মাইনোরিতী এফিয়ার্সকী কেন্দ্র মন্ত্রী শ্রী মুখতার অব্বাস নাকবিনা ঙসি “শেমদোকপা অসি কাংলোন ইলহনবা খক্তা নত্তে”, লৈবাক অমসুং মীওইবশিংগী অফবা পুরক্নবগী হীরমদা “শেমদোকপা অসি করিগুম্বা খরা পাংথোক্কে হায়না লেপ্পনি” হায়না হায়খ্রে।

দিল্লী য়ুনিবর্সিতীগী সেন্তর ফোর দিবেলপমেন্ত ইন হাইয়র ইদুকেসন (সি.পি.দি.ঐচ.ই.)গী হৌদোকপগী থৌরমদা “পাউমী, মীদিয়া অমসুং সিনেমানা লৈবাক অমসুং চারোন শুরোন শেমগৎপদা লৌবা থৌদাং”গী মতাংদা ৱা ঙাংলদুনা শ্রী নাকবিনা হায়খিবদা সরকার, রাজনিতি, সিনেমা অমসুং মীদিয়া অসি খুন্নাই অমসুং থৌনা, করিগুম্বা অমা পাংথোক্লগে লেপ্পা অমসুং চেকশিনববু চাংয়েংবা, য়েংশিনবা অমসুং মরীশিং অসিবু হেন্না কনখৎহন্নবা তঙাইফদবা লাইশোলশিংনা চেৎনা পুনশিন্দুনা অমগা অমগা মরী লৈনহল্লি হায়খি।

শ্রী নাকবিনা হায়খিবদা করিগুম্বা ইরাং অমগী মতমদা সরকার, খুন্নাই, সিনেমা অমসুং মীদিয়ানা “থৱাই অমা, হকচাং মরি” ওইনা মথৌ তৌই হায়খি। “নিং-খা তম্বা ফংদ্রিঙৈ অমসুং ফংলবা তুংদা লৈবাক অসিদা করিগুম্বা ইরাং অমা থোকপা মতমদা হায়রিবা কাংলুপ মরি অসিনা লৈবাক্কী অমসুং মীওইশিং অসিগী য়াইফনবগীদমক্তা পুন্সিন্দুনা য়াম্না পুকচেল শেংনা মশা মশাগী থৌদাং পাংথোক্তুনা লাক্লি হায়বসি পুৱারীনা শাখিনি” হায়না মহাক্না মখা তানা হায়খি।

শ্রী নাকবিনা চহী চা অমগী মনুংদা মালেম অসিনা অসিগুম্লবা ইরাং অমা কোরোনা লায়চৎকী মওংদা থেংনরি হায়না হায়খি। “চারোন শুরোন কয়া অমনা অসিগুম্বা খুদোংচাদবশিং অসি অমুক্তা উরকখিদ্রি। অদু ওইরবশু ঐখোয়না ৱাখল লৈবা খুন্নাই, সরকার, সিনেমা অমসুং মীদিয়াগী পাংথোকফম থোকপা থৌদাং পুম্নমক অমত্তা চিত্থদনা পাংথোক্লি অমসুং য়াম্না মরু ওইবা ওইনা ভারত্তদি মসিগী কাংলুপ মরি অসিনা পুন্সিন্দুনা খুদোংচাদবশিং অসিগী ৱারোইশিন অমা ওইরি” হায়না মহাক্না মখা তাখি।

শ্রী নাকবিনা হায়খিবদা হৌখিবা থা তরুক অসিগী মনুংদা থবক, নাৎ, লমচৎ-শাজৎ অমসুং গনতন্ত্রগী মরিশুবা য়ুম্বী হায়না লৌনরিবা খুন্নাই, সিনেমা অমসুং মীদিয়াগী করিগুম্বা ফিভম অমা শেম্বগী অচেৎপা ফিরেপ লৌবগী মতাংদা মশক থোকপা অহোঙবা কয়া অমা লৈখ্রে হায়না হায়খি। শেমদোকপা হায়বসি চৎন-কাংলোন খক্তগী মতুং ইন্না পাংথোকপা নত্তে, মসি করিগুম্বা অমা পাংথোক্কে হায়না খনবদগী ওইরকপনি। ঙসিগী ওইরিবা কোরোনাগী লায়চৎ অসিগী মনুংদা কাংলুপ খুদিংনা থবক তৌবগী চৎনবি অমসুং পুন্সি মহিংদা অচৌবা অহোঙবা কয়া উবা ফংলি।

খবর ফোংবা অসি মতম শাংনা লেপখি, সিনেমাশু অচৌবা স্ক্রীন্দগী অপিকপা স্ক্রীন্দতা নত্তনা ওনলাইন্দা ফাওবা হন্থখি, লৈবাক কয়া অমনা ওনলাইন্দা ই-পাউ ফংবগী হৈনবি লৈরকখি তৌবতবু ভারতকী মীশিংগী অচৌবা কাংলুপ অমদি থবক হৌদ্রিঙৈগী মমাংদা খবর পাবগী হৈনবি অদুমক লৈনখি হায়না শ্রী নাকবিনা ফোংদোকখি। কোরোনাগী লায়চৎকী মতমদা ফাওবা মীওই খরদি ওনলাইন্দা ফংবা পাউদা অপেনবা ওইনখিদে।

