ভারত সরকারগী তুরিজম মন্ত্রালয়না জুলাই ১৮, ২০২০দা “দি মিস্তিকেল ত্রাইএঙ্গল – মহেশ্বর, মান্দু এন্দ ওমকারেশ্বর” হায়না মিংথোনবা দেখো অপনা দেশকী ৱেবিনার সিরিজ শিনখ্রে।

ইন্দোরগী ইনকম তেক্স কম্মিসর্নর কুমারি অশিমা গুপ্তা অমসুং সিঙ্গাপুরদা য়ুম্ফম ওইবা মার্কেতিং প্রোফেস্নেল, সরিতা অলুরকারনা লান্থোকখিবা ৱেবিনার অসিনা মিস্তিকেল ত্রাইঙ্গলগী মখাদা লৈরিবা ফজরবা লম থুংফমশিং অসি উৎখি অমসুং ভাবোকশিংদা মধ্য প্রদেশ স্তেৎকী ইং চিকপা পুক্নিং চিংশিন্নিঙাই ওইরবা ছুতিদা চৎপা য়ারবা মফমশিং মমিং ওইনা পল্লবদা হেশ্বর, মান্দু অমসুং ওমকারেশ্বর অসি খঙহল্লি। দেখো অপনা দেশ ৱেবিনার সিরিজ অসি এক ভারত শ্রেশথা ভারতকী মখাদা ভারত্তা লৈরিবা মখল কয়ানা খুন্দাবা মফম অসি উৎনবা হোৎনবনি অমসুং মসিনা ভর্চ্যুএল প্লেৎফোর্মগী খুত্থাংদা এক ভারত শ্রেশথা ভারতকী ৱাখল্লোন লেপ্পা লৈতনা শন্দোক্লি।

মিস্তিকেল ত্রাইএঙ্গল অসিগী অহানবা লম থুংফম ওইরিবা মহেশ্বর নত্রগা মহিশমতি অসি মধ্য প্রদেশকী ইং চিকপা পুক্নিং চিংশিন্নিঙাই ওইরিবা  ইন্দোর সহরদগী কি.মি. ৯০ লাপ্পা লৈবা ইতিহাসকা শাগোন্নরিবা মরু ওইরিবা লম থুংফম অমনি। সহর অসিগী মমিং অসি লোর্দ শিবা/ মহেশ্বরাদগী লৌরগা থোনবনি, মসি রমায়ন অমসুং মহাভারত মহাকাব্যশিং অসিদা পল্লমখি। থৌরম লান্থোকইবশিংনা মহারানি রাজমাতা অহিল্যা দেবি হোলকরগী পুন্সি অমসুং মতমগী মতাংদা লিখি। সহর মচা অসি নর্মাদা তুরেলগী অৱাং থংবদা লৈ। মালহর রাও হোলকার III না কোনুং ইন্দোরদা হোংদোক্তিঙৈ মতমদা মফম অসি মরাধা হোলকারনা পল্লিঙৈ মতমদগী জনুৱারী ৬, ১৮১৮ ফাওবদা মালৱাগী কোনুং ওইরম্মি। তরানিপান শুবা চহিচাগী লোইশিল্লকপা শরুক্তা মহারানি রাজমাতা অহিল্যা দেবি হোলকরগী  মতমদা মহেশ্বর অসিনা কোনুং ওইরম্মি। মহাক্না সহর অসিবু দলানশিং অমসুং মীয়ামগী ওইবা মফম কয়ানা লৈতেং হাপলম্মি অমসুং মফম অসিদা মহাক্কী কোনুং লোয়ননা লাইশঙ কয়া, লানবন অমা অমসুং তুরেলগী মপালগী ঘাতশিংগী লৈফম ওইরি।

মহারানি অসি মহাক্কী চমজবা মওংগীদমক খঙনরম্মি, রাজৱাদা নত্রগা নিংথৌগী ইমুং মনুংগী লৈফম ওইরিবা মহারানিনা মীয়ামগা উন্নফম ওইরিবা মথোল অনি ৱাংবা দলান অসিনা শাখি ওইরি। লম কোইবশিংনা মফম অসিদা লাকপদা মহারানিগা মরী লৈনবা পোৎশিংগী লৈবা থেংনগনি।

অহিলয়া দেবিনা লাই খুরুলম্বা মফম ওইরিবা অহিলয়েশ্বর তেম্পল, অহিলয়েশ্বর তেম্পলগী মনাক নকপদা লৈরিবা বিতথাল তেম্পল অসি আর্তি তৌনবা অমসুং আর্কিতেকচর য়েংনবা লমথুংফমশিং ওইরি। রাজমাতানা শারম্বা লাইশঙ ৯১ রোম লৈ।

