কেন্দ্রগী হকশেল অমসুং য়াইফ য়ুম্বাল মন্ত্রালয় দা. হর্শ বর্ধননা কোবিদ-১৯ শন্দোকপদগী ঙাকথোক্নবা মাস্ক অমসুং সেনিতাইজর য়েন্থোক্নবা পঞ্জাব নেস্নল বেঙ্ককী (পি.এন.বি.) লৈবাক পুম্বগী সি.এস.আর. কেম্পেন ঙসি হৌদোকখ্রে। শ্রী এস.এস. মল্লিকারজুনা রাও, এম.দি. অমসুং সি.ই.ও. অমসুং পি.এন.বি.গী অতোপ্পা মকোক থোংবা ওফিসিএলশিংসু শরুক য়াখি। লৈবাক পুম্বদগী পি.এন.বি.গী জোনেল ওফিস ২২না ভিদিও কনফরেন্সিংগী খুত্থাংদা শরুক য়াখি।

পি.এন.বি.না লৈবাক অসিগীদমক কত্থোক্লিবা অসিবু থাগৎলদুনা দা. হর্শ বর্ধননা হায় “ভারতকী পঞ্জাব নেস্নেল বেঙ্ককী অহানবা স্বাদেশি বেঙ্ক অসি লৈবাক নিংবগী থৌনা লিংজেল অমসুং লালা লাজপৎ রাইগুম্বা নিংতম লান্মীশিংগী ইথিলনা লিংখৎহনখিবনি। মসি ভারত মচাগা লোয়ননা ভারতকী শেলনা চল্লাইবা অহানবা বেঙ্কনি। নিংতম্বা ফংদ্রিঙৈ মমাংগী মতমদা, বেঙ্ক অসিদা জালিয়নৱালা বাঘ কম্মিতিগী একাউন্ত লৈখি লোয়ননা মসি মহাত্মা গান্ধী অমসুং পন্দিৎ জৱাহর্লাল নেহরুনা চল্লাইবনি।”

মালেম পুম্বনা কোবিদ ১৯গী অৱাবা মায়োক্নরিঙৈ মতম অসিদা পি.এন.বি.না লৌরিবা থৌদাং অসিবু তৌবিমল খঙবা উত্তুনা মহাক্না হায়, “লায়চৎ অসিগী মায়োক্তা লান্থেংন্ননবা সরকারনা হোৎনরিবশিং অসি পি.এন.বি.না মতেং পাংলিবা অসিদা ঐহাক্না নুংঙাইবা পোকই। বেঙ্গ অসিনা পি.এম. ক্যের্স ফন্দদা দোনেসন তৌবা অমসুং মাস্কশিং অমসুং সেনিতাইজরশিং য়েন্থোক্নবা সি.এস.আর.গী থবক থৌরমশিং পাঙথোকপা অসিগুম্বা খোঙথাংশিং লৌখৎলি। মাস্কশিং শীজিন্নবা অমসুং অফবা হেন্দ হাইজিন তৌবনা কোবিদকা চান্নবা লমচৎ শাজৎ থৌগৎলি অমসুং হৌজিক্কী ওইনা লায়না অসিগী খ্বাইদগী ফবা ‘সোসিএল বেক্সিন’ ওইরি। বেঙ্ক অসিনা অসিগুম্বা পোৎলম অসি লৈবাক অসিগী জিলা ৬৬২দা য়েন্থোকখ্রে অমসুং ঐহাক্না পি.এন.বি.না হোৎনরিবশিং অসিবু থাগৎপা ফোঙদোক্লি।”

প্রধান মন্ত্রী শ্রী নরেন্দ্র মোদীগী লুচিং মখাদা কোবিদকী মায়োক্তা পুন্না লান্থেংনরিবা অসি নিংশিংলদুনা মহাক্না হায়খি, “চিনানা মালেম মীয়ামদা ভাইরস অসিগী মতাংদা খঙহল্লকপগা এক্সপর্তকী কম্মিতিগী অহানবা মীফম পুং ২৪গী মনুংদা হকশেল মন্ত্রালয়দা পাঙথোকখি। লৈবাক অসিনা জনুৱারী ২০২০দা পুনেগী নেস্নেল ইন্সতিত্যুৎ ওফ ভাইরোলোজীদা নোবেল ভাইরস তেস্ত তৌনবা লেব অমখক লৈরম্বদগী য়াম্না ফগৎলদুনা ঙসি লেব ১২৬৮ লৈবা ঙমখ্রে। মমাংগী চহিশিংদা রেস্পিরেতরী ভাইরসশিংগী সেম্পল পুম্নমক তেস্ত তৌনবা য়ু.এস.এস.দা থারম্মি।” মথংগী চয়োল ১০দগী ১২গী মনুংদা লৈবাক অসিনা তেস্ত তৌবা অসি মীওই কোতি অমা তৌবা ঙম্লগনি।

