সাইন্স অমসুং তেক্নোলোজী বিভাগকী নেস্নেল কাউন্সিল ফোর সাইন্স এন তেক্নোলোজী কম্মুনিকেসননা ভিগ্যান প্রাসরগা খুৎশম্নরগা বিভাগ অসিগী কেমপস্তা জুনগী তাং ২১ নোংমাইজিং নুমিৎতা নুংশা মঙাল ফিল্তর তৌবা ঙম্বা অনোপশিং শিজিন্নদুনা সোলর ইক্লিপ্স অদু তশেং তশেংবা শক্তমদা য়েংখ্রে৷ অঙাংশিং, নুপীশিং, সাইন্তিসশিং অমসুং অতোপ্পা ওফিসিয়েলশিং অমদি স্তাপ মেম্বরশিংনা পেন্নিংঙাই ওইরবা অতিয়াগী থৌদোক অদু য়েংখ্রে অমসুং ইক্লিপ্স অদুবু থোকহল্লিবা মঙাল অমসুং মমিগী ফেনোমেনন অদু উবা ফংবগী নুংঙাইবা অদু ফাওরম্মী৷ এন.সি.এস.তি.সি., অমসুং ভিগ্যান প্রাসরনা মাংজৌননা পুথোকখ্রবা মেতেল্লিক মাইলর ফিলম্না অকক্ননা শেমখ্রবা গুগলশিং অদু য়েংলিবা মীওই খুদিংমক্তা পীরম্মী৷ ইক্লিপ্স অদুগী ফেনোমেনন অদু য়েংলিবা মীওইশিংদা পোপুলর ফোমদা ৱারি লিরম্মী অমসুং মাইলর ফিলম শিজিন্নদুনা ইক্লিপ্সনা কুপশিল্লবা নুমিৎ অদুগী ফোতোগ্রাপশিং অদু মীয়াংদা য়েংহনখ্রে৷

দিল্লীদা ঙসিগী সোলর ইক্লিপ্স অদু অয়ুক্কী পুং ১০:১৯:৫৮দা উবা ফংখি অমসুং নুংথিলগী পুং ০১:৪৮:৪০ ফাওবা উবা ফংখি৷ নুমিৎকী অকোইবা অদু খ্বাইদগী য়াম্না খুমজিনখিবা অদু নুমিৎয়ুংবগী পুং ১২:০১:৪০দা ওইখি৷ নোং য়াম্না মংদবা নোংশা য়াম্না শাবা নুমিৎ অমা ওইখিবনা দিল্লীনা পার্সিয়েল ইক্লিপ্স অদুগী অপুনবা সিক্বেন্স অদু উবা ফংখ্রে৷ রিঙ্গ ওফ ফাইয়র হায়না খঙনরিবা এনুয়েল রিঙ্গ অদু রাজস্থান, হরিয়ানা, উত্তরখান্দ অমসুং লৈবাক অসিগী অৱাং থংবা মফম খরদগী উবা ফংখি অমসুং ইক্লিপ্স অদুগী বেল্ততা লৈবা শরুক খরদি ইক্লিপ্স অদু খরদমক উবা ফংখি৷ অৱাং থংবা হেমিস্ফিয়রদা চহি অসিগী খ্বাইদগী শাংবা নুংথিলগী মতম জুন ২১গা তান চরুদুনা তামিন্নখ্রে অমসুং অতিয়াগী ওইবা থৌদোক অদু ইরাই লাইনা ময়েক শেংনা উবা ফংখি৷ মসিগী তাংনা থোকপা সোলর ইক্লিপ্স মখল অসিগা কালেনগী অহানবা নুমিৎ সম্মর সোল্তাইসকা তামিন্নখ্রে ৷ ইক্লিপ্স অমা সোলর ইক্লিপ্স নত্ত্রগা লুনর ইক্লিপ্স অসিনা সাইন্তিসশিংনা তোঙান তোঙানবা সাইন্তিফিক এক্সপিরিমেন্ত অমসুং স্তদীশিং তৌবা মতমদা খুদোংচাবা অমা পীগদৌরি৷ সাইন্স কম্মুনিকেতরশিংগী ওইনদি স্পেক্তেকুলর সেলেসিয়েল শো অসিগী মরুমদা লৈরিবা মীওইশিং অসিদা সাইন্সকী মরমদা খঙহন্নবগী খুদোংচাবা অমা পীরে অসিদসু নত্তনা ইক্লিপ্স অসিগা মরী লৈননা তোঙান তোঙানবা মওংদা লান্না থাজনবা অদু লৌথোক্নবা অমসুং সাইন্তিফিক তেম্পর প্রোমোত তৌনবগী খুদোংচাবা অমা ওইনা পীরে

