ঙসি ভারতকী উপ-রাস্ত্রপতি এম.ভেনকিয়া নাইদুনা হায়খি মতম অসিদা অনৌবা মেদিয়া থোরকপা অসিদা মেদিয়াদা লায়না অমা ওইরবা অরানবা অমসুং শেমজিন-শাজিনবা পাউশিংদগী কমদৌনা নান্থোক্কদগে হায়বা অঙাংশিং তম্বীবা দরকার ওইরে।

ঙসি ভিদিও কনফরেন্সকী খুৎথাংদা পাংথোকখিবা ‘তাইমস স্কোলারস ইভেন্ত’দা শরুক য়াখিবা মহৈরোয় ২০০ হেনবদা উপ-রাস্ত্রপতিনা হায়খি অচুম্বশিং লৌশিন্নবা অমসুং অরানবশিং হুন্দোকখিনবগী থৌনা মহৈরোয়শিংনা লৈগদবনি। থৌরম অদু মহৈরোয়শিং পাউ-চে পাবগী হৈনবী লৈহন্নবা তাইমস ওফ ইন্দিয়ানা শীনবনি।

অঙাংশিং লাইরিক পাবা হন্থরকপদা নুঙনাংবা ফোঙদোক্লদুনা উপ-রাস্ত্রপতিনা হায়খি ঙসি মপান নাইদনা পাউ কয়া ফংলিবা মরক অসিদা অফবা লাইরকপা পাবা মীওইশিং ওইহন্নবা মখোয়দা তম্বীবা দরকার ওইরে। লাইরিক ফজনা পাবা মহৈরোয় অমা হায়বসি পুন্সিগী শিংনরকপশিং থেংননবা ফজনা থৌরাং তৌবনি।

হান্নগী রাস্ত্রপতি দোক্তর কলামগী ৱাফমশিং পল্লদুনা উপ-রাস্ত্রপতিনা হায়খি মহৈরোয়শিংনা অচৌবা মঙলান মঙগদবনি। কনাগুম্বা অমগী মঙলানশিং মঙফাওন্নবা থকশি-খাসি লৈবা, থবক কন্নবা শুবা, পুকচেল শেংবা, খাংবা কনবা অমসুং ফিবম খুদিংমক পুক্নিং ফাদনা থেংনবা দরকার ওই। কোবিদনা ওইহল্লিবা লাংতক্নবা কয়া অসিনা লাইরিক তম্বদা অকায়বা থোকহল্লে অমসুং মহৈরোয়শিং লাংতক্নবা ফাওহল্লে। কনাগুম্বা অমনা লাকশিনবা ঙম্লোইদবা থৌদোকশিংনা অকায়বা পীহল্লোইদবনি।

মহাক্না হায়খি, নখোয় ময়াম নহা ঙাক্তনি অমসুং পুন্সিগী অকা-অকুমশিং থেংননবা অকনবা পুক্নিংগী ইহুল লৈহনবা দরকার ওই। লাংতক্নবা অমসুং ৱাখল নুংঙাইতবা কোকহন্নবা অমসুং হকচাং ফনা লৈনবা মহৈরোয়শিংনা চাং নাইনা য়োগা শানগদবনি। লাইচৎ লাকপা অসিদা য়োগা অমসুং ধ্যান তৌবনা লায়না ঙাকথোকপা ঙম্বগী শক্তি হেনগৎহনগনি। মসি নৌরিঙৈদগী স্কুলগী করিকুলমদা য়াওহনগদবনি। য়োগানা নহারোলশিংদা মখোয়গী পুক্নিং চঙবা হেনগৎহনগনি অমসুং থকশি-খাসি লৈহনগনি।

