কোবিদ-১৯গী খুদোংচাদবা কয়া লৈবা অসিগী মরক্তা কেমিকেলস অমসুং ফর্তিলাইজর মন্ত্রালয়গী মখাদা লৈবা পব্লিক সেক্তর অন্দর্তেকিং অমা ওইরিবা রাস্ত্রিয় কেমিকেলস অমসুং ফর্তিলাইজর লিমিতেদ (আর.সি.এফ.)না মসিগী থবকশিং অসি মায় পাক্না মখা চত্থদুনা চৎলিবা শেনবা চহিসিগী জুলাই ২৭, ২০২০ ফাওবগী মনুংদা মসিগী ইন্দস্ত্রীগী পোত্থোকশিং য়োনবগী অপুনবা শেনফম লুপা কোতি ২০০ হেন্দুনা মশক থোকপা থবক পাংথোকখ্রে।

কম্পেনী অসিগী ৱারোল অমগী মতুং ইন্না নুমিৎ ৬৭নিগী মনুংদা লুপা কোতি ১০০ য়োনবা ঙমখি অমসুং অতোপ্পা লুপা কোতি ১০০গী শেনফম অসিনা নুমিৎ ৫১নি খক্তদা য়োনবা ঙমখি হায়খি।

আর.সি.এফ.কী ইন্দস্ত্রীগী পোত্থোক পুথোকপগী দিবিজন (আই.পি.দি.)গী পোর্তফোলিওদা ফার্মাস্যুতিকেলস, পেস্তিসাইদ, মাইনিং, বেকরীগী পোত্থোকশিং, ফাইবর অমসুং শউন্নচিংবা অতোপ্পা ইন্দস্ত্রীশিংগী মপুং ওইবা মচাক ওইবা পোত্থোক ২৩ লৈ। আর.সি.এফ.না হৌজিক্কী লুরবা মতম অসিদা লৈবাক অসিগী এগ্রিকলচর অমসুং ইন্দস্ত্রীগী শাহৌ হেনগৎহনবা ঙমদুনা অচৌবা ইথিল অমা পীরি।

কম্পেনী অসিনা “ফুদ সেক্যুরিতী”বু মায় পাকহন্নবা অমসুং লৌউবশিংদা লেপ্তনা হার ফংহন্নবা চাউরবা মতেং পাংলি। হন্দক্কী চহিসিদা কোবিদ লায়চৎ অসিনা থোকহনবা খুদোংচাদবা কয়া অসিনা মরু ওইনা পোত্থোক য়ৌহনবগী পথাপ অসিদা শোকহল্লবসু আর.সি.এফ.না ইং ২০২০-২১গী অহানবা ক্বার্তরদা হার লাখ এম.তি. ২.৩ হেন্না পুথোকপা ঙমখি অমসুং ২০২০গী জুলাই থাদা হার লাখ এম.তি. ২.৩ হেন্না পুথোকপা ঙমখ্রে। ভারত্তা লৈরিবা অৱাৎপশিং অসি কোন্ননবা হায়দুনা আর.সি.এফ.না লাখ এম.তি. ২গী গ্রেদ মখল কয়াগী কমপ্লেক্স ফর্তিলাইজরশিং মীরমদগী লৈখ্রবনি। কম্পেনী অসিনা স্তেৎ ত্রেদিং ইন্তর্প্রাইস অমা ওইনা ফর্তিলাইজর বিভাগকী মহুৎ শিন্দুনা য়ুরিয়া লাখ এম.তি. ১৩ হেনবসু মীরমদগী লৈখ্রে।

খুন্নাইদা থৌদাং লৈবা কোর্পোরেৎ অমা ওইনা মসিনা কোবিদ-১৯গা লান্থেংনবা খোঙথাং কয়া অমসু পাংথোক্লি। আর.সি.এফ.কী থৌমীশিংনা পি.এম.কেয়রস ফন্দ অমসুং সি.এম. রিলীফ ফন্দশিংদা থৱাই য়াওনা তেংবাংলি। কম্পেনী অসিনা মখোয়গী হোস্তেলগী মফম অমসু কোবিদ কেয়র সেন্তর ওইনা হাংখ্রে। মসিনা অলিবাগকী কল্লেক্তরগী লোয়শঙদা এম্ব্যুলেন্স অমসুং অতোপ্পা তেংবাংগী থৌওং কয়ানা মতেং পাংখি।

হৌজিক্কী মতম অসিগী মনুংদা আর.সি.এফ.না ওথোরিতীনা হায়বা গাইদলাইন খুদিংমক ইন্দুনা চৎলি অমসুং মখোয়গী থৌমীশিংনা শৌগত্তুনা অমসুং ভারত সরকারগী ফর্তিলাইজর বিভাগকী ঙাক্লৌ অমসুং পাউতাক কয়াগী তেংবাংনা হার অমসুং ইন্দস্ত্রীগী পোত্থোকশিং লেপ্তনা পুথোক্নবা হোৎনরি।

******