কেন্দ্রগী লৌউ-শিংউ অমসুং লৌমীশিংগী য়াইফ থৌরাংগী মন্ত্রী শ্রী নরেন্দ্রা সিংহ তোমারনা লৌমীশিংদা মখোয়গী লৌফম অদুগী মতুং ইন্না লৌউবদা কান্নবা ফংনবা তোঙান তোঙানবা মখল কয়াগী মহৈ-মরোংশিং থানবা খঙহনখ্রে। লৈবাক অসিগী লৌমীশিংদা ইবা চিথী অমদা শ্রী তোমারনা হায় লৈবাক অসিগী অয়াম্বা শরুক্তা নোংজু থা লাকপগা ইরোইননা মফম অয়াম্বদা মহৈ মরোং লিংবগী থবক লোয়খ্রে অমসুং অতোপ্পা মফম খরদনা হৌজিক লিংলি। চিথী অদুদা শ্রী তোমারনা হায় মহাক্না লৌমীশিংগা পাও ফাওন্দুনা পোত্থোক পুথোকপা হেন্নবা খ্বাইদগী ফবা লৌউ-শিংউগী পাম্বৈশিং শীজিন্ননবা হায়খ্রে।
 

ইন্দস্ত্রীশিং অমসুং ললোন-ইতিকশিংদা অকায়বা পীখিবা লোকদাউনগী ৱারবা মতমগী মনুংদসু লৈবাক অসিগী লৌমীশিংনা থৌদাং লৌদুনা অমসুং কৎথোকপগা লোয়ননা মখোয়গী লৌউ-শিংউগী থবক লোয়শিনখিবা অসিবু থাগৎলদুনা কেন্দ্রগী লৌউ-শিংউ অমসুং লৌমীশিংগী য়াইফ থৌরাংগী মন্ত্রীনা হায়, প্রধান মন্ত্রী শ্রী নরেন্দ্রা মোদীগী লুচিং মখাদা লৈবাক অসিনা হৌখিবা থা অহুম অসিদা কোরোনাভাইরসকী অৱাবা অসি মপুং ফানা থেংনরি। রবিগী মহৈ-মরোংশিং লোকখ্রে অমসুং য়োনবগী থবক থৌরমসু অপনবা য়াওদনা লোয়শিনখ্রে। লৌউ-শিংউগী পোত্থোকনা লৈবাক অসিগী শেন্মীৎলোনগী মরু ওইবা থৌদাং লৌরি।

শ্রী তোমারনা মহাক্কী চিথীদা লৌউ-শিংউগী অফবা পাম্বৈ কয়া ইখি, মখোয় অদুদি খারিফ পন্থাগী মরু ওইবা মহৈ মরোং ওইরিবা ফৌ থাবগী খ্বাইদগী ফবা পাম্বৈ, নাপীশিং কন্ত্রোল তৌবা, বাইওপেস্তিসাইদশিং, ওর্গানিক ওইবা হার অমসুং ভর্মিকম্পোস্ত শীজিন্নবা, চুরি নাইনা মহৈ মরোং থাবা, রাইজোবিয়ম বেক্তরিয়া শীজিন্নরগা হৱাইশিংগী মরু তিংথোকপা, পোতাশ অমসুং ফোস্ফোরসকা লোয়ননা নাইত্রোজেন য়াওবা হারশিং লৈপাক লৈহৌগী ফীভমগী মতুং ইন্না করম্না শীজিন্নগনি, অমসুং খ্বাইদগী ফবা ইথৈ-লৌখোংগী পাম্বৈশিং শীজিন্নবা অসিনি। লৈবাক অসিগী তোঙান তোঙানবা মফমশিংগী মথৌ তাবশিং ফংহনখিবা অদু অমমমতা ওইনা মহাক্কী চিথীদা কুপনা ইখি।

পুম্নক তেনশিন্দুনা, মন্ত্রীনা হায় মদুদি মহৈ-মরোং য়েংশিন্না খ্বাইদগী ফবা পাম্বৈশিং শীজিন্নদুনা লৌউ-শিংউগী পোত্থোক শরুক কয়া হেনগৎহনবা য়াগনি। মাংজৌননা পোরম য়াত্থোকপা, করি তৌবনা চুমগনি লেপথোকপা অমসুং মদু লৌবুক্তা পাঙথোকপা অসি তঙাই ফদে। প্রধান মন্ত্রী শ্রী নরেন্দ্রা মোদীগী খোলাউ “জাই জৱান, জাই কিশান, জাই বিজ্ঞান, জাই অনুসধন” অদু লৌথোক্তুনা শ্রী তোমারনা হায়খি মদুদি প্রধান মন্ত্রীনা লৌউ-শিংউ অমসুং খুঙ্গংশিংনা হৌরকফম ওইরগা অত্মানির্ভার নত্রগা ইরোমদোম লেপচবা ভারত অমা ওইবগী আশা তৌখি। ঐখোয়না খারিফ মহৈ-মরোং মরাং কাইনা পুথোক্নবা হোৎনগদবনি। হৌজিক ওইরিবা ফীভম অসিদা লৌমীশিংনা মখোয়গী য়াইফনবা খক নত্তনা লৈবাক পুম্বগী ওইনা লৌউ-শিংউগী পোত্থোক হেনগৎহন্নবা অচৌবা থৌদাং অমা পুরি।

( কেন্দ্রগী লৌউ-শিংউ অমসুং লৌমীশিংগী য়াইফ থৌরাং মন্ত্রীনা লৌমীশিংদা ইখিবা চিথীগী লিঙ্কবগী ওইনা ি হদা্ত্রীমা লৌউ-শিংউ অমসুং খুঙ্গংশিংনা ্নবাং কন্ত্রোল তৌবা, বাইওপেস্তিসাইদশিং শীজিন)

*****