উপ-রাস্ত্রপতিনা হায়খি মহৈরোয়শিংনা থাজবা হেনগৎহনগদবনি অমসুং মাইপাক্নবা শিংনবা খুদিংমক থেংননবা হোৎনগদবনি। মাইপাক্নবগী অশম্বা লম্বী লৈতে হায়বা নিংশিংগদবনি। লাইরিক তম্বা অসি শুপ্নগী দিগ্রিশিং পায়নবা অমসুং থবক ফংনবা গারি অমা ওইনা উরোইদবনি। লাইরিক তম্বা অসি মীওই অমা মঙাল ফংনবা অমসুং থৌনা লৈনবনি। লাইরিক তম্বনা মহৈরোয়শিং দরকার ওইবা লৌশিং ফংহনবা খক নত্তনা মখোয় অফবা মীওইশিং ওইনবা শেমগৎনবা দরকার ওই।

মহাক্না হায়খি ঐখোয়গী অরিবা মতমগী লাইরিক তম্বদা লমচৎ-শাজৎ শেমগৎনবা অকনবা মিৎয়েং চঙখি। মীওইবগী গুনশিং হায়বদি মীনুংশিং খঙবা, পুকচেল শেংবা, থাগৎপা হৈবা, ঙাকপীবা হৈবা অমসুং অঙাংশিংনা অহলশিং ইকায়খুম্নবা উৎপা অসি লৈহন্নবা হোৎনগদবনি। ভারতকী মমাংঙৈগী অফবা মতমশিং মহৈরোয়শিংনা খঙগদবনি। মালেমদা ভারতকী অৱাংবা কলচর অমসুং সভেত্যগী ৱাখল্লোনশিংগী এম্বেসেদরশিং ওইনবা লৈবাক অসিগী পুৱারি অমসুং হেরিতেচশিং খঙগদবনি।

মহাক্না হায়খি মখোয়না খল্লিবা পুন্সিগী শীনফমশিং অদু মাইপাক্নবা মহৈরোয়শিংনা হোৎনগদবনি অমসুং অনৌবা কয়া ফংনবা হোৎনগদবনি। হৌজিক লৈরিবা ফিবম অসিদা কৈদৌঙৈদা পেন্থোকলোইদবনি। মতম পুম্নমক্ত অৱাংবা পান্দমশিং থম্মু অমসুং নহাক্না চৎলুবা মফম খুদিং অফবা অমসুং অনৌবা ওইহল্লু। হৌজিক মালেম অসিনা থেংনরিবা লায়রবা, থোঙ মানদবা, হাৎন-শুনবা অমসুং অইং-অশাগী খল কাইরকপগী মতাংদা মহৈরোয়শিংনা খঙনবা হোৎনগদবনি অমসুং হায়রিবা অৱাবশিং অসি কোকহন্নবা অনৌবা পাম্বৈশিং মখোয়না পুথোক্কদবনি।

উপ-রাস্ত্রপতিনা হায়খি সরবোদ্যা অমসুং অন্তয়োদ্যা অসি নখোয়গী লমজিংনবা শীজিন্নগদবনি। ভারতকী নহারোলশিংগী থৌনা অসি ঙসিদি খ্বাইদগী মমল য়াম্বা লন ওইরে অমসুং নহারোলশিংগী তৌবা ঙম্বা অসিনা লৈবাক অসি অৱাংবা থাক্তা পুখৎপা ঙমগনি।

থৌরম অদুদা তাইমস ওফ ইন্দিয়া অমসুং মিরর ব্রান্দসকী দিরেক্তর, সঞ্জিব বারগাবা , তাইমস ওফ ইন্দিয়াগী এসোসিয়েদ ইজুকিউতিপ ইদিতর বিকাস সিংহ অমসুং অতৈ কয়া শরুক য়াখি।

মখাগী অসি মপুংফাবা ৱারোলনি:

তাইমস ওফ ইন্দিয়ানা শীনবা থৌরম অসি শরুক য়াবদা অমসুং ঐগী ৱাখল্লোনশিং নহারোলশিংদা ফোংদোকপদা ঐ য়াম্না হরাওই। শরুক য়ারিবশিংগা উনদুনা ৱারি শানরবদি হেন্না নুংঙাইবা ওইগনি। লাইবক থিবদি, লাইচৎ অসিনা অনৌবা কাংলোন অমা শেম্লে অমসুং মতম খরগী ওইনা ঐখোয়না লাপ্না উনবগী হৈনবী শেমগৎপা দরকার ওইরে।

