ଖାଉଟି ବ୍ୟାପାର, ଖାଦ୍ୟ ଓ ସାଧାରଣ ବଣ୍ଟନ ମନ୍ତ୍ରଣାଳୟ
ପ୍ରଧାନମନ୍ତ୍ରୀ ଗରିବ କଲ୍ୟାଣ ଅନ୍ନ ଯୋଜନାର ମିଆଦ ବୃଦ୍ଧିକୁ କେନ୍ଦ୍ର କ୍ୟାବିନେଟର ଅନୁମୋଦନ
ଜୁଲାଇରୁ ନଭେମ୍ବର 5 ମାସ ପାଇଁ ମିଳିବ ମାଗଣା ଚଣା
प्रविष्टि तिथि:
08 JUL 2020 4:26PM by PIB Bhubaneshwar
ପ୍ରଧାନମନ୍ତ୍ରୀ ଶ୍ରୀ ନରେନ୍ଦ୍ର ମୋଦୀଙ୍କ ଅଧ୍ୟକ୍ଷତାରେ ଆଜି ଅନୁଷ୍ଠିତ କେନ୍ଦ୍ର କ୍ୟାବିନେଟ ବୈଠକରେ ପ୍ରଧାନମନ୍ତ୍ରୀ ଗରିବ କଲ୍ୟାଣ ଅନ୍ନ ଯୋଜନାର ମିଆଦ ବୃଦ୍ଧିକୁ ଅନୁମୋଦନ କରାଯାଇଛି । କୋଭିଡ-19 ବୈଶ୍ଵିକ ମହାମାରୀ କାଳରେ ଆର୍ଥିକ ସୁବିଧା ସୁଯୋଗ ପ୍ରଦାନ ପାଇଁ ଏହାର ମିଆଦକୁ ଆଉ ପାଞ୍ଚ ମାସ ବୃଦ୍ଧି କରାଯାଇଛି ।
ଏହି ଯୋଜନା ଅଧୀନରେ ବିଭିନ୍ନ ରାଜ୍ୟ ଓ କେନ୍ଦ୍ରଶାସିତ ଅଞ୍ଚଳର ହିତାଧିକାରୀମାନଙ୍କୁ 9.7 ଲକ୍ଷ ଟନ ଚଣା ପ୍ରଦାନ କରାଯିବ । ଜାତୀୟ ଖାଦ୍ୟ ନିରପତ୍ତା ଆଇନ 2013 ଅନ୍ତର୍ଭୁକ୍ତ ପ୍ରତି ଘରକୁ ଆସନ୍ତା 5 ମାସ ପାଇଁ 1 କେଜି ଲେଖାଏଁ ଚଣା ଦିଆଯିବ । ଏବାବଦ ପ୍ରାୟ 6,849.24 କୋଟି ଟଙ୍କା ବ୍ୟୟ ଆକଳନ କରାଯାଇଛି ।
ଏହି ଯୋଜନା ଅଧୀନରେ 19.4 କୋଟି ଘର ଅନ୍ତର୍ଭୁକ୍ତ ହେବେ । ପ୍ରଧାନମନ୍ତ୍ରୀ ଗରିବ କଲ୍ୟାଣ ଅନ୍ନ ଯୋଜନା ବାବଦକୁ ସମସ୍ତ ଖର୍ଚ୍ଚ କେନ୍ଦ୍ର ସରକାର ବହନ କରିବେ । ଖାଦ୍ୟ ଶସ୍ୟ ଅଭାବରେ ଯେପରି କୌଣସି ବ୍ୟକ୍ତି ବା ଗରିବ ପରିବାର ହନ୍ତସନ୍ତ ନହୁଅନ୍ତି ତାହାକୁ ଦୃଷ୍ଟିରେ ରଖି ସରକାର ଏହି ମିଆଦକୁ ଆଉ 5 ମାସ ବୃଦ୍ଧି କରିଛନ୍ତି । ଏହି ଚଣା ଯୋଗାଣ ଫଳରେ ଗରିବ ଶ୍ରେଣୀର ଲୋକମାନେ ଆବଶ୍ୟକ ପ୍ରୋଟିନ ପାଇପାରିବେ । 2015-16ରେ ରହିଥିବା ବଳକା ଡାଲି ଜାତୀୟ ଶସ୍ୟକୁ ଦୃଷ୍ଟିରେ ରଖି ଏହି ଯୋଜନାର ପରିକଳ୍ପନା କରାଯାଇଛି । ପ୍ରଧାନମନ୍ତ୍ରୀ ଗରିବ କଲ୍ୟାଣ ଅନ୍ନ ଯୋଜନା ପାଇଁ ସରକାରଙ୍କ ନିକଟରେ ଯଥେଷ୍ଟ ଚଣା ମହଜୁଦ ଅଛି । ଏପ୍ରିଲ ରୁ ଜୁନ ଯୋଜନାର ପ୍ରଥମ ପର୍ଯ୍ୟାୟରେ ଦେଶର 18.2 କୋଟି ପରିବାରଙ୍କୁ 4.63 ଲକ୍ଷ ଟନ ଡାଲି ଜାତୀୟ ଶସ୍ୟ ପ୍ରଦାନ କରାଯାଇଛି ।
ପ୍ରଧାନମନ୍ତ୍ରୀ ଗତ ମାସ 30 ତାରିଖ ଦିନ ଯୋଜନାର ମିଆଦକୁ ନଭେମ୍ବର ପର୍ଯ୍ୟନ୍ତ ବୃଦ୍ଧି କରିବା ପାଇଁ ଘୋଷଣା କରିଥିଲେ ।
**********
(रिलीज़ आईडी: 1637349)
आगंतुक पटल : 225