লৈবাক শীনবা থুংনা তুরিজম চাউখৎহন্নবা সেন্ত্রেল মোতোর ভেহিকলস রুলস, ১৯৮৯গী মখাদা নেসনেল পর্মিত পীবগী থবক শেমদোক্নবা রোদ ত্রান্সপোর্ত অমসুং হায়ৱেজ মিনিস্ত্রিনা নোতিস অমা থোক্লে। নেসনেল পর্মিত পীবগী থবকশিংগী মখাদা পোৎ-চৈ পুবা গারিশিং মাইপাক্লবা মতুংদা তুরিস্তশিং পুবা গারিশিং অপনবা লৈতনা চেনবা য়ানবা মিনিস্ত্রিনা থবক পায়খৎলকপনি। অনৌবা নিয়মশিং অসি “ওল ইন্দিয়া তুরিস্ত ভেহিকলস ওথোরাইজেসন এন্দ পর্মিত রুলস, ২০২০” হায়না খঙনগনি ,মসি মীয়াম অমসুং মরী লৈনবশিংনা খন্ননবা ২০২০গী জুলাই ১দা ফোঙলে অমসুং মসিনা ঐখোয়গী লৈবাক্কী রাজ্যশিংদা তুরিজম চাউখৎহনগনি অমসুং রাজ্য সরকারশিংগী রেভেন্যু হেনগৎহনগনি। ৱাফম অসি ৩৯সুবা ত্রান্সপোর্ত দিবলপমেন্ত কাউন্সিলগী মীফমদা খন্নখি অমসুং শরুক য়াখিবা রাজ্যশিংনা থাগৎখি অমসুং য়ানিংখি।

অনৌবা স্কিম অসিগী মখাদা, তুরিস্তগী গারি চেল্লিবশিংনা ওনলাইন্দা “ওল ইন্দিয়া তুরিস্ত ওথোরাইজেসন/পর্মিত” লৌনবা হোৎনবা য়াগনি। নিয়মশিংগী মতুংইন্না দরকার ওইবা চে-চাংশিং অমসুং ফি পীশিল্লবা মতুংদা নুমিৎ ৩০গী মনুংদা ওল ইন্দিয়া তুরিস্ত ওথোরাইজেসন/পর্মিত পীগনি।

পীগদৌরিবা ওথোরাইজেসন/পর্মিত অদু থা অহুমগী ওইবা য়াই নৎত্রগা চহি অহুমদগী হেল্লোইদবনি। ঐখোয়গী লৈবাক অসিদা তুরিজমগী অকক্নবা মতম লৈবা অমসুং গারি চেল্লিবশিংগী শেন-থুমগী ফিবম ফত্তবনা মসিগী খুদোংচাবা অসি পীবনি।

স্কিম অসি অপুনবা দেতাবেজ অমগী মখাদা থবক পায়খৎকনি অমসুং ওথোরাইজেসন/পর্মিত পীবদগী ফংলকপা শেনফমশিং অদু তুরিজম চাউখৎহন্নবা অমসুং রেভেন্যু হেনগৎহন্নবা শীজিন্নগনি।

হৌজিক চৎনরিবা পর্মিতশিং মখা তানা মখোয়গী মতম লোইদ্রি ফাওবা চৎনগনি। হৌখিবা চহি ১৫ অসিদা লৈবাক অসিদা লমকোয়বগী ইন্দস্ত্রি শরুক কয়া হেনগৎলকলে। হেনগৎলক্লিবা অসি লৈবাক মনুংগী অমসুং মপান লৈবাকশিংগী তুরিস্তশিং অনিমক্না ওইহনবনি অমসুং ওইরকলিবা ফিবম অসিদা থাজবা ৱাংনা থম্লি।

***