অকনবা মওংদা তাইমস ওফ ইন্দিয়ানা খনগৎলকপা খ্বাইদগী ফবা মহৈরোয়শিংগী মনুংদা নখোয় য়াওরে হায়বা ঐ খঙলে। চাংদম্নবা অদুদা মহৈরোয় লাখ ৩ রোম শরুক য়াখি অমসুং ২০০ খনখি হায়বা ঐ খঙলে। মসিগী অঙকপা থবক অসিগীদমক ঐনা তাইমস ওফ ইন্দিয়া থাগৎলি।

থৌরম অসিগী মরুওইবা পান্দমদি মহৈরোয়শিংগী মরক্তা পাউ-চে পাবা হেনগৎহন্নবা থবক অমনি হায়বা খঙবদা ঐ হরাওই। লাইরিক ফজনা পাবা মহৈরোয় অমনা পুন্সিদা শিংনরকপশিং থেংননবা ফজনা থৌরাং তৌই অমসুং মহাক্না থেংনবা খুদোংচাবা খুদিংমক লৌবা ঙম্মি হায়বা ঐনা মতম পুম্নমক্ত থাজৈ। ঙসিদি মহৈরোয়শিং লাইরিক পাবগী হৈনবী হন্থরকপা অসিদা ঐ নিংবা কাই। ঙসিগী মালেম অসিদা বত্তন অমা নম্বদা ঐখোয়না মপান নাইদ্রবা ই-পাউ ফংবা ঙম্লে, ঐখোয়গী মহৈরোয়শিং লাইরিক পাবা মীওই অমা ওইহনবা অসি অরুবা অমা ওইরে।

ই-পাউ ফজনা লৌশিন্নবা অমসুং অফবা লৌনশিন্নবা অমসুং ফত্তবা হুন্দোকখিনবা থৌনা লৈনবা ঐখোয়না মখোয়দা তম্বীগদবনি। মতম অসিদা অনৌবা মেদিয়া থোরকপা অসিদা মেদিয়াদা লায়না অমা ওইরবা অরানবা অমসুং শেমজিন-শাজিনবা পাউশিংদগী কমদৌনা নান্থোক্কদগে হায়বা অঙাংশিং তম্বীবা দরকার ওইরে। অরিবা ৱারিদা য়াওবা উচেক ‘হমসা’গী মতৌগুম, ঐখোয়গী অঙাংশিংনা অচুম্বা লৌশিনবা অমসুং অরানবা হুন্দোকপা ঙমগদবনি।

তাইমস স্কোলারগুম্বা থবকশিং অসিনা নহারোলশিং মখোয়গী মিৎয়েং পাকথোক-চাউথোকহনবা, মখোয়গী অনিংবশিং ৱাংখৎহনবা অমসুং পাবা অমসুং তম্বা অসি তশেংনা নুংঙাইবা থবকশিংনা হায়বা ফাওহনবদা মতেং পাংগনি হায়না ঐনা চপ চানা থজবা থম্লি। 

নুংশিরবা নহারোলশিং,

নখোয় ঐখোয়গী লৈবাক্কী তুংগীদমক্নি অমসুং লৈবাক অসিদা চাউখৎহনবদা মরুওইবা থৌদাং অমা লৌগনি। নখোয় পুম্নমক তোঙান-তোঙানবা শীনফমশিং খনগনি-খরনা দোক্তরশিং, খরনা ইঞ্জিনিয়ারশিং, খরনা উকিলশিং, চার্তর একাউন্তেন্তশিং, আর্কিতেকশিং, পাউমীশিং ওইগনি অমসুং খর অমসু রাজনিতিদা চঙলকপা য়াই।

