দেবেলপমেন্ত ওফ নোর্থ ইস্তর্ন রিজন (দোনর)গী কেন্দ্রগী রাজ্য মন্ত্রী (ইন্দিপেন্দেন্ত চার্জ), পি.এম.ও., পর্সোনেল, পব্লিক গ্রিভান্সেস, পেন্সন্স, এতোমিক ইনর্জী এন্দ স্পেসগী এম.ও.এস. দা: জিতেন্দ্র সিংহনা ঙসি হায়খিবদা কোবিদ মতুংদা ভারতনা শেন্মিৎলোনগী পৱার হাউস অমা ওইনা লিৎখৎলকপদা অৱাং নোংপোক লমদম্না মখোয়গী মরাং কায়রবা মহৌশাগী লন অমদি মীওইবগী হৈশিংবগী লন অসিনা ঙাক্লৌ ওইরগা মাঙজিল থারক্কনি‍। মহাক্না হায়, কোরোনা লাইচৎ অসি নীংথিনা লাকশিনখিবনা অৱাং-নোংপোক লমদমদা শেন্মিৎলোনগী থবক থৌরম খুদিংমক্তা মফমদুগী নুপীগী মতিক (মাত্রশক্তি)না মাঙজিল থানা চঙশিল্লি‍। নুপীশিংনা লাইচৎ অসিগী মায়োক্তা লান্থেংনবদা মায় পাক্লি অমদি অৱাং-নোংপোক লমদমবু কোরোনা লাকশিনবগী তমজনিংঙাই ওইরবা মফম অমা ওইহনবদা মতেং পাংলি‍। মহাক্না ৱাফমশিং অসি ৱেবিনার অমগী খুত্থাঙদা নোর্থ ইস্তর্ন রিজন কম্ম্যুনিতী রিসোর্স এন্দ মেনেজমেন্ত প্রোগ্রাম (নেরকোর্ম্প)গা মরী থম্নবা তোঙান তোঙানবা সেল্ফ হেল্প গ্রুপশিংগা ৱারী ৱাতায় শান্নবদা হায়খিবনি‍। দা: জিতেন্দ্র সিংহনা হায়খিবদা অৱাং নোংপোক লমদমনা শ্রী নরেন্দ্র মোদী লৈঙাক্কী মখাদা হৌখিবা চহী মঙাসিদা চাউখৎপগী তমজনিংঙাই ওইবা খুদম অমা ওইনা লিৎখৎলক্লি অমদি তরুকসুবা চহীসিদনা স্তেত ৮সিদা হৌজিক ফাওবদা মশীং য়ামদবা কেস খরগা মীওই ১৭খক শিবগা লোয়ননা কোরোনা লাকশিনবগী তমজনিংঙাই ওইবা খুদম অমা ওইবা ঙম্লে‍।

দা: জিতেন্দ্র সিংহনা হায়খিবদা প্রধান মন্ত্রী শ্রী নরেন্দ্র মোদীনা মতম পুম্নমক্তা অৱাং-নোংপোক্তা অহেনবা মীৎয়েং চঙদুনা লাক্লি‍। মোদী লৈঙাক্না ২০১৪দা লৈঙাক্লোন পায়বা হৌরকপা মতুং ইকুই কুইদনা প্রধান মন্ত্রীনা অৱাং-নোংপোক লমদমবু লৈবাকসিগী হেন্না চাওখৎলবা মফমশিংগা মান্নবা থাক্তা পুখৎলক্নবা হোৎনফম থোকপা পুম্নমক হোৎনগনি হায়না ফোঙদোকখি‍। হৌখিবা চহী তরুকসিদা চাওখৎপগী লৈরমবা অহোবশিং মায় পাক্না মেনশিনবতা নত্তনা অৱাং-নোংপোক লমদমনা পুক্নীং ৱাখলগী ওইবা থাজবসু ফংবা ঙম্লে‍। ভারতকী কোবিদ মতুংগী শেন্মিৎলোনদা ৱা অসি মরুওইবা শরুক অমা ওইরক্কনি অমদি লমদমসিদা কোরোনা লৈতবগুম্বা ফীভমদা লাকপা মরম্না লম কোয়বশিং য়াম্না লাক্নগদবা অসিগী মথক্তা লমদমসিগী ৱা অমদি অতৈ লনশিংগী মতেংনা ভারতপু শেন্মিৎলোনগী পৱার হাউস অমা ওইহন্নবগী তাঞ্জা অমা পীগনি‍।

