কোরোনা লায়চৎ অসিনা মরম ওইদুনা কোল ইন্দিয়াগী মীওই অমা হেক্তা লৈতবা থোক্লবদি মসিবু এক্সিদেন্তেল দেথ ওইনা লৌগনি অমসুং মহাক্কী ইমুং মনুংনা মীওই অমনা থবক তৌরিঙৈদা অশোয়-অঙাম য়াওবদগী লৈতবা মতমদা ফংবা খুদোংচাবা খুদিংমক ফংগনি হায়না কোল অমসুং মাইনগী কেন্দ্র মন্ত্রী শ্রী প্রহলাদ জোশিনা হায়খ্রে। মহাক্কী ঝারখন্দগী নোংমগী খোঙচৎ অসিগী মনুং চনবা ওইনা মীদিয়াগী মীওইশিংগা রাঞ্চিদা উন্নখিবদা শ্রী জোশিনা হায়রিবা ৱারেপ অসিনা কোল ইন্দিয়াগী মখাদা থবক তৌরিবা ওন-রোল অমসুং কেন্ত্রেক্ত শিন্মীশিং খুদিংনা মসিগী কান্নবা ফংগনি হায়খি। হৌজিক ফাওবদা কোবিদনা মরম ওইদুনা লৈখিদ্রবা মীওই খুদিংগী ইমুংনসু কান্নবশিং অসি ফংগনি।

 “কোবিদ লায়চৎ অসিগী মনুংদা কোল ইন্দিয়াগী থৌমীশিংনা মশাগী পুন্সিবু খুদোংথিবদা থমদুনা মশক থোকপা থবক পাংথোকখি। মখোয়না লেপ্পা নাইদবা অফবা থবক কয়া অমা তৌরি। মসিনা মরম ওইদুনা ঐহাক্না মখোয়বু কোয়লাগী লান্মী হায়না কৌরি অমসুং লৈবাক অসিগীদমক্তা মমল নাইদ্রবা থবকশিং অসি পাংথোকপগীদমক্তা মসিগী ৱারেপ অসি লাউথোকখিবনি”, হায়না শ্রী জোশিনা হায়খি।

মন্ত্রীনা মখা তানা হায়খিবদা লাক্লিবা চহিশিংদা কম্মর্সিএল কোল মাইনিং তৌবা অসিনা ঝারখন্দবু হেন্না চাউখৎহনগনি হায়খি। ঝারখন্দগী কোল মাইন ৯গী কম্মর্সিএল ওক্সন তৌবগী মখাদা রাজ্যনা চহি অমদা রেবেন্যু ওইনা লুপা কোতি ৩২০০ হেন্না তানবা ঙমগনি অমসুং রাজ্যসিগী মীওইশিংগী ওইনা অহেনবা থবক ৫০০০০সু পীবা ঙমগনি। মসিগী অহেনবা ওইনা দি.এম.এফ.তা ঝারখন্দনা পীগদবা অসি লুপা ১৭মুক ওইগনি অমসুং হায়রিবা শেনফম অসি কোলফিল্দগী অকোয়বা মফমশিংবু চাউখৎহন্নবা শিজিন্নবা য়াগনি।

 “কম্মর্সিএল মাইনিং ওক্সন অসিদা অফবা মহৈ ফংখি। ওক্সন তৌনবগীদমক্তা থমখিবা মাইন খুদিংমক্তা ঐখোয়না বিদ্দর ৫-১০ ফাওবা ফংখি। মসিদগী রাজ্যনা য়াম্না কান্নবা ফংগনি অমসুং মসিনা রাজ্য অসিনা শাহৌ লৌবগী অনৌবা তাঙ্কক অমসু হৌরগনি” হায়না শ্রী জোশিনা হায়খি।

শ্রী জোশিনা মহাক্কী রাঞ্চি খোঙচৎ অসিদা ঝারখন্দগী মুখ্য মন্ত্রী শ্রী হেমন্ত সোরেনগা উন্নখি অমসুং মহাক্কা মাইনিংগা মরী লৈনবা ৱাফম কয়া খন্নখি। মহাক্না সেন্ত্রেল কোলফিল্দ লিমিতেদ (সি.সি.এল.), ভারত কোকিং কোল লিমিতেদ (বি.সি.সি.এল.) অমসুং ইস্তর্ন কোলফিল্দ লিমিতেদ (ই.সি.এল.)গুম্বা কোল কম্পেনীশিংগী থবক থৌরমশিং য়েংশিনখি অমসুং হৌখিবা থা খরা অসিদা কোয়লাগী লান্মীশিংনা হৌজিক চত্থরিবা লায়চৎ অসিগী মনুংদা লৈখিবা পাৱরগী তঙাইফদবা থেংনবা ঙম্নবা কন্না হোৎনখিববু মহাক্না থাগৎপা ফোংদোকখি।