নখোয়গী পাম্লিবশিং অদু ফংনবা মতম পুম্নমক্তা অৱাংবা পান্দমশিং থমগদবনি অমসুং কন্না হোৎনগদবনি। হান্নগী রাস্ত্রপতি দোক্তর কলামনা হায়রমখি, “পান্দম ৱাংনা থম্মু অমসুং অচৌবা মঙলান মঙগদবনি”। অদুবু পান্দম থম্বা খক্তনা মতিক চাবা নত্তে। হায়রিবা পান্দমশিং অদু ফংনবা নহাক্না চপ চাবা লম্বী অমা শেমগদবনি। মসিদা থকশি-খাসি লৈবা, থবক কন্না শুবা, পুকচেল শেংবা, খাংবা কনবা অমসুং ফিবম খুদিংমক খাংবা ঙম্বা দরকার ওই।

খুদম ওইনা, লাইচৎ অসিনা লাইরিক-লাইসু তম্বদা অকায়বা থোকহনবদগী মহৈরোয়শিংগী মরক্তা লাংতক্নবা অমসুং শাওনিংবা পোকহনগনি। অসিগুম্বা ফিবম অসিদা কনাগুম্বা অমনা খাংদুনা লৈগদবনি অমসুং কনাগুম্বা অমনা লাকশিনবা ঙম্লোইদবা থৌদোকশিংনা অকায়বা পীহল্লোইদবনি। নখোয় ময়াম নহা ওইরিবা ঙাক্তনি অমসুং পুন্সিগী অকা-অকুমশিং থেংনবা ঙম্নবা অকনবা পুক্নিংগী ইহুল শেমগৎপা দরকার ওই।

নুংশিরবা মহৈরোয়শিং,

হকচাং, পুক্নিং-ৱাখল ফনা লৈনবা অমসুং লাংতক্নবা কোকহন্নবা খ্বাইদগী ফবা লম্বীশিংগী মনুংদা য়োগা শানবা অসি অমনি। য়োগা অসি শাজেল খক্তনি হায়না লান্নবা থাজবা লৈরি। মসি মীওই অমা নুংঙাইনা লৈনবা হকচাং, ৱাখল অমসুং থৱায় ওইবা অচুম্বা থবকনি।

নহা ওইরিঙৈদগী মসি তম্নবা, লৈবাক শীনবা থুংনা স্কুল করিকুলমদা য়োগা য়াওহনবা দরকার ওইরে। লাইচৎ লাকপা অসিদা কনাগুম্বা মীওই অমগী লায়না ঙাকথোকপা ঙম্বগী শক্তি হেনগৎহন্নবা অমসুং হকচাং অমসুং ৱাখল ফনা থম্নবা য়োগা শানবা অসি য়াম্না মরুওই।

য়োগানা নখোয়গী পুক্নিং চঙবা হেনগৎহনবা অমসুং থকশি-খাসি লৈহনবদা মতেং পাংগনি। হৌজিক হিরম খুদিংমক্তা অকনবা চাংদম্নবা লৈরিবা অসিদা ফিবম অমতনা নখোয় হুমদুনা পুহল্লোইদবনি। থাজবা লৈগদবনি অমসুং মাইপাকপা ঙম্নবা শিংনবা খুদিংমক থেংননবা হোৎনগদবনি। মাইপাক্নবা অশম্বা লম্বী লৈতে হায়বা মতম চুপ্পদা নিংশিংগদবনি অমসুং নখোয়গী মঙলানশিং মঙফাওননবা চপ য়ুংনা কৎথোকপা, থৱায় য়াওবা অমসুং থকশি-খাসি লৈবা দরকার ওই।

নুংশিরবা মহৈরোয়শিং,

লাইরিক তম্বা অসি শুপ্নগী দিগ্রিশিং পায়নবা অমসুং থবক ফংনবা গারি অমা ওইনা উরোইদবনি। লাইরিক তম্বা অসি মীওই অমা মঙাল ফংনবা অমসুং থৌনা লৈনবনি। লৈবাক অসিগী মপা , মহাত্মা গান্ধীনা হায়রমখি, “লাইরিক তম্বা অসি, ঐগী ওইনা অঙাং অমসুং মীওই অমগী হকচাং , ৱাখল অমসুং থৱায়গী খ্বাইদগী ফবশিং অদু চিংথোকপনি হায়না ঐনা লৌই। লাইরিক তম্বনা মহৈরোয়শিং দরকার ওইবা লৌশিং ফংহনবা খক নত্তনা মখোয় অফবা মীওইশিং ওইনবা শেমগৎনবা দরকার ওই।

