জল জীবন মিসন পায়খৎনবা ভিদিও কনফরেন্সকী খুৎথাংদা জল শক্তিগী য়ুনিয়ন মিনিস্তর গজেন্দ্র সিংহ সেখাৱাতনা জে অমসুং কেগী উপ-রাজ্যপাল গিরিস চন্দ্র মুরমুগা ৱারী শানখ্রে। মখোয়গী পুন্সি মহিং ফগৎহন্নবা পান্দমদা লৈবাক অসিগী খুঙ্গংশিংগী মীয়ামদা তঙাইফদবা থবকশিং ফংহন্নবা ভারত সরকারনা থবক পায়খৎলি। জল জীবন মিসন পায়খৎতুনা অফবা থক্নবা ঈশিং মরাং কাইনা অমসুং চাংনাইনা ফংহনগনি। মিসন অসিগী পান্দমদি খুঙ্গংগী য়ুমথোং খুদিংমক মখোয়গী য়ুমদা তোতি ঈশিং ফংহনবনি।

২০২২ ফাওবগী মনুংদা য়ু.তি অসিগী খুঙ্গংগী য়ুমথোঙ খুদিংমক চাদা ১০০ তোতি ঈশিং ফংহন্নবা জে অমসুং কেনা থৌরাং তৌরি। চৎলিবা চহি অসিগী মনুংদা, জিলা অহুম হায়বদি গন্ধরবাল, শ্রীনগর অমসুং রাইসিগী মনুংদা লৈবা খুঙ্গং ৫,০০০ খুদিংমক চাদা ১০০ কোনশিন্নবা থৌরাং তৌরি। মসিগী মতাংদা য়ুনিয়ন মিনিস্তরনা মিসন অসি খুমাং চাউশিনহন্নবা য়ু.তিগী এল.জিগা ৱারী শানখ্রে।

খুঙ্গংগী মীয়ামগী পুন্সি মহিং ফগৎহন্নবা মিসন অসিগী মরুওইবা অসি লুম্না লৌদুনা, হৌজিক মীয়ামগী তোতি ঈশিং য়াফম পোস্তশিংদগী ঈশিং য়ারিবা অসি তোকহন্দুনা য়ুমথোঙশিংদা তোতি শম্নবা কেম্পনগী মওংদা থবক পায়খৎনবা থবক হৌনবা অমসুং হৌজিক লৈরিবা ৱাতর সপ্লাই স্কিমশিং নৌনা শেমজিন্নবা অমসুং ফগৎহন্নবা য়ুনিয়ন মিনিস্তরনা তকশিনখি। অকক্নবা মতমগী মনুংদা খুঙ্গংগী য়ুমথোঙশিংদা তোতি শম্নবা পান্দম অদু ফংনবা মিসন অসি য়াংনা পায়খৎকনি হায়বগী থাজবা এল.জিনা থমখি।

জে অমসুং কেগী খুঙ্গংগী য়ুমথোঙ লাখ ১৮.১৭গী মনুংদা শুপ্নগী য়ুমথোঙ লাখ ৭.৯৬ তোতি ফংলে। ২০২০-২১ মনুংদা য়ুমথোঙ লাখ ২.৩২ তোতি ঈশিং ফংহন্নবা জে অমসুং কেনা থৌরাং তৌরি। ২০২০-২১দা লুপা ক্রোর ৬৮১.৭৭ কাইথোক্লে অমসুং য়ু.তিগী চাকথুং লুপা করোর ৯২৩ ফংলগনি। পায়খৎকদৌরিবা থবক অমসুং শেন-থুমগী ফিবম য়েংলগা য়ু.তি অসি অহেনবা ফন্দ লৌবা য়াগনি।মসিগী পান্দম অসি ফংনবা য়ু.তি অসিদা কেন্দ্র সরকারনা পীবা য়াবা মতেং পীগনি হায়না মিনিস্তর সেখাৱাতনা অমুক হন্না থাজবা পীখি। তোতি শমহনখিবা ইমুং মশিং অমসুং পীখিবা ফন্দ শীজিন্নবগী ফিবম য়েংলগা ভারত সরকারনা জল জীবন মিসনগী ফন্দশিং পীরি।

খুঙ্গংদা ঈশিং পীনবা মচাক-মথুমশিং শেমগৎনবা, থৌরাং তৌনবা, দিজাইন তৌনবা, থবক পাংথোকনবা অমসুং শেমজিন-শাজিনবা তৌনবা য়ামদ্রবদা নুপী মেম্বর চাদা ৫০ য়াওবা গ্রাম পঞ্জায়তকী সব-কমিতি অমা ওইনা ভিলেজ ৱাতর এন্দ সেনিতেসন কমিতি/পানি সমিতিশিং শেম্নবা য়ুনিয়ন মিনিস্তরনা হায়জখি। ঈশিং ফংহন্নবা তঙাইফদবা থবকশিং পায়খৎনবা খুঙ্গং খুদিংমক ভিলেজ এক্সন প্লান(ভি এ পি) থৌরাং তৌনবা খঙহনখি। খুঙ্গং ৬,৮৭৭গী মনুংদা খুঙ্গং ১,৮০০গী ভিলেজ এক্সন প্পানশিং শেমখ্রে। জল জীবন মিসন অসিগী মীয়ামগী ইহৌ অমা ওইহন্নবা মীয়াম শরুক য়াহন্দুনা আই.ই.সি কেম্পেন পাংথোক্নবা থবক পায়খৎকদবনি।

করি করম্বা কেমিকেলশিং য়াওরিবগে হায়বা খঙদোক্নবা থক্নবা ঈশিং পীরিবা হৌরকফমশিং অমুক্তং চাংয়েং তৌগদবনি অমসুং চহি খুদিংগী নোংজু  থা মমাং অমসুং মতুংদা মহিক-মতাইগী চাংয়েং অনিরক তৌগদবনি। ফিল্দ তেস্ত কিতশিংগী খুৎথাংদা খুঙ্গং খুদিংমক অফবা ঈশিংগী চাংয়েং তৌনবা নুপীশিং য়াওনা য়ামদ্রবদা মীওই মঙা ত্রেনিং পীনবা রাজ্যশিংদা খঙহনখি। মথং থা খরগী মনুংদা লেবোরেতোরি খুদিংমক এন.এ.বি.এল এক্রিদিতেসন লৌনবা য়ু.তিদা খঙহনখি।

কোবিদ-১৯ লাইচৎকী হৌজিক ওইরিবা ফিবম অসিদা , খুঙ্গংগী মফমশিংদা তোতি ঈশিং ফংহন্নবা সরকারনা পায়খৎলিবা থবকশিং অসিনা খুঙ্গংগী মীয়ামগী তোতি ঈশিং য়াফম পোস্তশিংদগী ঈশিং য়াবগী অৱাবা কোকহল্লগনি।

****