কোবিদ-১৯ লাইচৎকা লান্থেংনবা মতমদা লৈবাক মচা খুদিংমক্না অমত্তা ওইনা পুন্সি অমসুং হিংনবগী লম্বী ঙাক্নবগীদমক উপ রাস্ত্রপতি, শ্রী ভেনকৈয় নাইদুনা পুক্নিং চিংশিল্লক্লি।

ঙসিগী ফেসবুক পোস্ত অমদা, উপ রাস্ত্রপতিনা হায়খি মদুদি লৈবাক কয়ানা লোকদাউন লোইশিন্নখ্রে অমসুং শেন্মিৎলোন্দা মায় ওনশিন্নখ্রে। মহাক্না হায়খি, সরকার অসিনা শেন্মিৎলোন্দা খুমাং চাউশিন্ননবা খোংথাং কয়া লেপ্পা লৈতনা লৌখৎলি অমসুং পুম্নমক্না তঙাইফদবা চেকশিল থৌরাংশিং লৌখৎনবা অমসুং চৎন-কাংলোনশিং ইন্নবা খঙহল্লি।

তম্বা ঙমদবা হকশেলগী খুদোংথীবা অসিবু ঐখোয় অমত্তা ওইনা থেংনমিন্ননবা পুক্নিং চিংশিল্লদুনা, শ্রী নাইদুনা হায়খি মদুদি, ঐখোয়গী লৈবাক অসিগী মপাঙ্গল অসি ঐখোয়না স্পিরিচুএলিতী অমসুং সাইন্সতা থাজবা থম্বগী মখা পোল্লি।

মহাক্না ময়ামদা 'পেনিক' বত্তন নম্বীদনবা অমসুং 'প্রিবেন্সন' অমসুং 'প্রোতেক্সন' বত্তন্দা নম্বীনবা পাউতাক পীরি।

কোবিদ-১৯গী উপাইদি মাঙজৌননা চেকশিন থৌরাং লৌখৎপনি হায়না পল্লদুনা, উপ রাস্ত্রপতিনা ফেস মাস্ক, অথাপ্পা থম্বা অমসুং খুৎশা তোইনা হাম্বনচিংবগী অচম্বা খোংথাং খরা পল্লদুনা মখোয়সিনা অশোই অঙাম য়াওদনা লৈনবগী হৌজিক ফাওবদা ঐখোয়না খঙবা লম্বীনি হায়খি।

মসিগী খোংথাং অসিগা লোইননা, মহাক্না হকচাং কনখৎহনবা ঙম্বা য়েলহৌঙৈগী চীঞ্জাকশিং, হর্বল অমসুং হিদাক কান্নবা পাম্বীশিংনা শেম্বশিং শীজিন্নবীনবা ফোংদোকখি।

য়োগ অমসুং মেদিতেসনগী মরুওইবশিং পল্লদুনা, শ্রী নাইদুনা হায়খি, "ইশাগী য়ুমদা তৌজবা য়াবা য়োগ, প্রনয়ানা অমসুং চাং নাইনা হকচাং শাজেল তৌবনা ঐখোয়গী হিকচাং কনখৎহন্দুনা ভাইরস অসিবু লাপ্না থম্বা ঙমগনি।"

লাইচৎ অসিনা মীওই কয়াগী পুন্সিদা তম্বা ঙমদবা অমসুং অকি-অখঙ পোকহল্লিবা অসিগী মতাংদা পল্লদুনা, উপ রাস্ত্রপতিনা মীয়ামদা মিপাইদনবা পাউতাক পীরক্লি। "পুম্নমকসি ঐখোয়গী ৱাখলগী মখা পোল্লি...। ঐখোয়না ঐখোয়গী অৱাবসি করম্না হন্থহনগদগে হায়বা থিদোক্নবা অমসুং মসিনা ঐখোয়বু ঙম্না পুহল্লোইদবনি।" মাহক্না হায়খি।

মীয়ামদা ইমুং মনুং অমসুং মরুপ মপাংশিংগা পাউ ফাউনদুনা লৈনবা হায়রদুনা, মহাক্না ইখি মদুদি, তেক্নোলোজীনা ভর্চুএল ওইজরবসু অমত্তা ওইনা লৈমিন্নবগী ৱাখল অমসুং নক্ন্না লৈরি হায়না ফাউহনবা ঙমগনি।

