কেন্দ্রগী এনভাইরোন্মেন্তকী মন্ত্রী শ্রী প্রকাশ জাবেদকর অমসুং জল শক্তিগী কেন্দ্র মন্ত্রী শ্রী গজেন্দ্র সিংহ শেখাৱৎ  য়াওদুনা ঙসি ন্যু দিল্লীদা মন্ত্রালয়শিংগী ওইবা মীফম অমা পাংথোকখ্রে। মীফম অদুদা মন্ত্রালয় অনিমক্কী মকোক থোংবা ওফিসিএলশিং য়াওখি।

মীফম অদুদা সেন্ত্রেল ৱাতর কমিসন, নেস্নেল ৱাতর দিভেলপমেন্ত এজেন্সী অমসুং প্রধান মন্ত্রী কৃশি সিঞ্চায়ী য়োজনা-এ.আই.বি.পি.গী নেস্নেল প্রোজেকশিংগী পন্দুনা লৈবা অকোয়বগী ফীভম/উমংশিং কোকথোকপগী মতাংদা খন্নখি। 

মখা তানা জল শক্তিগী কেন্দ্র মন্ত্রীনা সেন্ত্রেল পোলুসন কন্ত্রোল বোর্দতা গঙ্গা অমসুং মাগী অচৌবা তুরেল মশাশিংদা পোলুসন থোকহল্লিবা ইন্দস্ত্রীশিংবু চাং নাইনা য়েংশিনবগী থবক পাংথোকপা পোলুসন য়েংশিনবগী সিস্তেমশিং মপাঙ্গল কনখৎহন্নবা হায়জখি। মতৌ অসিগুম্না নেস্নেল মিসন ফোর গঙ্গাগা পুন্না খুৎশম্নদুনা ঈশিং ফবা-ফত্তবা য়েংশিনবগী থবক্তা মপাঙ্গল কনখৎহনবদা অকনবা মীৎয়েং থমখি অমসুং মসিদা য়ান্নখিবা চুনবা মেকানিজমশিং মথৌ পাংথোকহনগনি।

এনভাইরোন্মেন্তকী কেন্দ্র মন্ত্রী শ্রী প্রকাশ জাবেদকরনা মন্ত্রালয় অনিমক্কী মন্ত্রীশিংদা চুনবা প্রোসেসশিং ঙাক্তুনা লৈবাক্কী মরুওইরিবশিংগী তুরেলগী প্রোজেকশিংগীদমক্তা থাক নাইনা অমদি থুনা-য়াংনা থবক তৌনবা অমসুং গঙ্গা অমদি মাগী অচৌবা মশাশিংবু ঈশিং ফবা ফত্তবা য়েংশিন্নবগীদমক্তা ইন্সতিত্যুস্নেল মেকানিজমশিং থম্নবা হায়খি। মীফম অদু চত্থরিঙৈদা শ্রী প্রকাশ জাবেদকরনা অকোয়বগী ফীভম, উমং অমসুং ঈশিং-নুংশীৎকী ফীভম হোংবগী মন্ত্রালয়দগী প্রোজেক তাইগর অমসুং প্রোজেক এলিফেন্তকী পরিংদা গেঙ্গেতিক দোলফিনশিং ঙাক-শেন্দুনা থম্নবা অখন্নবা থৌরাংগী অয়াবা পীখ্রে হায়না পাওদমখি।

***