মখাগী অসি জুন ২৩, ২০২০দা মাস্কোদা রক্সা মন্ত্রী শ্রী রাজনাথ সিংহনা প্রেসতা থোকখিবা ৱারোলনি

রুসিয়া অমসুং মালেম পুম্বগী খ্বাইদগী য়াইফরবা থৌরম অমা ওইরিবা ভিক্তরী দে পরেদকী ৭৫শুবা কুমোন য়াওনবা রুসিয়াগী ঙাকশেল মন্ত্রালয়না বর্তন তৌরকপগী ঐহাক মাস্কোদা লৈরি। মালেমগী অনিশুবা লাঞ্জাওদা মাইপাক্নবা হোৎনবদা থৱায় থাখ্রবা য়ামখ্রবা রুসিয়া মচাশিংবু নিংশিংবা ওইনা অমসুং ইকাইখুম্নবা উৎখি। লাঞ্জাও অসিদা ভারত লান্মী মিলিয়ন কয়া শরুক য়াদুনা লান শোক্নখি অমসুং মশিং য়াম্না অশোক অপন নঙখি। মখোয়শিংগী অয়াম্বা সোভিৎ লান্মীগী মতেং পাঙবা ওইনা লান অসি শোক্নখি। মরম অসিনা ইন্দিয়ন মিলিতরী কন্তিঞ্জেন্ত অমনা রেদ সক্ব্যরদা হয়েং মার্চ তৌবা য়াওগদৌরিবা অসি য়াম্না লাইবক ফবা অমনি। মসিনা লৈবাক অনিগী আর্ম ফোর্সশিংগী মরক্তা মতম কুইনা মরূপ ওইবগী খুদম অমনি।

ঐহাক্না মাস্কোদা চৎপা অসি কোবিদ লায়চৎকী মতুংদা ওফিসিএল দেলিগেসন অমা ওইনা ভারত্তগী মপাল লৈবাক্তা অহানবা ওইনা চৎপা ওইরি। মসি ঐখোয়গী মরক্তা লৈরিবা মরূপ মপাং ওইবগী মরীগী অখন্নবা খুদম অমনি। লায়চৎ অসিগী অৱাবা কয়াগী মরক্তা লৈবাক অনিগী মরক্তা লৈরিবা মরীশিং অসি তোঙান তোঙানবা হীরমশিংদা লেংদনা লৈরি। চহি অসিদা প্রধান মন্ত্রী নারেন্দ্রা মোদীনা বর্তন তৌদুনা রসিয়ন ফেদেরেসনগী হিজ এক্সিলেন্সী প্রসিদেন্ত ব্লাদিমির পুতিন কৌগদৌরিবা অসিবু ঐখোয়না খৌরাংনা ঙাইরি।

ভারত-রুসিয়াগী মরী অসি অখন্নবা অমসুং অফবা কান্নবা পীরিবা পার্তনর্শিপ অমনি। ঐখোয়গী ঙাকশেলগী মরী অসিনা খ্বাইদগী মরু ওইবা য়ুম্বী অমা ওইরি। ঙাকশেকলগী ওইবা মরী অসিগী মতাংদা ঐহাক্বা উপ প্রধান মন্ত্রী য়ুরী বরিসফকা লোয়ননা খন্নবগী খুদোংচাবা অমা ফংখি অমসুং লায়চৎ অসিগী অথিংবশিং লৈরবসু মহাক্না হোতেল অসিদা লাক্তুনা ঐহাকপু উনবগীদমক থাগৎপা ফোঙদোকচরি। খন্ন-নৈনবা অসি অফবা অমসুং কান্নবা ওইখি। হৌজিক চৎথরিবা কন্ত্রেক্তশিং লৈখিগনি অমসুং লৈবতা নত্তনা কেস খরদি অথুবা মতমদা পাইখৎপা হৌরগনি হায়না ঐহাকপু থাজবা পীরকখি। ঐখোয়গী প্রপোজেল পুম্নমক্কী ওইনা রুসিয়াগী মাইকৈদগী অফবা কান্নগদবা পাউখুম ফঙখি। ঐহাক খন্না নৈনবা অসি অদুক্কী মতিক অপেনবা পোকখি। ঙসি অয়ুক অঙনবদা ঙাকশেল মন্ত্রী অজে কুমারগা মহাক্কা মান্নবা ফম পাইরিবা উপ ঙকশেল মন্ত্রী ফোমিনগা লোয়ননা খন্ন-নৈনখি। ভারত অমসুং রুসিয়াগী য়েলহৌঙৈদগী হৌনা লৈরক্লবা মরূপ ওইবগী মরী অসি লেংদনা লৈরি হায়না ঐহাক্না থাজবগা লোয়ননা হায়রি। ঐখোয়গী মরক্তা লৈরিবা ৱাখল্লোন অসি মান্নৈ অমসুং লৈরিবা মরী অসিনা তুংলমচৎতা কান্নবা পুরক্কনি।

হয়েংগী ৭৫শুবা ভাক্তরী পরেদ অসি শরুক য়ানবা খৌরাংনা ঙাইরি। ঐখোয়গী অপুনবা ঙাকশেলগী ওইবদা মথৌ তৌরিবা মরু ওইনা শীনফম অসিদা লৈরিবা মীওইশিং অমদি রুসিয়াগী মীয়াম পুম্নমকপু ঐহাক্না য়াইফ পাউজেল পীজরি।

*****