লাইরিক তম্বা অসি শুপ্নগী লৌশিং অমসুং ই-পাউ ফংনবা খক নত্তে। মসি ঐখোয়গী নহারোলশিংদা লমচৎ-শাজৎশিং অমসুং গুনশিং লৈহন্নবা অমসু ওইরিবনি। অঙাংশিংদা মীনুংশি, পুকচেল শেংবা, মীওইবগী খনবা, থৌজাল লৈবা, থাগৎপা হৈবা, ঙাকপীবা হৈবা অমসুং অহলশিং ইকায়খুম্নবা উৎনবগী গুনশিং লৈহন্নবা মরুওইবনি।

মতম অমদা ভারত অসি মালেমগী ওজা নৎত্রগা বিশ্বগুরু ওইরমখি। ঐখোয়গী লাইরিক তম্বগী থবকশিং অসিনা ঐখোয়গী নহারোলশিংদা অচুম্বা অমসুং লমচৎ-শাজৎশিং শেমগৎলি অমসুং মসিগী অচৌবা চৎনবী অসি ঐখোয়না ঙাক্কদবনি।

ঐখোয়গী পুৱারিদা শক্নাইরবা অখঙ-অহৈশিং, মখোয়গী মতমদা মাংজিল থানবা সাইন্সকী অনৌবা পুথোকপশিং, অরিবা লাইরিক কয়াগী অইবশিং অমসুং মমল নাইদ্রবা কলা অমসুং য়ুমশারোলগী পোৎথোকশিং শারম্বশিংগী ৱারি কয়া য়াওরি। হায়রিবা অথৌবশিং অসিগী ৱারিশিং ঐখোয়গী নহারোলশিংনা খঙগদবনি অমসুং ভারতকী মমাংঙৈগী অফবা পুৱারিদগী অচুম্বশিং তমগদবনি।

ঐখোয়গী হেরিতেচ অমসুং পুৱারিগী নখোয়না চাউথোকচবা পোক্কদবনি অমসুং মালেমদা ভারতকী অৱাংবা কলচর অমসুং সভেত্যগী ৱাখল্লোনশিংগী এম্বেসেদরশিং ওইনবা লৈবাক অসিগী পুৱারি অমসুং হেরিতেচশিং খঙগদবনি। নহাকনা লৈরিবা মফম অদুগী খেন্নবা থিদনা, নহাক্না নহাক্কী ইমা,ইমালোন,ইমা লৈবাক অমসুং ওজা কৈদৌঙৈদা কাওরোইদবনি।

ঐগী নুংশিরবা মহৈরোয়শিং,

নহাক্না খল্লিবা শীনফম অদুদা নহাক মাইপাকপা ওইগদবনি। করিগুম্বা নহাক্না দোক্তর অমা ওইরবদি, য়াম্না লৈবা, মতিক চাবা অমসুং মীনুংশি খঙবা দোক্তর ওইগদবনি। করিগুম্বা নহাক লান্মী অমা ওইরবদি, থৌনা লৈবা অমসুং হায়খিবা ৱা ঙাকপা,পুকচেল শেংবা অমসুং মশা-মরোমদোম লাকশিনবা ঙম্বা লান্মী অমা ওইগদবনি। করিগুম্বা নহাক্না ললোনবা অমা ওইরবদি, অচুম্বা চৎপা, মীওইবগী খনবা ললোনবা অমা ওইগদবনি। করিগুম্বা নহাক্না ওজা অমা ওইরবদি, তম্বীবগী মথক্তা, নহাক্কী মহৈরোয়শিং অফবা মীওই অমা ওইনবা মতেং পাংগদবনি অমসুং মঙাল ফংনবা হোৎনগদবনি।

