প্রধান মন্ত্রী শ্রী নরেন্দ্র মোদীনা ঙসি অয়োধ্যাগী “শ্রী রাম জন্মভুমী মন্দির”দা ভুমী পুজা পাঙথোকখ্রে।

ভারতকী মায় পাকপা তাঙ্কক অমা

থৌরম অসিদা ৱা ঙাংবদা প্রধান মন্ত্রীনা শেংলবা থৌরম অসিদা লৈবাক মচাশিং অমসুং রাম নীংবশিংবু থাগৎপা ফোঙদোকখি। মসিবু পুৱারী ওইবনি হায়রদুনা মহাক্না ভারতনা ঙসিদগী লৈবাক পুম্বগী মীওইশিংনা চহি-চা কয়াদগী ঙাইজরক্লবা অমসুং মখোয়গী মপুন্সিদা অমুক উগনি হায়না থাজরুদ্রবা পান্দম অমা ফংদুনা মায় পাকপগী তাঙ্কক অমা হৌরবনি হায়না হায়খ্রে। রাম জন্মভুমী অসি কায়থরুবদগী নৌনা অমুক হৌগৎলক্লে অমসুং তেন্ত খন্দুনা লৈরমবদগী হৌজিক চাউরবা লায়শঙ অমা ওইনা শারগনি হায়না মীয়ামদা হায়খি।  

লৈবাক্কী মীয়াম পুম্বনা কত্থোকখিবগী মহুৎ শিল্লিবা ওগস্ত ১৫গুম্না ঙসিগী নুমিৎ অসিনসু রাম মন্দির অমা লৈনবগীদমক্তা মীওই কয়ানা চারোন-শুরোন নাইদনা লেপ্তনা কত্থোক্তুনা লাক্লিবা কয়া অদুগী মশক তাক্লগনি হায়না প্রধান মন্ত্রীনা হায়খ্রে। রাম মন্দিরগী মঙলান অসিবু মঙফাওননবা ৱানা হোৎনখিবা মীওইশিংবু মহাক্না নীংশিংদুনা ইকায় খুম্নবা উৎখ্রে।

শ্রী রাম- ঐখোয়গী নাৎকী য়ুম্বী

শ্রী রাম লৈরম্বগী মমি অসি মুত্থৎনবা থৌরাং কয়া অমা পাঙথোকখ্রবসু মহাক্না অরেপ্পা লৈতনা ঐখোয়গী নাৎকী য়ুম্বী ওইদুনা লৈরি হায়না প্রধান মন্ত্রীনা হায়খি। মহাক্না হায়খিবদা শ্রী রাম্না ঐখোয়গী নাৎ, থাজবা, লৈবাক্কী ইথিল অমসুং অপুনবা শক্তিগী হৌজিক্কী মতমগী খুদম অমা ওইদুনা লাক্কদৌরিবা চারোন-শুরোনশিংদা ইথিল পীগনি হায়খি।

নুমিৎ অসিনা কোতি কোতিগী মশিংদা লৈরিবা রাম্বু নীংজবা মীওইশিংগী থাজবা অমসুং খঞ্জবশিং অদু ওইথোকহল্লে হায়না প্রধান মন্ত্রীনা হায়খি। মমাংগী চহিদা সুপ্রীম কোর্ত্না লৈবাক মীয়ামগী অপাম্ববু য়েংদুনা ৱায়েল পীখিবা মতমদা লৈবাক মীয়াম্না হরাউনখিবা অদুবু থাগৎখি অমসুং মদুগা চপ মান্নবা হরাউবা অদু ঙসিসু উবা ফংলি হায়না মহাক্না হায়খি।

