লৈবাক অসিগী চাউখৎ-থৌরাংগী থবকশিং য়াংশিনহন্নবা, ভারত সরকারগী ৱারেপ মতুংইন্না খনগৎলবা গ্লোবেল ইন্দিসিজ ২৯গী ফিবম য়েংশিন্নবা কেবিনেৎ সেক্রেতরি রজিব গৌবানা লুচিংদুনা কেন্দ্রগী মিনিস্ত্রী/দিপার্তমেন্ত ৪৭গা লোয়ননা ঙসি নীতি আয়োগনা ভর্চুএল ৱার্কশোপ অমা পাংথোকখ্রে। ৱার্কশোপ অদুদা মরী লৈনবশিংগা ৱা তানবগী মওং, সর্ভে/দেতা এজেন্সশিংগা থবক তৌমিন্নবা; স্তেৎ রেঙ্কিংগী ফ্রেমৱার্ক, পাউ পীথোক-পীশিন তৌনবগী প্লেতফোর্ম অমসুং থবক য়েংশিনবগী মতাংদা খন্নখি।

ৱার্কশোপ হৌদোকপা অদুদা কেবিনেৎ সেক্রেতরিনা হায়খি য়েংশিনবগী থবক অসি শুপ্নগী রেঙ্কিংশিং ফগৎলকপা খক নত্তে , মসি শেন থাদরক্নবা লৈঙাক্কী থবকশিং ফগৎহন্নবা অমসুং অওনবশিং পুরক্নবা অমসুং মালেমগী ওইনা ভারত্তা য়েংলিবা মিৎয়েং ফগৎহন্নবনি। য়েংশিনবগী থবক অসিনা ভারতকী মীয়ামদা খুদোংচাবশিং ফংহন্নবা পায়খৎলিবা থবকশিংদা অহোংবা অমা পুরকপা ঙমগনি।

হায়রিবা গ্লোবেল ইন্দিসিজ য়েংশিনবা মরী লৈন্না নীতি আয়োগ, এন.আই.সি, দি.পি.আই.আই.তি, এম.ও.এস.পি.আই অমসুং অতোপ্পা মিনিস্ত্রিশিংনা পায়খৎলিবা থবকশিংগী মতাংদা শরুক য়ারিবশিংদা নীতি আয়োগকী সি.ই.ওনা পাউদমখি। মহাক্না হায়খি অহোংবশিং পুরক্নবা হায়রিবা ইন্দিসিজ অসিগী ফিবম ফগৎহন্নবা কেন্দ্র অমসুং রাজ্য সরকারশিং, পব্লিসিং এজেন্সিশিং অমসুং সিবিল সোসাইতি ওর্গনাইজেসনশিংগী মরক্তা নকশিন্না অমসুং চাংনাইনা মতেং পাংনবা দরকার ওই।

মালেমগী ওইনা শকখঙলবা ইন্দিসিজগী খুৎথাংদা খুন্নাই, শেন-থুম অমসুং অতোপ্পা লমশিংদা ভারতকী ফিবম ওনবা অমসুং য়েংশিনবা অসি তঙাইফদবা অমনি হায়বা মতম কয়াগী মমাংদগী খনদুনা লাক্লি। থবক অসিগী পান্দমদি হায়রিবা ইন্দিসিজ অসি মশা-মরোমদোম ফগৎহন্নবা অমসুং থৌশিলশিংদা অহোংবা পুরক্নবা খুৎলায়শিং ওইনা শীজিন্নবনি। লোয়ননা মালেমদা ভারতকী অশেংবা শক্তম অমা উৎপা অসিসু ময়াম্না মরুওইবা অমনি। দিপার্তমেন্ত ফোর প্রোমোসন ওফ ইন্দস্ত্রি এন্দ ইন্তরনেল ত্রেদনা পাকশন্না পায়খৎলিবা অহোংবশিং অমসুং ইজ ওফ দুইং বিজিনেস রেঙ্কিংদা ভারত হাইগৎলকপা( ২০২০দা ভারত ৬৩শুবদা হাইগৎলকখি )অসি পায়খৎলিবা থবক অসিগীদমক অচুম্বা খোঙথাংনি হায়না লৌই।

মালেমগী এজেন্সি ১৯না ফোঙবা গ্লোবেল ইন্দিসিজ ২৯ ভারত সরকারগী নোদেল মিনিস্ত্রিশিং অমসুং দিপার্তমেন্ত ১৮দা শীন্নখ্রে।

হায়রিবা ইন্দিসিজ অসিগী ফিবম য়েংশিনবা অমসুং ফোঙলিবা এজেন্সিশিংগী থবকশিংদা নীতি আয়োগনা মতেং পাংগনি। মরী লৈনবা মিনিস্ত্রিশিং/দিপার্তমেন্তশিংনা  মরুওইবা পেরামিতরশিং অমসুং পান্দমশিং অদু ফংলবরা হায়না য়েংশিনগনি। চুম্বা রিপোর্ত তৌনবা মিনিস্ত্রিশিং/দিপার্তমেন্তশিংনা দেতা পব্লিসিং এজেন্সিশিংগা মতেং পাংনগনি। মসিগী থবক অসি য়াংশিন্নবা অমসুং য়েংশিন্নবা মিনিস্ত্রি অয়াম্বদা মাংজৌননা ইন্দেক্স মোনিতরিং সেলশিং হাংদোকখ্রে। মসিগী থবক অসিদা কেন্দ্র অমসুং রাজ্য সরকারশিং অমসুং সিবিল সোসাইতি ওর্গনাইজেসনশিংগী মরক্তা নকশিন্না থবক তৌমিন্নবা দরকার ওই।

গ্লোবেল ইন্দিসিজ ২৯গী অপুনবা দাসবোর্দ অমা শেম্লে। দাসবোর্দ অসিদা এজেন্সিশিংনা শীজিন্নবা দেতা লোয়ননা ওফিসিএল দেতাগী  পেরামিতরশিং য়েংশিনবা য়াগনি। মসিদা রাজ্যশিং অমসুং য়ুনিয়ন তেরিতোরিশিংগী ফিবমশিং য়েংশিন্নবগী খুদোংচাবা লৈরি।

মহাক্কী লোইশিনবগী ৱারোলদা , কেবিনেৎ সেক্রেতরিনা হায়খি লৈবাক অসিগী অশেংবা শক্তম উৎনবা পব্লিসিং এজেন্সশিংগা চাংনাইনা থবক তৌমিন্নবা দরকার ওই। ইজ ওফ বিজিনেস ইন্দেক্সতা ভারতকী রেঙ্কিং হাইগৎলকপা অসি মসিগী খুদম অমনি। নোদেল মিনিস্ত্রি পুম্নমক্তা পি.এম.য়ুশিং লিংখৎলে।

***