ভারতকী উপ-রাস্ত্রপতি অমসুং রাজ্য সভাগী চেয়রমেন, শ্রী এম. বেঙ্কয়া নাইদুনা ঙসি নই-দিল্লীগী আর.কে. পুরমদা লৈবা স্ক্বার মীতর ৮৭০০ পাক চাউবা লম অমা ইং ২০০৩দা রাজ্য সভা সেক্রেতরিএত্তা পীখিবা অদুবু হৌজিক ফাওবা লৌশিনবা ঙমদবদা পেন্দবা ফোংদোকখ্রে।

হীরম অসিগী মতাংদা য়েংশিন্নবা পাংথোকখিবা রাজ্য সভা সেক্রেতরিএৎকী সেনিয়র মেম্বরশিং, হাউজিং অমসুং অর্বান দিবেলপমেন্ত মন্ত্রালয়, দিল্লী অর্বান শেলতর ইম্প্রুবমেন্ত বোর্দ, লেন্দ অমসুং দিবেলপমেন্ত ওফিস অমসুং লীগেল কাউন্সেলনা শরুক য়াখিবা মীফমদা শ্রী নাইদুনা হাউজিং অমসুং অর্বান দিবেলপমেন্ত সেক্রেতরীদা মফম অসিদগী লম খোপচিল্লিবা মীওইশিং তান্থোক্নবা মতিক চাবা অমসুং অথুবা থবক পায়খৎনবা খঙহনখ্রে।

রাজ্য সভা সেক্রেতরিএত্তা পীখিবা স্ক্বার মীতর ৮৭০০ পাক চাউবা মফম অসিগী মনুংদা এন.জি.ও. অহুম য়াওনা তোঙান তোঙানবা লুপশিংনা স্ক্বার মীতর ৪৩৮৪.২৫ কন্দুনা লৈরি অমসুং অয়াবা পীদবা ঝুগগী (স্লম)শিংনা স্ক্বার মীতর ১১৯৩.৫৪গী মফমদা তাশিন্দুনা লৈরি।

চেয়রমেন অসিনা জুন ২০১৮দগী হৌনা হীরম অসিগী মতাংদা য়েংশিন্দুনা লাক্লি। লম অসিবু হাংহনবদা হায়-কোর্ত্তা পন্দুনা লৈরিবা কেস অসি য়াওনা অথিংবা পীরিবা লীগেলগী হীরম পুম্বা লোয়শিন্নবা থবক পায়খৎনবা মহাক্না ওফিসিএলশিংদা হায়খ্রে।

ইং ২০০৩দা লম অসিগী ওইবা অমসুং মসিদা লৈরিবা ঝুগগী (স্লম)শিং অসিবু অতোপ্পা মফমদা হোংদোকখিনবা রাজ্য সভানা লুপা কোতি ১.২৫ তিংখ্রবনি হায়খি।

মহাক্না হায়খিবগী মতুং ইন্না রাজ্য সভা ত.ভি.না হান্নদি চহিদা লুপা কোতি ৩০গী ভরা পীরম্মি অদুবু মহাক্না নই-দিল্লী ম্যুনিসিপাল কাউন্সিলদা হীরম অসিগী মতাংদা ৱারী শাদুনা লুপা কোতি ১৫দা হন্থহনখ্রবনি হায়খি। লুপা কোতি ১৫ অসি য়াম্লবা শেনফম অমনি অমসুং মসি চাদিং তৌদ্রবসু য়াবনি হায়না মহাক্না হায়খি।

লম অসি হেক লৌশিনবা ঙম্বগা মসিদা রাজ্য সভা তি.ভি. অমসুং রাজ্য সভা সেক্রেতরিএৎকী থৌমীশিংনা লৈনবা ক্বার্তর শাবগী মতম কুইনদগী ঙাইরক্লবা থবক অসি পাংথোক্নবা চেয়রমেন্না শেম শাদুনা লৈরিবনি অমসুং থৌওং অসিনা লৈবাক্কী ওইনসু চাদিং কয়া অমদগী কন্দুনা শেল তুংশিনবা ঙমগদৌরিবনি।

হীরমশিং অসিবু য়েংলদুনা শ্রী নাইদুনা হাউজিং অমসুং অর্বান দিবেলপমেন্ত মন্ত্রালয়গী সেক্রেতরীদা হীরম অসিগী ৱারোইশিন অমা পুরক্নবা মরী লৈনবা ওফিসিএলশিংগা লোয়ননা অথুবা মতমদা মীফম অমা ফমদুনা খন্ননবা হায়খ্রে।

****