১৯৮০গী ফেব্রুৱারীগী তাং ১৬তা থোকখিবা তোতেল সোলর ইক্লিপ্স অদু মী অমনা নিংশিংবা মতমদা মতম অদুদা থোকখিবা ফিভম অদুদি ঙসিগী ফিভম অসিদগী অশুক্কী মতিক খেন্নরে৷ ইক্লিপ্স অদুগী ফত্তবা ফল ফংগনি কিবদগী মখোয় লোইনমক মশা ঙাকথোকচনবা মী অয়াম্বনা মখোয় মখোয়গী য়ুমদগী মপান থোক্নরমদে৷ ফজনা খঙদ্রিবা য়ান-মেন তাদবা অসিদগী কিবনা সাইন্সপু থৱাই য়াওজবা মীওই খরা নত্তনা মী অয়াম্বা মপান থোক্নরমদে, লম্বী পুম্নমক ইতাক তাকলম্মী, মহৈলোইশঙশিং, কৈথেলশিং অমসুং অতোপ্পা ইস্তাব্লিস্মেন্ত ময়াম অমা থোং লোন্নরম্মী৷ মতুং তারকপদা ১৯৯৫কী ওক্তোবরগী তাং ২৪দা অতোপ্পা সোলর ইক্লিপ্স অমগসু ভারত্তা উবা ফংলম্মী অমসুং এন.সি.এস.তি.সি.না লৈবাক শিনবা থুংনা অঙাংশিং, ওজাশিং, সাইন্স কম্মুনিকেসন ওর্গনাইজেসনশিং, সাইন্তিসশিং অমসুং মীয়ামশিংদা মাইলর ফিলম গুগলশিং শিজিন্নদুনা ইক্লিপ্স অদু নিংথীজনা য়েংবা ফংহন্নবা এৱার্নেস প্রোগ্রামশিং অমা পাংথোক্নবা হোৎনরম্মী৷

অসিগুম্না য়াম্না কন্না হোৎনবদগী ফিভম অসি হোংবা হৌখ্রে অমসুং মতুং তারকপদা থোকলকপা তোতেল সোলর ইক্লিপশিংদা মীয়াংগী ৱাখল্লোনদা অচৌবা অহোংবা অমা লাকখ্রে৷ হন্দক্কী মতাং অসিদদি মীয়ামশিংনা মপান থোকলক্তুনা সোলর ইক্লিপ্স অসি তশেং তশেংবা মীৎনা য়েংবগী নুংঙাইবা অদু ফংনখ্রে অদুম ওইনমক সোসিয়েল দিস্তেনশিং অমসুং চেকশিন থৌরাংশিংদি চেকশিন্না ইল্লম্মী৷ দি.এস.তি.গী তোঙান তোঙানবা ওতোনোমস ইন্সতিত্যুসনশিং খুদম ওইনা নাইনিতালগী আর্য়ভত্তা রিসর্স ইন্সতিত্যুত ওফ ওবজর্বেস্নেল সাইন্সেস (এরিস), বেঙ্গলোরগী ইন্দিয়ন ইন্সতিত্যুত ওফ এস্ত্রোফিজিক্স(আই.আই.এ.) অমসুং ভিগ্যান প্রাসরনা তোঙান তোঙানবা মফমশিংদগী ইক্লিপ্স অদু ফোতো কাপখি অমসুং জুম, য়ুত্যুব অমসুং ফেসবুক্তা তশেং তশেংবা শক্তম অদু থাদোকখি৷

*****