ফিভম অসি সিনেমাদশু চপ মান্নৈ হায়না মহাক্না হায়খি। তেলিবিজন্দা সিনেমা য়াম্না লাকই, মীয়াম্না নুমিৎ খুদিংগী অনৌবা ফিলম অমা নত্ত্রগা ৱেব-সেরিজ অমা য়েংবা ফংই, তৌবতবু মখোয়শিং অসিদগী অয়াম্বদি ৱারীদা নত্ত্রগা দাইরেক্সন পীবগী থৌওংদা অৱাৎপা খরা অদুমক লৈ। ঙসিশু ভারতকী মীয়াম্না স্ক্রীন অচৌবদা মিৎ পেলহনবা, খুন্নাইদা কান্নবা ৱারোল পীবা সিনেমা য়াম্না পাম্মনা য়েংনরি। ফিলম অমসুং মীদিয়ানা ঐখোয়গী পুন্সিগী থাদোকপা য়াদ্রবা মচল অমা ওইবতা নত্তনা খুন্নাইদা অকনবা ইথিল পীবা ঙম্বগী পাঙ্গল লৈ।

কোরোনাগী লায়চৎ অমসুং লোকদাউনগী মনুংদা ফাওবা মীয়াম্না ফিলম অমসুং মীদিয়াবু থাদোকপা ঙমদ্রি হায়না মন্ত্রীনা হায়খি।

ইলেক্ত্রোনিক মীদিয়া অমসুং দিজিতেল প্লেৎফোর্মশিং অসি য়াম্না শোকপা ওইদ্রবশু পাউগী চেনেল অমসুং দিজিতেল প্লেৎফোর্ম কয়া অমদি ই-পাউ পীবগী মহুত্তা মীয়ামদা অকিবা অমসুং মীপায়বা পোকহন্নবা থৌওংদা মিৎয়েং চংলি। ইরাং মনুং অসিদা খুন্নাইদা কান্নবা অমসুং চাউখৎনবা ৱারোল পীবগী থৌদাং অদুদি পাংথোকপা ঙমদ্রে।

শ্রী নাকবিনা হায়খিবদা ইরাং কয়াগী মনুংদা ভারতকী মীদিয়া অমসুং সিনেমানা মতম পুম্বদা চাউখৎপগী মরু ওইবা থৌদাং লৌদুনা লাক্লি হায়বসি পুৱারীনা শাখিনি হায়খি। ইং ১৯৬০ অমসুং ৭০গী মতমদশু লৈবাক নিংবগী ইথিলনা থল্লবা সিনেমা কয়ানা মীওইশিংগী পুক্নিং শুমহৎখি অমসুং মতম অদুগী লৈবাক নিংবগী ইথিলশিং অদু হৌজিক্কী চারোন শুরোনশিংনা নিংশিংলি হায়না মহাক্না মখা তানা হায়খি।

 “হকীকৎ”, “সাত হিন্দুস্তানি”, “আক্রমন”, “মাদর ইন্দিয়া”, “পুরব ওর পসচিম”, “নয়া দোর”নচিংবা ফিলমশিং অসিনা ঙসি ফাওবদা লৈবাক নিংবগী ইথিল পীরি। “এ মেরে ৱতন কে লোগো, জরা আংখ মে ভর লো পানি”, “ভারতকা রেহনে ৱালা হু, ভারত কে বাত সুনাতা হু”, “য়েহ দেশ হে বির জৱান্নোঙ্কা”, কর চলে হম ফিদা জানো তন সাথীয়ো”, “হর করম অপ্না করেঙ্গে এ ৱতন তেরে লিয়ে”নচিংবা ঈশৈশিং অসি তোঙান তোঙানবা চারোন শুরোনশিংগী য়াম্না পাম্নবা ওইরি অমসুং মসিনা তুং কোইবদা লৈবাক নিংবগী ইথিল পীখিগনি।

শ্রী নাকবিনা সংবিধানগী ইন্সতিত্যুসন অমগা হেক চাংদম্নবদা মীদিয়ানা লৈবাক শেম্বগী হেন্না চাউবা অমসুং মরু ওইবা থৌদাং লৌই হায়না হায়খি। ঙসি প্রিন্ত, ইলেক্ত্রোনিক অমসুং দিজিতেল মীদিয়ানা লৈবাক অসিগী মীশিং ৮০%দা য়ৌবা ঙম্লে। খবর, তেলিবিজন, রেদিও, দিজিতেল প্লেৎফোর্মশিংনা শহর অমসুং খুঙ্গংশিংদগী হেন্দোক্তুনা হেন্না লাপ্না লৈবা মফমশিংদা ই-পাউ য়ৌহনবা ঙম্নবা থাগৎনিংঙাই ওইবা থৌদাং কয়া পাংথোক্লি। দিজিতেল মীদিয়ানা ঐখোয়গী পুন্সিদা মফম অমশু কনবা ঙম্লে হায়না মহাক্না মখা তানা হায়খি।

শ্রী নাকবিনা মীদিয়ান ই-পাউ অমসুং অতোপ্পা ৱারোলশিং পীবগী খুত্থাংদা মীয়ামদা খংহনবদা তেংবাংবতা নত্তনা মসিনা কন্সত্রকতিব ক্রিতিসিজমগী খুত্থাংদা সরকারগী পথাপশিংশু চেকশিন্না লৈহল্লি হায়না হায়খি।

***