নুমিৎ থোলকপা অমসুং নুমিৎ তারকপগী ফজবা অসি মহেশ্বরগী ঘাৎশিং অসিনা খ্বাইদগী য়েংবা নুংঙাইগদবা মফম ওইরি অমসুং লনবানগী মফম অসিনা  অহিলয়া ঘাৎতা খ্বাইদগী ফজনা উবা ফংগনি। কনাগুম্বা মীওইনসু হী তোংদুনা চৎপা য়াগনি, নুমিৎ তাখ্রবা মতুং য়াচংলকপদা হী হোনবশিংনা নর্মদা তুরেলদা থাওমৈ থালি। লোর্দ শিভদা কত্থোক্লবা বনেশ্বর তেম্পল অসিনা মরু ওইবা নুমিৎ তারকপা মতমদা মহেশ্বরদা য়েংগদবা মরু ওইবা লাইশঙ অমনি। নর্মদা আর্তি অসি নর্মদা ঘাত্তা নুমিৎ তারকপদা পাঙথোকই।

অহিলয়া দেবিনা চাউখৎহল্লম্বা মরু ওইবা হীরম অমদি তেক্সতাইলসনা ওইরি, মহাক্না মতম অদুদা লৈরম্বা সারীশিংদগী তোপ তপ্পা সারীশিং শানবা সুরৎ অমসুং খা ভারত্তগী ফী শাবা হৈরবশিং কৌরমখি। মসিদা শীজিন্নরিবা ময়েকশিং অসি লনবনগী অর্কিতেকচর অমসুং নর্মদা তুরেলদগী পোক্লকপা ইথিলশিংদগী ওইখি। হায়রিবশিং অসি নিংথৌগী মীথুংলেনশিংদা খুদোল তমখি।

মহারানি রাজমাতা অহিল্যা দেবি হোলকর অসি কালাবু থম্মোয় শেংনা পামজবা মীওই অমনি। মহাক্না সারীশিংবু পামজৈ অমসুং ১৭৬০দা সুরৎকী মমিং লৈরবা ফী শাবশিং কৌদুনা মহাক্কী লমদম অসিদা অফবা ফী- নিংথৌগী ইমুংগীনি হায়বদা চান্না ফী শাহনখি। মরোমদোম পাঞ্জরম্বা লৈবাক অসিদা ফীশা-লোনশাগী কালা মরা চেৎনা লৈরম্মি অমসুং মসিনা হৌজিক মহেশ্বরিগী ফী অসি ওইহল্লিবনি। মমাংদা লংজমনা শারম্বা অদু – ১৯৫০গী মতমদগী মুগা শাবা হৌখি অমসুং অসুম তৌদুনা চৎনবি ওইরকখি। রেৱা সোসাইতী অসি ১৯৭৯দা হৌদোকখি, মসি মহেশ্বরগী ফীশাবশিংগী য়াইফ থৌরাংগী ওইবা নন প্রোফিৎ ওর্গনাইজেসন অমনি।

ওমকারেশ্বরদা লাই ৩৩ অমসুং পুক্নিং হুন্না ফজরবা শিব্লিং ১০৮ লৈ অমসুং মসি নর্মদাগী অৱাং থংবা তোর্বানদা লৈবা অমতা ঙাইরবা জ্যোতির্লিঙ্গা ওইরি। ওমকারেশ্বর অসি ইন্দোরদগী কি.মি. ৭৮ লাপ্পা মধ্য প্রদেশকী লাইফমলেন অমনি। ওমকারেশ্বর তেম্পলদা লাকপদা মমলেশ্বর তেম্পল চংলমদবা হায়বা অসি অৱাৎপা অমা ওইগনি। মফম অসিদা নুমিৎ খুদিংগী লোর্দ শিভনা পোথাবা লাকই হায়না থাজনৈ মরম অসিনা শয়ন আর্তি কৌবা অখন্নবা আর্তি অমা নুমিৎ খুদিংগী নুমিদাং পুং ৮:৩০দা পাঙথোকই অমসুং লোর্দ শিভ অমসুং লাইরেম্বী পার্বতিগীদমক দাইসকী মশানা অমা শিল্লি। সিধানথ তেম্পল অসি খ্বাইদগী ফজবা লাইশঙ অমনি ফজরবা লাইশঙ অসি য়েংনবা কনাগুম্বনা মতম কাইথোকোপা তঙাই ফদে।

মধ্য প্রদেশকী ধার জিলাদা লৈবা মান্দু অসি মান্দবগর, শাদিবাবাদ (সিতি ওফ জয়) হায়বা মমিংনসু খংনৈ। মসি ইন্দোরদগী কি.মি.৯৮মুক লাপ্পি অমসুং মিতর ৬৩৩ ঙম্বা মফম অমনি। মান্দুগী ফাওবগী খ্বাইদগী নকপা মফম অসি রত্লম (কি.মি. ১২৪) নি। মান্দুদা লৈবা লানবন অসি স্ক্যার কিলোমীতর ৪৭গী মফম অমদা শন্দোক্লি অমসুং লানবনগী ফক্লাং অসি কি.মি. ৬৪ ওইরি।   