নহাক্না খল্লিবা পুন্সিগী শীনফমশিং অদু মাইপাক্নবা মহৈরোয়শিংনা হোৎনগদবনি অমসুং অনৌবা কয়া ফংনবা হোৎনগদবনি। হৌজিক লৈরিবা ফিবম অসিদা কৈদৌঙৈদা পেন্থোকলোইদবনি। মতম পুম্নমক্ত অৱাংবা পান্দমশিং থম্মু অমসুং নহাক্না চৎলুবা মফম খুদিং অফবা অমসুং অনৌবা ওইহল্লু।

হৌজিক মালেম অসিনা থেংনরিবা লায়রবা, থোঙ মানদবা, হাৎন-শুনবা অমসুং অইং-অশাগী খল কাইরকপগী মতাংদা নখোয়না খঙনবা হোৎনবা ঐনা পাম্মি অমসুং হায়রিবা অৱাবশিং অসি কোকহন্নবা অনৌবা পাম্বৈশিং মখোয়না পুথোক্কদবনি।

ঙসিদি মালেম অসি হান্নদগী হেন্না অমগা অমগা শম্নরে অমসুং নহাক্কী লৈবাক খক্তনা অৱাবশিং কোকহনবা অসি মতিক চাদ্রে। ঐখোয়গী সভেত্যগী লাইৱা, “ভাসুধাইবা কুতুম্বকাম”গী অশেংবা নহাক খক্তনা খঙগনি। ঐখোয়গী ওইনা মালেম অসি মতম পুম্নমক্ত অচৌবা ইমুং অমনি।

নখোয়দগী হেন্না লায়রবশিংগীদমক নখোয়না মতম চুপ্পদা নিংশিংগনি হায়না ঐনা থাজবা থম্লি। ঐখোয়গী লৈবাক্কী মপানা হায়রম্বা খ্বাইদগী লায়রবা অমসুং খ্বাইদগী শোনবা মীওইগী মাইথোঙ নিংশিংউ হায়বা অদু ঐনা নখোয়দা অমুক নিংশিংলি। চারা হেল্লিবা মীওই মিল্লিয়ন কয়াদা ঐখোয়না শ্বারাজ পুরকপা ঙম্লবরা হায়বা ঐখোয় ইশানা হংজগদবনি।

ঐগী নুংশিরবা মহৈরোয়শিং,

সরভোদয়া অমসুং অন্তয়োদ্যনা নখোয় লমজিংহনসি। নখোয়গী ৱাখল্লোন অদু নখোয়দগী হেন্না লাইবক থিরবশিংগী মীনুংশিং অমসুং অৱাবা খঙবগী লোইবা নাইদবা ইফুৎ অমা ওইহনসি।

শ্বামি বিবেকানন্দনা হায়রমখি, “অশেংবা মাইপাকপা , অশেংবা নুংঙাইবগী অরোনবদি: নুপা নৎত্রগা নুপী অদুনা অৱামল নিদ্রবা, মশাগী খন্দ্রবা মীওই অদু, খ্বাইদগী মাইপাকপনি”।

ঐখোয়গী নহারোলশিংগী তৌবা ঙম্বশিংনা লৈবাক অসিদা চাউখৎহনগনি হায়না ঐনা থাজবা থম্লি।

ভারতকী নহারোলশিংগী থৌনা অসি ঙসিদি মমল য়াম্লবা লন ওইরে। নখোয় খুদিংমক লাইরিক হৈবা, লৌশিং লৈবা, মথৌ মশক খঙবা, খাংবা কনবা অমসুং লমচৎ-শাজৎ লৈবা মীওই অমমম ওইগনি হায়না ঐনা থাজবা থম্লি।

নখোয় খুদিংমক তুংদা মাইপাকপা ওইনা ঐগী য়াইফ-পাউজেল পীজরি।

অদোম থাগৎচরি !

জয় হিন্দ !

**********