কেন্দ্রগী শেনথুম অমদি কোর্পোরেত এফ্যার্স মন্ত্রী শ্রীমতি নিরমলা সিতরমন্না ঙসি ভিদও কন্ফরেন্সিংগী খুত্থাঙদা পি. ঐচ. দি. চেমবর ওফ কম্মর্স এন্দ ইন্দস্ত্রীগী মেনেজিং কম্মিতী মেম্বরশিংগা ৱারী ৱাতায় শান্নবদা লৈঙাক অসিনা ৱেল্থ ক্রিএতরশিংনা থবক পীবগী খুদোংচাবা পুথোকপা অমদি মচাক মথুমশিং মতিং লৈনা শীজিন্নদুনা লৈবাকসিগী খুন্নাইলোন-শেন্মিৎলোনবু য়োকখৎলিবা অসিগীদমক মখোয়গী মরুওইববু শকখঙদুনা লাক্লি‍।

প্রধান মন্ত্রীনা মতম পুম্নমক্তাএম. এস. এম. ই.শিংবু শকখঙবা অমদি মখোয়দা তেংবাংগী খুৎ লান্থোকপবুসু শেনথুম মন্ত্রীনা একনোলেজ তৌখি‍। লৈঙাক্না লাউথোক্লিবা রিলিফকী থৌরাংশিং গ্রাউন্দ লেভেলদা নীংথিনা য়ৌহন্নবা মরূওইনা রেপো রেত হন্থরিবসিনা শেন্দোয়গী চাং হন্থহন্দুনা কঞ্জুমরশিংদা য়ৌহন্নবগীদমক ঐখোয়না ফীভম অসিবু কুপ্না য়েংশিল্লি হায়না শ্রীমতি সিতরমন্না হায়খি‍।

শেনথুমগী মন্ত্রীনা হায়খিবদা ত্রেদ এন্দ ইন্দস্ত্রীদা কোবিদ-১৯ লাইচৎনা পীরিবা তুজুংনিংঙাই ওইরবা শাফু অসি হন্থহন্নগীদমক লল্লোন ইতিক তৌবশিংদা লুপা লাখ করোর ৩গী কোলেতরেল ফ্রী ওতোমেতিক লোন পীবগী থৌওংদা ওইরক্লিবা ফীভমশিং মখোয়না কুপ্না য়েংশিল্লি‍।

লৈঙাক অসিনা ইন্দস্ত্রীশিংনা থেংনরিবা খুদোংচাদবশিং কোকহন্নবা অমদি লল্লোন ইতিক নুংঙাইনা তৌবা য়ানবগীদমক মিনিমম গভর্নমেন্ত অমদি মেক্সিমম গভর্নেন্স হায়বসিদা অহেনবা মীৎয়েং থম্লি হায়না শেনথুমগী মন্ত্রীনা ফোঙদোকখি‍।

ইন্দস্ত্রী স্তেকহোল্দরশিংদা মরূওইনা এম. এস. এম. ই.শিংদা খেন্নবা থমদনা লৈঙাকসিনা মতম পুম্নমক্তা তেংবাংগী খুৎ লান্থোক্তুনা লাক্লি‍।

লৈঙাক্না লাউথোক্লিবা মশক থোকপা অহোংবশিংদুবু থাগৎলদুনা পি. ঐচ. দি. চেম্বর ওফ কম্মর্স এন্দ ইন্দস্ত্রীগী প্রেসিদেন্ত দা: দি. কে. অগ্গর্ৱালনা মহাক্কী তরাম্না ওকপগী ৱারোলদা লুপা লাখ করোর ২০.৯৭গী স্তিমুলস পেকেজ অসি মখল শুবা, মশক থোকপা অমদি মালেমগী অতৈ লৈবাকশিংনা পীরিবা পেকেজশিংদগী খ্বাইদগী হেন্না চাউবা অমা ওইরি হায়না ফোঙদোকখি‍।

পেকেজ অসি শেনগী অমদি শেনথুমগী স্তিমুলস ওইবতা নত্তনা ভারতপু হেন্না চাউখৎপা থাক্তা পুখৎনবা মথৌ তাবা অহোংবা পুরকপা য়াওরি হায়না দা: দি. কে . অগ্গর্ৱালনা হায়খি‍।

তুরিজম, এভিএসন, এন্তরতেন্তমেন্ত, রিএল এস্তেত, ওতোমোবাইল য়াওনা শাথিনা শোকহল্লবা সেক্তরশিংগী ক্লাসিফিকেসনদা অপনবা পীদনা ৱান-তাইম ওইনা লোনগী মশক মওং হোংদোকপা অসি তাঞ্জাসিদা তঙাইমক ফদ্রবা অমনি হায়বা ৱাফম মহাক্না থমখি‍।

