হৌজিক রাজ্য সভাগী ইন্দিপেন্দেন্ত মেম্বর অমা ওইরিবা অমর সিংহনা মতম চাদনা লৈখিদবদা ভারতকী উপ-রাস্ত্রপতি অমসুং রাজ্য সভাগী চেয়রমেন, এম. ভেনকিয়া নাইদুনা অৱাবা ফোঙদোকখ্রে। হৌখিবা থা খরগী মমাঙদগী লায়েংদুনা লাকখিবা অমর সিংহ(৬৪) ঙসি শিঙ্গাপুরগী হোস্পিতাল অমদা লৈখিদবনি।

উপ-রাস্ত্রপতিনা শিঙ্গাপুরদা লৈবা ভারতকী হায় কমিসন্নরগা পাউ ফাওনখি অমসুং অমর সিংহগী লায়েংগী মতাংদা দরকার ওইবা পাংবা য়াবা মতেং পাংনবা মহাক্না খঙহনখি।

উপ-রাস্ত্রপতিনা অমর সিংহগা পাউ ফাওনখি অমসুং চাংনাইনা মহাক্কী হকচাংগী মতাংদা হংখি। অমর সিংহ য়াম্না থুনা অনাবা ফদুনা ভারত্তা হল্লক্কনি হায়না মহাক্না থাজবা থমখি।

অমর সিংহনা চহি য়াম্না নৌনা লৈখিদবদা মহাক্কী অৱাবা ফোঙদোক্লদুনা উপ-রাস্ত্রপতিনা হায়খি লৈবাক অসিনা মতিক চাবা সংসদকী মেম্বর অমা মাঙজরে।

মহাক্না হায়খি, রাজনিতিগী লমদা অমর সিংহ মমিং চৎখি অমসুং মতম পুম্নমক্তা খুন্নাইগী তোল্লবা অমসুং লায়রবশিংগী ফিবম ফগৎনবা কন্না হোৎনখি।

****