মহাক্না মীয়ামদা অহাংবা লৈবা মতমদা মহৈ য়ালহনবা য়াবা থবক হায়বদি ঈশৈ-নোংমাই, খোরিরোল, থোং-থাকপা, অনৌবা লোল তম্বনচিংবদা লুপকদবনি। ঐখোয় খুদিংমক্না ঐখোয়বু নুংঙাইহনবা ঙম্বসি করিনো হায়বদু থিদোক্কদবনি অমসুং মদু তান্দুনা চৎকদবনি হায়না শ্রী নাইদুনা মখা তাখি।

লৈবাক মচাশিংদা পুক্নিং শোন্থহনবা অমসুং অকি-তুজুংনিংঙাই ওইবা সোসিএল মীদিয়া পোস্তশিংদা লুপ্তনবা ফোংদোক্লদুনা, উপ রাস্ত্রপতিনা মীয়ামদা থোক্লিবশিং অসি য়াজনবা অমসুং মখোয় মশাবু অমসুং ইমুং-মনুংবু অশোই অঙাম য়াওদনবা কন্না হোৎনজনবগী ৱাখল্লোন শাগৎনবা খঙহনখি। মহাক্না মখোয়দা য়ুম্ফম য়াওদবা, চুমই লাল্লি খঙদবা অমসুং মীয়ামদা অকিবা পোকহনবা য়াবা পাউশিং শন্দোক্তনবা খঙহল্লি।

কৃষ্ণনা অর্জুন্দা অসুম্না তাকখিবা পাউতাক 'নহাক্না তৌগদবা তঙাইফদবা থবক অদো তৌদুনা মখা চত্থৌ অমসুং মদুবু মচু তানা তৌ' হায়ববু নিংশিংলদুনা শ্রী নাইদুনা মীয়ামদা পুক্নিং ফাথনা অমসুং লোংলৈ অমত্তা চহী চুপ্পা তৌদুনা লৈরোই হায়বসি চেৎনা থাজদুনা লৈবীনবা পুক্নিং চিংশিল্লক্লি।

চপিরিচুএল গুরু শ্রী শ্রী রবিশঙ্করনা হায়বিখিবা ৱাহৈবু পল্লদুনা মহাক্না হায়খি মদুদি ঐখোয়গী অশেংবা পুন্সিগী খোংলোইদি ঐখোয়গী হকচাং অসিনি। মরম অসিনা ঐখোয়না ঐখোয়গী হকচাং অসিবু অচুবা চীঞ্জাক চাদুনা অমসুং শাজেল তৌদুনা শেংনা থম্বীগদবনি। মসি খক্তদা ঐখোয়গী হকচাংনা লাইনা কয়াগা লান্থেংনবদা মতেং পাংবা ঙমগনি হায়না মহাক্ন মখা তাখি।

উপ রাস্ত্রপতিনা মখা তানা হায়খিবদা 'অসিগুম্বা অথিংবসিবু অমসুং অথিংবনা য়োম্লবা পুন্সি মহিং অসিবু মতম কয়াম কুইনা চৎখিগদগে অমসুং ঐখোয়বু করম্বা মতমদা হান্নগী পুন্সিদা হঞ্জিল্লক্কদগে?' হায়বা ৱাহং অসিগী অরাইবা অমসুং চপ চাবা পাউখুম লৈতে। লাইচৎ অসিগী লোইগদবা মতম খঙদনা অমসুং মসিনা পীরিবা অৱাবসিগা লোইননা মতম খরদি হিংলবা য়াই।

অচৌবা শহরশিংদা কোরোনাগী কেস মশীং হেনগৎলক্লিবসি পল্লদুনা উপ রাস্ত্রপতিনা হান্না শোকখ্রবা কয়ানা লাইনা অসিদগী ঙমদুনা লাক্লি অমসুং নারবা মী মশীং খরখক্তনা হোস্পিতালাইজেসন মথৌ তাই হায়না অফবা মাইকৈ য়েংদুনা ফোংদোকখ্রে।

*****