বেঙ্ক ওফিসিএলশিংনা ত্রেদ এন্দ ইন্দস্ত্রীশিংদা অকিবা লৈতনা লোন পীথোকবা ঙম্নবগীদমক লৈঙাক্কী মায়কৈদগী বেঙ্কিং সেক্তরদা মখোয়গী অকিবা কোকহন্নবগীদমক ফোর্মেল ওইনা ঈ-পাউ ফাওদোকপীবসু মথৌ তাগনি হায়বা ৱাফমসু দা: অগ্গর্ৱালনা থমখি‍।

মতিক চাবা মরমগীদমক করিগুম্বা বিজিনেস এন্তিতী অমনা এন. পি. এ. তাখ্রবদি মদুদা ক্রিমিনেল প্রোসিদিং লৈহন্দনবা খোঙথাংসু লৌখৎপিবা মথৌ তাই হায়নসু দা: অগ্গর্ৱালনা মখা তাখি‍।

ভারতবু মীয়াম্না পাম্নবা শেন থাদবগী পন্থুংফম অমা ওইহন্নবগীদমক লৈঙাক্কী স্পেন্দিং হেনগৎহন্দুনা খুদক্কী ওইনা দিমান্দ হেনগৎহনবা অমদি অথুবা মতমদা শিন্মীগী, আইনগী অমদি লম শীজিন্নবগী মতাংদা অহোংবা পুরক্তুনা লমদমসিগী ইন্দস্ত্রীশিংগী মরক্তা অথোয় অহেন তান্নবা হেনগৎহনবা মথৌ তাই হায়নসু দা: অগ্গর্ৱালনা মখা তানা ফোঙদোকখি‍।

পি. ঐচ. দি. চেম্বরনা থাজৈ মদুদি শেনথুম মন্ত্রীগী ইচঙ থৌরবা লুচিং মখাদা ভারতনা কোবিদ-১৯গী লান্থেংদা শোয়দনা মায় পাক্কনি‍। অসিগুম্বা শাথিনা খুদোংথিনিংঙাই ওইরবা তাঞ্জাসিদা পি. ঐচ. দি. চেম্বরনা লৈঙাকসিদা অমদি লৈবাকসিগী মীয়ামদা মপুং ফানা ঙাক্লৌ পীগনি হায়না দা: দি. কে. অগ্গর্ৱালনা ফোঙদোকখি‍।

পি. ঐচ. দি. সি. সি. আই.না নুংনাংলিবা ৱাফমশিংবু চীং লেম্না কোকহল্লদুনা শেনথুম মন্ত্রীনা শেন্মিৎলোন, ত্রেদ অমদি ইন্দস্ত্রীগী তোঙান তোঙানবা মায়ওনদা পি. ঐচ. দি. চেম্বরনা পীরিবা সজেসনশিংবুসু লৌশিনখি‍। থৌরমদুদা শরুক য়াখিবা অতৈ মশক নাইবা মীওইশিংদি ভারত লৈঙাক্কী শেনথুম মন্ত্রালয়গী রিভিন্যু দিপার্তমেন্তকী সেক্রতরী (ফাইনান্স) শ্রী অজয় ভুশন পান্দে; ভারত লৈঙাক্কী শেনথুম মন্ত্রালয়গী ফাইনান্সিএল সর্ভিসেসকী সেক্রেতরী শ্রী দেবসিস পান্দা; ভারত লৈঙাক্কী মোর্পোরেত এফ্যার্স মন্ত্রালয়গী সেক্রেতরী শ্রী রাজেশ ভর্মা; ভারত লৈঙাক্কী শেনথুম মন্ত্রালয়গী ইকনমিক এফ্যার্স দিপার্তমেন্তকী চীফ ইকনমিক এদভাইজর দা: কৃষ্ণমুর্তী সুব্রমনিয়ম; পি. ঐচ. দি. চেম্বরগী সেনিয়র ভাই-প্রেসিদেন্ত শ্রী সঞ্জয় অগ্গর্ৱাল; পি . ঐচ. দি. চেম্বরগী ভাইস-প্রেসিদেন্ত শ্রী প্রদীপ মুল্তানি; পি . ঐচ. দি. চেম্বরগী সেক্রেতরী জেনেরেল শ্রী সৌরব সনয়াল; অমদি পি. ঐচ. দি. চেম্বরগী হান্নগী প্রেসিদেন্তশিং অমসুং মেনেজিং কম্মিতী মেম্বরশিংনি‍।

****************