য়ুথ এফিয়ার্স অমসুং শান্ন-খোৎনবগী কেন্দ্র মন্ত্রী শ্রী কিরেন রিজিজুনা কোবিদ-১৯ মতুংদা শান্ন-খোৎনবগী থৌরমশিং মখা চত্থনবা ভারতকী থৌরাং অমসুং লাইচৎ মতুংগী মতমদা অপুনবা শান্ন-খোৎনবগী পোলিসী অমা শেমগৎপদা থৌদাং য়াননবগীদমক কম্মনৱেল্থ লৈবাকশিংগী মন্ত্রীশিংগী ফোরমদা ভর্চুএল ওইনা শরুক য়াখ্রে‍। কম্মনৱেল্থ লৈবাক পুম্নমক্তগী মীওইশিংনা শরুক য়াখিবা মালেমগী ওইবা থৌরমদুদা ৱা ঙাঙলদুনা, শ্রী রিজিজুনা হায়খি, “কম্মনৱেল্থ লৈবাকশিংগী লুপ্লোয় অমা ওইনা ঐখোয়না হীরম খুদিংমক্তা, মরুওইনা অসিগুমবা মতমসিদা পুন্না লেপমিন্নবা মথৌ তাই‍। মাঙদা চঙশিন্নবা লম্বী য়াৎনবগীদমক কম্মনৱেল্থ লৈবাক অতৈদগী মীওইশিংগা থৌরমসিদা শরুক য়ামিন্নবসি ঐঙোনদা হরাউবা ফাওজৈ‍। মফমসিদা অতোপ্পা লৈবাকশিংগী মন্ত্রীশিংনা পুখৎপিরক্লিবা ৱাফমশিং অয়ামবা ভারতকিদা লৈরিবসিগা মান্নৈ‍। অদুম ওইনমক হৌখিবা মতমসিদা ঐখোয়না তমখিবা অমদি ফংখিবা মশকথোকপা ৱাফম খরা লৈরি মদু ঐনা ময়ামদা তমজনিংই‍।”

লাইচৎ মনুংদা মীয়াম্না মশা মউ ফনা লৈবগী মরুওইবগী মতাংদা পল্লদুনা, শান্ন-খোৎনবগী মন্ত্রী অদুনা হায়খিবদা, “থৌরম অসিদা য়াওবিরিবা মন্ত্রী খুদিংমক্তা ঐনা তমজনিংবা ৱাফম অমদি, মমাঙ চহীদা ঐখোয়গী প্রধান মন্ত্রীনা য়াম্না মরুওইবা থৌরম, ফিত ইন্দিয়া মুভমেন্ত হৌদোকখি, অমদি কোবিদগী হায়রিবা মতমসিদা হকচাঙ ফনা থমবা অমদি মহীক ঙাকথোকপগী মপাঙ্গল কলহনবা য়াম্না মরুওইবা মরম্না মসিনা লাইচৎ অসি  থেংনবদা য়াম্না কান্নবা ওইরি‍। লাইচৎ মনুংসিদা ভারতনা মসিগী মীয়াম্না মশা মউ ফনা অমদি তিঞ্জং-কায়জঙদনা লৈননবগীদমক তোখায়না কত্থোক্লবা ওন্লাইন থৌরম পরিং কয়াগী খুত্থাঙদা হকচাঙ ফনা লৈবগী মরুওইবশিং মীয়ামদা মায় পাক্না শন্দোকখি‍। এক্সপর্তশিংনা হকশেল, মচি ওইবা চীঞ্জাক, শাজেলগী মরমদা মখোয়গী পাউতাক পীদুনা চহী মতাং পুম্নমক্কী মীয়াম্না মদুশিংদুবু ইন্দুনা চৎলি‍।” কম্মনৱেল্থকী সেক্রেতরী জেনেরেল মিস পেত্রিসিয়া স্কোৎলেন্দ ব্যু.সি.না ভারতকী খোঙথাঙ অসিবু লাইচৎ অসি থেংননবা তোপ তোপ্পা থৌরাংনি হায়না থাগৎখি‍।

শ্রী রিজিজুনা স্পোর্তস দেলিভরী মোদেল খেন্নবা মওংশিংদা থমবগী মতাংদা ৱা ঙাঙখি অমসুং ভারতনা কমদৌনা শান্নরোয়শিংগী ওনলাইন ত্রেনিং কোর্স অমসুং কোচশিংগী স্কিল অপগ্রেদেসন কোর্সশিং মায় পাক্না চত্থরিবগে হায়বা ৱাফম পাউদমখি‍। “ঐখোয়না তোঙান তোঙানবা থাক্কী শান্নরোয় অমসুং কোচ লীশিং কয়ানা থৌরমশিংসিদা শরুক য়াদুনা মখোয়গী লৌশিং হেগৎহন্নবগী থৌরমশিংসিদগী চাউনা কান্নবা ফংখি,” হায়না মহাক্না হায়খি‍।