কম্মর্সিএল কোল মাইনিং হৌবগী তঙাইফদবগী মতাংদা পল্লদুনা মহাক্না হায়খিবদা ভারতনা মশাগী চহিগী ওইবা কোয়লাগী তঙাই ফদবগী শরুক মঙা থোকপগী অমদি মীরমদগী পুশিল্লকই। কম্মর্সিএল মাইনিং অসি হেক হৌখ্রবদি মসিনা থর্মেল পাৱর প্লান্তশিং অমসুং কেপ্তিব পাৱর প্লান্তশিংনা মীরমদগী কোয়লা লৈরিবা অসিগী মহুৎ শিন্দুনা চহি খুদিংগী লুপা কোতি ৩০,০০০ রোমগী মীরমদগী পোত্থোক পুশিনবদা চংবা শেনফম তুংশিনবা য়াই। মসিনা মীওই লাখ ৩ হেনবদা হকথেংননা অমসুং নাকোয়ননা থবক পীবদা তেংবাংগনি।

ঝারখন্দা মাইনিং তৌবগী মরু ওইবগী মতাংদা পল্লদুনা শ্রী জোশিনা মাইনিং অসি ঝারখন্দগী লাইফ-লাইন্নি অমসুং মসিনা চাউখৎপদা মরু ওইবা থৌদাং য়ারি হায়খি।

ঝারখন্দ লৈবাক অসিদা মিইনরেল য়াম্না লৈবা লৈহাউদগী মতম অমত্তদা কোয়লা লৌথোকপা কম্পেনী ৩ লৈবা অমত্তা ঙাইরবা রাজ্যনি হায়না মহাক্না হায়খি। সি.সি.এল., বি.সি.সি.এল. অমসুং ই.সি.এল.না মথংগী চহি ৪দা কোয়লা মিলিয়ন তোন ৭৪২ লৌথোক্কনি হায়না থাজনরি অমসুং লুপা কোতি ১৮,৮৮৯গী শেনফম পীবা ঙমগনি। মমাংগী চহি ৪দা রাজ্যসিনা চহি খুদিংগী লুপা কোতি ৪০০০ তানখি (চাউরাক্না অপুনবা লুপা কোতি ১৬০০০কী শেনফম)। মসিগী কোয়লাগী কম্পেনীশিং অসিগী হোলদিং কম্পেনী ওইরিবা কোল ইন্দিয়া লিমিতেদনা মসিগী ৩০%গী শরুক্তি ঝারখন্দা রোয়ালতী ওইনা পী অমসুং রাজ্যসিগী ওইবা কোয়লা পুথোকপগী শরুক্কী শেনফম অসিনা অপুনবগী ২০%নি।

কেন্দ্র সরকারনা ঝারখন্দ চাউখৎহন্নিংই অমসুং লৈবাক্কী শেন্মিৎলোন চাউখৎপদা তেংবাংহন্নিংই হায়না মন্ত্রীনা হায়খি। রাজ্যসিদা লৈরিবা কোয়লাগী কম্পেনীশিং অসিনা চহি ১০দগী হেন্না চলায়রক্তুনা মিনরেল য়াম্না লৈবা ঝারখন্দগী লৈহাউদগী কোয়লা কোত্থোক্তুনা মসিগী মমল ওইনা রাজ্য অসি চাউখৎহন্নবগীদমক্তা শেনফম কয়া অমা পীরি। সি.এম.এস.পি.গী মখাদা লৈরিবা কোল মাইনশিং অসিদগী য়ামদ্রবদা লুপা কোতি ৬৫৬৪দি ঝারখন্দ সরকারদা চহিগী ওইনা কারক্কনি হায়না থাজনরি। মসিগী মথক্তা সি.আই.এল.না মসিগী ইনফ্রাস্ত্রকচর শানবা ইং ২০২৩-২৪ ফাওবগী মনুংদা ঝারখন্দা লুপা কোতি ৩৭,০০০গী শেনফম থাদরগনি।

***