দা: জিতেন্দ্র সিংহনা হায়, অৱাং-নোংপোক লমদমদা ভারতকী অপুনবা ৱা হৌরিবসিগী চাদা ৬০রোমদি লৈ অদুগা নীংখা তম্লবা মতুংদগী অমুক্তা ফংখিদ্রিবা ইনোৎ অমা সেক্তর অসিনা প্রধান মন্ত্রী শ্রী নরেন্দ্র মোদীগী মখাদা ফংলিবা অসি য়াম্না খুদোংচাবা অমনি‍। মসিগী মতাংদা ইং ২০১৭দা মোদী লৈঙাক্না চহী ১০০ শুরবা ইন্দিয়ন ফোরেস্ত এক্ত শেমদোকখিবা অমদি মদুনা মরম ওইরগা ৱা পাম্বীশিংগী খুত্থাঙদা হিংনবগী লমবী অমদি খুদোংচাবা হেনগৎহন্নবগীদমক য়ুমদা থাজবা ৱা পাম্বীশিংবু এক্ত অসিদগী কোমথোকখিবগী মতাংদা মহাক্না ৱাফমশিং থমখি‍। কোরোনা লাইচৎ অসিনা লোইখ্রবা মতুংদা লমদমসিগী সেল্ফ হেল্প গ্রুপশিংনা শাবা পোত্থোকশিংগী একজিবিসন অমা লৈবাক্কী কোনুংদা পাঙথোক্কনি হায়নসু মহাক্না ৱাশকখি‍।

লম্বী, রেল, নোংথক্কী লম্বীগী ফীভমদা মশক থোক্না ফগৎলক্তুনা লমদমসিদখক্তা নত্তনা লৈবাক শিনবা থুংনা পোৎ-চৈ পুথোক পুশিন তৌবা অমদি মী চত্থোক চৎশিন তৌবদা হেন্না নুংঙাইহল্লে হায়না দা: জিতেন্দ্র সিংহনা ফোঙদোকখি‍। মমাঙদা রেলৱেজ উখিদ্রিবা অরুনাচল প্রদেশ অমদি মেঘালয়াগুম্বা স্তেতশিং হৌজিক্তি রেলৱেজগী খুত্থাঙদা লৈবাক্কী কোনুংগা শমজিন্নরে‍। মতৌ অসুম্না সিক্কিমগুম্বা স্তেতশিংদসু অহানবা ওইনা এয়রপোর্ত উবা ফংলে‍। অতৈ স্তেতশিংসু অনৌবা পোর্তশিং শেমগৎপা নৎত্রগা হান্না লৈজবা ফেসিলিতীশিং ফীভম ফগৎহনবগী থবকশিং উবা ফংলে‍। পুনেগী মথংদা অরুনাচল প্রদেশতা অনৌবা ফিল্ম এন্দ তেলিভিজন ইনস্তিত্যুৎ অমসু লিংখৎলগনি‍ হায়না মহাক্না ফোঙদোকখি‍। অৱাং নোংপোক্কী এস্পিরেসনেল দিস্ত্রিক্ত ১৪গী মতাংদা পল্লদুনা, দা: জিতেন্দ্র সিংহনা হায়, এস্পিরেসনেল দিস্ত্রিক্তকী ৱাখল্লোন অসি মরুওইবা ইন্দিকেতর ৪৯দা য়ুম্ফম ওইবনি, অদুগা মখোয়গী মনুংদা হেল্থকেয়রগী ফীভম অসি মরুওইবা মচাক অমনি অমদি এস্পিরেসনেল দিস্ত্রিক্তশিংগী অফবা থৌওংশিং ভারতকী অতৈ মফমশিংদা খঙহনগনি‍।

নোর্থ ইস্তর্ন রিজন কম্ম্যুনিতী রিসোর্স এন্দ মেনেজমেন্ত প্রোগ্রাম (নেরকোর্ম্প)গী মখাদা ফংবা শেন্ফমনা মখোয়গী পুন্সিদা হেন্না ফবা অহোংবা পুরকপা ঙম্লে হায়না নুপীশিংগী সেল্ফ হেল্প গ্রুপগী মেম্বর অয়ামবনা ইকায়খুম্নরবা মন্ত্রীদা পাউদমখি‍। হোর্তিকলচর, চা, ৱা, ওক লোইবা, মুগা শুংবা, তুরিজমগুম্বা প্রোজেক্তশিংদা পাম্লিবা ইনোৎ পীবগী মথক্তা এস.ঐচ.জি. মেম্বরশিংনা সেনিতাইজর অমদি মায়খুমশিং মশীং য়াম্না পুথোক্তুনা য়েন্থোকখ্রে‍। লোকদাউন তৌরিঙৈ মনুংদা অৱা-অনা তারবশিংদা চেং-হৱাই য়েন্থোক্নবগীদমক মখোয়না মচাক মথুমশিং তাশিন খোমজিনবগী থবকসু তৌখি‍।

অৱাং-নোংপোক লমদমগী এস.ঐচ.জি.শিং খক্তা নত্তনা নোর্থ ইস্তর্ন কাউন্সিল (এন.ই.সি.) শিল্লোংগী মকোক থোংবা ওফিসরশিংসু ৱেবিনার অদুদা শরুক য়াখি‍।

<><><><><>