মান্দু অসি মরু ওইনা সুল্তান বাজ বাহাদুর অমসুং রানি রুপমতিগী নুংশি নুংওনগী মমিং চৎলি। নোংমা শা-তানবা চৎপদা বাজ বাহাদুরনা খংহৌদনা য়াও শেনবী অমা মহাক্কী মরুপশিংগা লোয়ননা শান্নদুনা ঈশৈ শক্তুনা লৈবা থেংনরম্মি। মহাক্কী পুক্নিং হুনা ফজবা অমসুং খোইথুম্লবা খোঞ্জেল অনিমক্না শুমহৎলদুনা মহাক্না রুপমতিবু মহাক্কী কোনুংদা তুং ইলক্নবা হায়জরম্মি।  মহাক্না কোনুংদা মহাক্কী নুংশিজরবা অমসুং ইকায়খুম্নরবা তুরেল নর্মদা উবা ফংবা মফম অমদা লৈগনি হায়বা ফীভম অমদা রুপমতিনা মান্দুদা চৎপা য়ারম্মি। রুপমতিগী ফজবা অমসুং নুংশিরবা খোঞ্জেলগী মরমদা খংলবা মতুংদা মুঘলশিংনা মান্দুদা লান্দানবা ৱারেপ লৌরম্মি অমসুং বজ বাহাদুর অমসুং রুপমতিবু খুদুম চল্লম্মি। মান্দু অসি লায়না মাথীবা পীখি অমসুং মুঘল লান্মীশিংনা লানবন তম্না চংশিল্লকপদা খুদুম চন্দনবা রুপমতিনা মথন্তা হু থম্তুনা শিজখি।

১৬শুবা চহিচাদা শখিবা বাজ বাহাদুরগী পেলেস অসি অচৌবা হোলশিং অৱাংবা য়ুমথকশিংনা কোয়শিনবা মসিগী অচৌবা শুমাং থেলোংশিংগী মমিং চৎলি। মসি রুপমতিগী য়ুমগী মখাদা লৈ অমসুং য়ুম অসিদগী উবা ফংই।  

রেৱা কুন্দ

রানি রুপমতিগী লৈফমদা ঈশিং পীনবগীদমক্তা বাজ বাহাদুরনা রিজর্বর অমা শখি। রিজর্বর অসি য়ুমগী মখাদা লৈবা মরমনা আর্কিতেকচ্যুল মার্বেল অমা ওইনা লৌই।

জহাজ মহল/শিপ পেলেস

খুৎশেমগী পাৎ অনিগী মরক্তা লৈরিবা মথোল অনিগী আর্কিতেকচ্যুল মার্বেল অসি ঈশিংদা তাওবা জহাজ অমগুম্না লৈবা মরম্না মমিং অসি থোল্লিবনি। সুল্তান ঘিয়াস-উদ-দিন-খালজিনা শাখিবা অসিনা সুল্তানগী হারেম অমা ওইনা শিজিন্নখি।

মসিগী অকোয়বদা কনাগুম্বনা চৎপা মতমদা পোহা, কাচোরি, বাফ্লানচিংবা মফমদুগী চীঞ্জাক চাদনা তোক্তে।

ৱেবিনার অসি লোয়শিল্লদুনা এদিস্নেল দিরেক্তর জেনেরেল রুপিন্দর ব্রারনা লম কোয়বগী মরুওইবা অমসুং মমল নায়দ্রবা হরাওবগী আৱা নুংঙায় অদু ফোঙদোকখি।

ৱেবিনারশিং অসিগী সেসনশিং অসি হৌজিক মখাদা পীরিবা লিঙ্কশিং অসিদা ফংগনি

https://www.youtube.com/channel/UCbzIbBmMvtvH7d6Zo_ZEHDA/featured

http://tourism.gov.in/dekho-apna-desh-webinar-ministry-tourism

https://www.incredibleindia.org/content/incredible-india-v2/en/events/dekho-apna-desh.html

ৱেবিনারশিং অসিগী সেসনশিং অসি ভারত সরকারগী তুরিজম মন্ত্রালয়গী সোসিএল মেদিয়া হেন্দলশিংদসু ফংগনি।

এক্সপ্লোরিং ভাইজাগ হায়না মিংথোনবা মথংগী ৱেবিনার ২০২০গী জুলাই ২৫গী অয়ুক্কী পুং ১১.০০দা পাংথোক্লগনি।

***