লায়রবা, শোত্থরবা, দলিৎ, ত্রাইবেলশিং পুম্বনা শরুক য়ামিন্নবদগী শ্রী রামগী মায় পাকখিবা, শ্রী কৃষ্ণনা গোবর্ধন থাংগৎখিবা, ছত্রপতি শিবাজীনা স্বরাজ শেম্বা ঙমখিবা, গান্ধীজিনা নিং-তম ইহৌ লুচিংবা ঙমখিবগী থৌওং কয়া অসি ওইথোকপা ঙম্লিবনি হায়না প্রধান মন্ত্রীনা হায়খি। মসিগা মান্ননা লৈবাক মীয়াম্না শৌগৎপদগী শ্রী রাম মন্দির অমুক্কা হন্না শাবা হৌবা ঙম্লিবনি হায়না মহাক্না হায়খি।

শ্রী রামগী লমচত-শাজৎ লয়াবু নীংশিংলদুনা প্রধান মন্ত্রীনা মহাক্না মতম পুম্বদা অচুম্বগীদমক্তা লৈখি অমসুং মহাক্কী লৈঙাক অসিগী য়ুম্ফমদি নুংশি-চান্ননা লৈবা খুন্নাইনা ওইখি হায়না হায়খি। মহাক্না মহাক্কী মীয়াম খুদিংবু অমত্তা ওইনা নুংশিখি অদুবু লৈত-লায়রশিংগী ওইনা তোঙানবা নুংশিবা অমসু লৈখি। শ্রী রামগী পুন্সিদা অতোপ্পদা ইথিল পীরোইদবা মতাং অমত্তা য়াওখিদে অমসুং মসিগী থৌওং অসি লৈবাক অসিগী নাৎ, ৱাখল্লোন, থাজবা অমসুং চৎনবীগী হীরম খুদিংদা উবা ফঙই।

শ্রী রাম – মান্নদবা কয়াবু পুনশিনবীরিবা লংলা

প্রধান মন্ত্রীনা হায়খি মদুদি শ্রী রাম্না মীয়াম্বু লমজিংবীরম্বা মঙাল অমনি হায়বসি অরিবা মতমদনা ভাল্মিকীগী রমায়ন, ময়াই ওইবা মতমদনা তুলিদাস, কবির অমসুং গুরু নানক্কী খুথাংদা ইদুনা তাক্লম্লে, হায়রিবসিমক মহাত্মা গান্ধীগী ভাজনশিংদসু অহিমশা অমসুং সত্যগ্রহগী শক্তি অমা ওইনা য়াওরি। ভগবান বুদ্ধসু শ্রী রামগা নক্না মরী লৈনৈ, অমসুং আয়োধ্যগী শহর অসি চহী চা কয়াগী মমাংদগী হৌদুনা জৈন থাজবশিংগী লৈফম ওইরম্মি হায়না মহাক্না মখা তাখি। তোঙান-তোঙানবা লোলশিংদা ইথোক্লম্লবা রমায়নবু পল্লদুনা প্রধান মন্ত্রীনা হায়খি, শ্রী রাম্না মান্নদবা কয়াবু অপুনবা ওইনা পুনশিনবীরম্বা লংলানি।

প্রধান মন্ত্রীনা পনখি মদুদি শ্রী রাম্বু লৈবাক কয়ানা নুংশিনা নীংনৈ। রমায়ন নীংথীনা খঙবা লৈবাকশিংগী মমিং মহাক্না পনখিবগী মনুংদা মুস্লিমশিংনা নম্না তাবা লম অমা ওইরিবা ইন্দোনেসিয়াসু য়াওরি, কেম্বোদিয়া, লাওস, মলেসিয়া, থাইলেন্দ, শ্রী লঙ্কা, নেপালনি অমসুং শ্রী রামগী ৱারী অসি চাইনা অমসুং ইরানগী ৱারীদসু য়াওরি, অমসুং রাম কথা অসি লৈবাক কয়াদা খঙনৈ। মহাক্না হায়খি মদুদি, হায়রিবা লৈবাকশিং অসিদা লৈরিবা মীয়াম্না ঙসিদি রাম মন্দির শাগৎপসিদা পুক্নিংদা হরাউবা পোক্নরগনি।