অদুম ওইনমক, লোকদাউনগী অনিসুবা তাঙ্কক্তদি শান্নবুংদা ত্রেনিং তৌবা অমসুং শান্ন-খোৎনবগী থৌরমশিং পাঙথোকপা হায়বসিদা ভারত লৈঙাক্না মীৎয়েং থমগনি হায়না মহাক্না হন্না হায়খি‍। “শান্ন-খোৎনবগী লূপ খুদিংমক্না ইনগদবা চৎন-কাঙলোনশিং য়াওরবা য়াম্না চেকশিনবাএস.ও.পি. অমা ইন্দুনা অকক্নবা অথিংবা খরগা লোয়ননা শান্ন-খোৎৎনবগী থৌরম খরা লৈঙাক্না অয়াবা পীখ্রে‍। ইকুই কুইদনা ঐখোয়গী মতিক চারবা ওলিম্পিক্তা শরুক য়াগদবা শান্নরোয়শিংগী ত্রেনিং অখন্নবা কেম্পশিংদা হৌখ্রে হায়বা ৱাফমসি ময়ামদা পাউদমজরি‍। ঐনা স্তেত অমসুং য়ুনিয়ন তেরিতরী পুম্নমক্কী শান্ন-খোৎনবগী মন্ত্রীশিংগা লোয়ন-লোয়ননা নেসনেল স্পোর্ত্স ফেদরেসনশিংগা ৱারী শান্নখ্রে অমদি মখোয়দা তপ্না তপ্না শান্ন-খোৎৎনবগী থৌরমশিং মখা চত্থনবা ৱাফম থমখ্রে‍। ঐখোয়না মদু মীয়ামগী থাজবা হেনগৎহন্নবা মথৌ তাই‍। ভারত্তা শান্ন-খোৎনবগী থৌরমশিং সেপ্তেম্বর নৎত্রগা ওক্তোবরদগী মখা চত্থবা হৌগনি হায়না ঐনা থাজৈ অমদি অচৌবা লীগশিংসু মখা শমথনবা খন্নরি,” হায়না শান্ন-খোৎৎনবগী মন্ত্রীনা ফোঙদোকখি‍।

কোবিদ লান্থেংনবদা য়ুথ এফিয়ার্স মন্ত্রালয়গী নহা ভোলুন্তিয়রশিংনা য়াখিবা থৌদাংগী মতাংদসু শ্রী রিজিজুনা পাউদমখি‍। “য়ুথ এফিয়ার্স মন্ত্রী ওইনা, কোবিদ মনুংসিদা সিভিল বোদীশিং অমসুং মীয়ামদা মতেং পাংননবা ঐগী নহা ভোলুন্তিয়র মিলিয়ন ৬ লৈ‍। হৌজিক মখোয়না লৈঙাক্না অন্লোক তাঙ্কক্তা লায়রবশিংদা মতেং পীননবা পায়খৎলিবা হৌদোক্লিবা অনৌবা স্কিমশিংগী মীয়ামদা পাক-শন্না খঙহনবগী থবক তৌরি‍। লৈঙাক অসিনা লৈবাকসিগী লায়রবা মীয়ামদা চাননবা চীঞ্জাক লেম্না নভেম্বর থা ফাওবা পীননবা ফিরেপ লৌখ্রে, অমদি ঐখোয়গী ভোলুন্তিয়রশিংনা ময়োল্লম অমসুং মনুং হঞ্জিনবা খুঙ্গংশিংদা মখোয়না কান্নবা ফংবা য়ারবা হায়রিবা স্কিমশিংসিগী মতাংদা মীয়ামদা পাক-শন্না খঙহল্লি‍।”

কম্মনৱেল্থ লৈবাকশিংগী পুনশিন্দুনা চৎমিন্নবগী ৱাখল্লোন অসিবু থাক ৱাংনা থাংগৎলদুনা, শ্রী রিজিজুনা হায়, “২০২২ কম্মনৱলে্থ গেম্সতা সুতিং (নোংমৈ কাপ্পী) অমসুং আর্চরী (তেন কাপ্পী) মশান্না হাপচিনবদা য়াবিবগীমক্তা ঐনা কম্মনৱেল্থ গেম্স কম্মিতীবু থাগৎচবা ফোঙদোকচরি‍। হায়রিবা অথোই-অহেন তান্নবশিং অসি য়ু.কে.দা নত্তবদা ভারত্তা পাঙথোকচরবসু, ভারতকী ৱাফমবু লূম্না লৌবিবগদমক ঐনা কম্মিতীবু থাগৎচরি অমদি অসিগুম্বা অমনা অমগী ৱা তানবগী মওং মতৌ  অসিনা কম্মনৱলে্থ লৈবাকশিংগী মরী হেন্না চেৎশিনহনগনি হায়না পুক্নীংদা ফাওজৈ‍।”

*******