লৈবাক অসিদা মাস্কশিং. পি.পি.ই.শিং অসিনচিংবা শাবা হেনগৎহনবগী মতাংদা, দা. হর্শ বর্ধননা ফোঙদোকখি: “ঐখোয়না পি.পি.ই.শিং. এন৯৫ মাস্কশিং অমসুং ভেন্তিলেতর মমাংদা পুশিল্লক্লম্মি। অদুম ওইনমক, সরকারনা লৌখৎলিবা খোঙথাংশিংগা লোয়ননা ঐখোয়গী ওন্তর্প্রিনোরশিংনা পোৎলমশিং অসিগী লৈবাক মনুংদা তৌরিবা দিমান্দ অসি ফংহন্নবা ফীভম অসি খুদোংচাবদা মায় পাক্না ওন্থোকখ্রে।”

দা.হর্শ বর্ধননা লৈবাক অসিনা খুদোংথিবা অসি কোকহনবা ঙমগনি হায়না মহাক্কী থাজবা ফোঙদোকখি, “ঐখোয়না লৈবাক অসিদা লায়না কয়া মপুং ফানা লাকশিনখ্রে। ঐখোয়না পোলিওময়ালাইতিস অমসুং স্মোলপোক্স মুত্থৎখ্রে, এদস, নিপাহ ভাইরস, স্বান ফ্লু অমসুং জিকাগী মতাংদা খুদোংথিবা কোকহনখি। লৈবাক অসিদা ইবোলা চংলকপদগী ঙাকথোকখ্রে। ঐখোয় পুন্না হোৎনবনা খুদোংথিবা অসি মায়োক্নবা ঙমগনি হায়না ঐহাক্না থাজৈ” মহাক্না হায়খি ভারত অসি মালেমগী ওইনা কেস ফেতেলিতী রেৎ খ্বাইদগী নেম্মী। মসি ঙসি ২.৪৬% ওইরিবা অসি সরকারনা মপুং ফানা ক্লিনিকেল মেনেজমেন্ত প্রোতোকলশিংনা মরম ওইরগা ঙমহন্নবনি।

পি.এন.বি.গী সি.ই.ও. শ্রী এস.এস. মাল্লিকরজুন রাওনা হায় প্রধান মন্ত্রীনা লৈবাক পুম্বা এপিল তৌখ্রবা মতুংদা পব্লিক সেক্তর ইন্তর্প্রাইজশিং (পি.এস.ই.শিং), মাইক্রো, স্মাল এন্দ মিদিয়ম ইন্তর্প্রিজশিং (এম.এস.এম.ই.) অসিগুম্বা তোঙান তোঙানবা  স্তেকহোল্দরশিংগা লোয়ননা মখোয়না চুংশিন্নদুনা শেন্মীৎলোন ফগৎনবা হোৎনরি। মখোয়না প্রধান মন্ত্রীগী অত্মানির্ভর ভারত অভিয়ান ইমপ্লিমেন্ত তৌবদা মতেং পাংদুনা জন ধন য়োজনাগী মখাদা অমদি দাইরেক্ত বেনিফিৎ ত্রান্সফরগী খুত্থাংদা য়াম্লবা মীয়াম পুশিল্লকপা ঙমখ্রে।

পি.এন.বি.গী মকোক থোংবা ওফিসিএলশিংনা হকশেল মন্ত্রীদা মাস্কশিং অমসুং সেনিতাইজরশিংগী কোবিদ কিৎ অমা, বেঙ্কনা মায় পাকখিবগী লাইরিক অমা অমসুং অতোপ্পা মেমোরবিলিয়া খুদোল তমখি।

***