ঙসি নই দিল্লীদা ভিদিও কনফরেন্সকী খুৎথাংদা এসিয়ান ইনফ্রাস্ত্রকচর ইনভেস্তমেন্ত বেঙ্ক (এ.আই.আই.বি.)গী বোর্দ ওফ গভর্নরসকী ৫সুবা চহিগী মীফমদা ফাইনান্স অমসুং কোরপোরেত এফিয়ার্সকী য়ুনিয়ন মিনিস্তর শ্রীমতি নির্মালা সিতারমন শরুক য়াখ্রে।

চহি খুদিংগী পাংথোকপা চহিগী মীফমদা, বেঙ্কগী তুংগী ফিবমগী মতাংদা ৱারেপশিং লৌনবা বোর্দ ওফ গভর্নরশিং উনৈ। মীফম অদুদা খন্নখিবশিং অদুদা বেঙ্কগী প্রসিদেন্তগী মীখল অমসুং “মথং চহি ১০দা এসিয়াগী চাউখৎ-থৌরাংদা এ.আই.আই.বি ২০৩০না শৌগৎপা” হায়বা পান্দমদা মীফম অমা পাংথোকপা হায়রিবা ৱাফমশিং য়াওখি।

খন্নবা অদুদা শ্রীমতি সিতারমন লুচিংবী ৱাঙাংলোয় অমা ওইখি। মহাক্কী ৱারোলদা শ্রীমতি সিতারমননা হায়খি, কোবিদ-১৯ লাকশিন্নবা ভারত য়াওনা বেঙ্ক অসিগী মেম্বর লৈবাকশিংদা এ.আই.আই.বিনা দোল্লর বিল্লিয়ন ১০গী মতেং পীবগীদমক থাগৎলি। প্রধান মন্ত্রী নরেন্দ্র মোদীনা সার্ক লৈবাকশিংগী কোবিদ-১৯ ইমর্জেন্সি ফন্দ অমা শেমখ্রে অমসুং কোবিদ-১৯ থেংননবা ভারতনা মরুওইবা মেদিকেলগী খুৎলায়শিং পীরি অমসুং হৌজিক মালেমগী ওইনা কোবিদ-১৯ তিকা চাংয়েং পাংথোকলিবা অসিদা শৌগৎলি। "জি“২০ দেব সর্বিস সস্পেন্সন ইনিসিএতিব"দা”ভারতনা শরুক য়াখিবা অদু ফাইনান্স মিনিস্তরনা পাউদমখি।

লৈবাক অসিগী শেন-থুমগী ফিবম কন্নবা অমসুং হিরম খুদিংমক ঙাক্নবা দোল্লর বিল্লিয়ন ২৩গী প্রধান মন্ত্রী গরীব কলয়ান য়োজনা অমসুং দোল্লর বিল্লিয়ন ২৯৫গী অত্মা নির্ভর ভারত পেকেজ য়াওনা কোবিদ-১৯ থেংননবা ভারত সরকারনা পায়খৎলিবা থবকশিং ফাইনান্স মিনিস্তরনা পাউদমখি। দরকার ওইবা রিজার্বশিং হন্থহন্দুনা অমসুং জি.দি.পিগী চাদা ৩.৯ ফাওবা লিকুইদিতি হৌদোক্তুনা রিজার্ব বেঙ্ক ওফ ইন্দিয়ানা শেন-থুমগী থৌশিল কোমথোকখি।

ফাইনান্স মিনিস্তরনা হায়খি ভারতনা নেসনেল ইনফ্রাস্ত্রকচর পাইপলাইন(এন.আই.পি)২০২০-২০২৫ হৌদোক্লে অমসুং এ.আই.আই.বিগী মতেংগা লোয়ননা ইনফ্রাস্ত্রকচরশিং শেমগৎনবা দোল্লর ত্রিল্লিয়ন ১.৪ রোম চাদিং তৌগনি হায়না পানরি। এস.দি.জি ২০৩০গী পান্দমশিং ফংবা ঙম্নবা খুন্নাইগী দরকার ওইবা মচাক-মথুমশিং শেমগৎনবা শেন্থং পীরে অমসুং অইং-অশাগী খল কাইরকপা অমসুং তুংকোইনা চৎনগদবা ইনর্জিগী মচাক-মথুমশিং শেমগৎনবা থবকশিং পায়খৎলে। বেঙ্ক অসিনা প্রোজেকশিং শীন-লাংবা অমসুং থবক ওইনা পায়খৎনবা মতিক চাবা মতেং পীগদবনি।

তেল্লবা চহি ৫গী মনুংদা বেঙ্ক অসিনা ফিবম য়াম্না ফগৎলকপদা এ.আই.আই.বি মেনেজমেন্ত ফাইনান্স মিনিস্তরনা থাগৎখি অমসুং বেঙ্কগী তুংগী থবকশিং মাইপাক্নবা য়াইফ-পাউজেল পীখি।

***********