মীওইবা সমাজগী ইথিল পীনবা মশক

প্রধান মন্ত্রীনা লাইশঙশিং অসিনা তুংদা লাক্কদবা চহী কয়াদা লৈহৌগদবা মীওইবা জাতীদা ইথিল অমা পীহৌরগনি হায়না থাজবা ফোংদোকখি। মহাক্না শ্রী রাম, রাম মন্দির অমসুং ঐখোয়গী অরিবা য়েলহৌঙৈগী চৎনবী অসি মালেম শীনবা থুংনা শন্দোকখিবা হায়বসি য়াম্না মরুওইবা অমনি। মসিবু ৱাখলদা থম্লদুনা লৈবাক অসিদা রাম সর্কিৎ অমা শেমগৎলিবনি।

রাম রাজ্য

প্রধান মন্ত্রীনা মহাত্মা গান্ধীনা মংজরম্বা রাম রাজ্যগী মংলান অদুবু নিংশিংখি। মহাক্না হায়খি, ঙসি ফাওবদা লৈবাক অসিবু লমজিংবীদুনা লাক্লিবা শ্রী রাম্না তাকপীরম্বশিংগী মনুংদাঃ কনাগুম্বা অমত্তা লাইরনা নত্ত্রগা ৱানা হিংলোইদবনি; নুপা অমসুং নুপী অনীমক চপ মান্ননা হরাউমিন্নগদবনি; লৌমী অমসুং শা ঙা লোইরিবা মীওইশিংসু নুংঙাইগদবনি; অহল ওইরবশিং অমসুং অঙাংশিং অমসুং দোক্তরশিংবু মতম পুম্বদা ঙাকপী শেনবীগদবনি; চঙজরক্লবা কনাগুম্বা অমবু ঙাকপীবা হায়বসি লৈবাক অসিদা লৈরিবা মীপুম খুদিংমক্কী মথৌনি; ইশাগী লৈবাক হায়বসিনা লাইরৈবাক্তগী হেন্না লুম্মি; অমসুং লৈবাক অমনা শক্তি হেন্না লৈরক্লিবা মখৈ হেন্না শান্তি ওইহন্নবগী শক্তিসু লৈ। প্রধান মন্ত্রীনা হায়খি মদুদি শ্রী রাম্না মতম চুপ্পদা অহোংবা অমসুং চাউখৎপগীদমক লেপখি। লৈবাক অসি শ্রী রামগী পাউতাকশিংগী মতুং ইন্না চাউখৎলক্লি।

অপুনবা নুংশিবা অমসুং ইচীল ইনাও ওইবগী হৌরকফম

প্রধান মন্ত্রীনা লাইশঙশিংবু অপুনবা ওইনা নুংশিনবা অমসুং অমত্তা ওইবগী য়ুম্ফমদা শাগদবনি। মহাক্না হায়খি মদুদি 'সবকা সাথ' অমসুং 'সবকা বিশ্বাস'কী মখাদা, ঐখোয়না 'সবকা বিকাস' ফংনবা হোৎনগদবনি অমসুং মরোমদোম লেপচবা ঙম্বা আত্মনির্ভর অমা শাগৎকদবনি। মহাক্না হায়খি মদুদি শ্রী রাম্না হায়বীরম্বা থিন্থবা তৌরোইদবনি অমসুং মতম চুপ্পদা মাংজিল থানা চৎকদবনি হায়বসিনি লৈবাক অসিনা তুংইন্দুনা চৎকদবসি।

কোবিদকী মনুংদা 'মরিয়াদা'

প্রধান মন্ত্রীনা অরোইবদা শ্রী রাম্না হায়বীরম্বা 'মরিয়াদা'গী লম্বীগী মরুওইববু কোবিদকী ফিবম অসিদা পুশিল্লক্লদুনা নিংশিংখি। হৌজিক ওইরিবা ফিবম অসিনা মরিয়াদাবু 'দো গজ কী দুরি – মাস্ক হে জরুরি' হায়না তঙাইফদবা ওইরে অমসুং হায়রিবসিমক মীপুম খুদিংনা ঙাক্না চৎপীনবা মহাক্না চিংশিনখি।

*******