তা জপানগী কম্পেনি ১৪০০ হেন্না থবক তৌরি অমসুং লৈবাক অসিদা ললোন-ইতিক্কী ফার্ম ৫০০০ হেন্না লৈরি অমসুং জপানগী ইনাওশিং অমসুং ইচলশিং ১০০০০ হেন্না ভারত্তা নুংঙাইনা অমসুং কান্নবা পুন্সি মহিং অমদা লৈরি।

মিনিস্তরনা হায়খি, ওতোমোবাইল, কেমিকেলস, কঞ্জুমর গুদস, চীঞ্জাক শেম-শাবা য়াওনা তোঙান-তোঙানবা হিরমশিংদা জপান অমসুং ভারত মতম শাংনা মরী লৈনদুনা লৈনদুনা লাক্লি অমসুং ঙসিদি দিজিতেলনা খুদোংচাবা কয়া পীরে। তেক্নিকেলগী লমদা মতেং পাংন্নবা মিৎয়েং থম্লি অমসুং হৌজিক ঐখোয়না জপান অসি ঙাক-শেন অমসুং শেন থাদবগী মরুপ অমা ওইনা লৌরি। রাজনিতি, শেন-থুম অমসুং ঙাক-শেনগী অপাম্বশিং অদুগী মখা তারকপা ওইনা লৈবাক অনিগী  মরক্তা কয়ারক উন্নরে অমসুং ৱারি শানখ্রে। সাইন্স, তেক্নোলোজি অমসুং ইন্নোবেসনগী লমদা শিংথানিংঙাই ওইবা মওংদা মতেং পাংনবা হেনগৎলে।

জপান সরকারগী ইকোনোমি, ত্রেদ অমসুং ইন্দস্ত্রিগী মিনিস্তর হিরোসি কাজিয়ামানা মহাক্কী ৱারোলদা, নাকল অনিগী মরী মখা তানা ফগৎহন্নবা মহাক্কী লৈবাক্কী অপাম্বা অদু অমুক হন্না ফোংদোকখি। জপান সরকারগী ইকোনোমি, ত্রেদ অমসুং ইন্দস্ত্রিগী ভাইস মিনিস্তর সিগেহিরো তানাকানা ‘ইন্দিয়া-জপান ইন্দস্ত্রিএল কম্পিতিতিপনেস পার্তনরসিপ; হায়বা হিরমদা ৱা ঙাংখি। জেত্রোগী চেয়রমেন, নোবুহিকো সাসাকিনা ভারত্তা থবক তৌরিবা জপানগী কম্পেনিশিংগী মতাংদা ৱা ঙাংখি।

ইন্দস্ত্রি অমসুং ইন্তরনেল ত্রেদ দিপার্তমেন্তগী সেক্রেতরি দোক্তর গুরুপ্রসাদ মহাপত্রানা হায়খি লৈবাক অনিগী মরক্তা শেন-থুমগী মরীশিং কনখৎহন্নবা অমসুং লৈবাক অসিদা পোৎ-চৈ শাবগী থবক ফগৎহন্নবা পান্দমদা অসামদা জপানগী ১৩সুবা ইন্দস্ত্রিএল তাউন অমা লিংখৎনবা ভারতনা থৌরাং তৌরি। মখোয়না লৈবাক শীনবা থুংনা লৈরিবা ইন্দস্ত্রিগী মফমশিং অমসুং ক্লস্তরশিংগী জি.এস.আই য়াওবা দেতা বেজ অমা শেমগৎনবা থবক পায়খৎলি।

ৱেবিনার অদুদা সরকারগী সেনিয়ার ওফিসিএলশিংনা ভারতকী চৎন-কাংলোনশিং অমসুং শেন থাদবগী অনৌবা খুদোংচাবশিং, ইলেকত্রোনিক্স অমসুং ইনফোরমেসন তেক্নোলোজি, তেক্সতাইল, ওতোমোবাইল, ফুদ প্রোসেসিং অমসুং হিদাক-লাংথক শুংবগী লমদা লৈরিবা মচাক-মথুমশিংগী মতাংদা পাউদমখি।

****