আয়ুশ মন্ত্রালয়না প্রসার ভারতিগা খুৎশম্নদুনা জুন ১১, ২০২০দগী হৌদুনা নুংতিগী ওইনা দি.দি. ভারতিদা কমন যোগ প্রোতোকোল শন্দোক্নবা শেম শারি। সি.ৱাই.পি. সেসনশিং অসি নুংতিগী অয়ুক পুং ৮দগী ৮.৩০ ফাওবা শন্দোক্কনি। সেসন অসি মথং মথং ওইনা মন্ত্রালয়গী সোসিএল মীদিয়া হেন্দলশিংদসু য়েংবা য়াগনি। পুংখায় অমগী সেসন অসিদা কমন যোগ প্রোতোকোলগী মরু ওইবা কাংলোনশিং তাক্কনি।

শন্দোক্লিবা অসিনা কমন যোগ প্রোতোকোলবু ওদিও-ভিজুয়েলগী খুত্থাংদা লাপ্না তাক্তুনা মীয়ামদা খংহন্নবগী পান্দম থম্লি। কমন যোগ প্রোতোকোলশিং মাংজৌননা খংবা অসিনা মীয়াম্না আই.দি.ৱাই. ২০২০দা শরুক য়ানবগীদমক শেম শাদুনা লৈবা ঙমহনগনি।

মসিগী তেলিবিজন্দা শন্দোক্লিবা সি.ৱাই.পি. সেসন অসি মীয়াম্না যোগগী তোঙান তোঙানবা মওং কয়াবু তমদুনা যোগ তৌবগী কান্নবা লৌনবা শিজিন্নবসু য়াই।

চহি খুদিংগী জুন ২১ অসি মালেম শিনবা থুংনা মালেমগী যোগ নুমিৎ (আই.দি.ৱাই.) হায়না পালন তৌই। হন্দক্কী চহিগী ওইনদি আই.দি.ৱাই. অসি হকশেলগী খুদোংচাদবা মরক্তা য়ৌরক্লে। তাঞ্জা অসিদদি যোগ অসি তান য়াম্না চান্নৈ মরমদি যোগ তৌবনা হকচাং অমসুং ৱাখল নুংঙাইহল্লি। হৌজিক ওইরিবা লুরবা তাঞ্জা অসিদা যোগদগী কান্নবা ফংলে খংলবা মরু ওইবা ৱাফম অনি মখাদা পীরিঃ

ক) মীয়ামগী হেলথ অমসুং ইম্ম্যুনিতী হেনগৎহনবদা পীবা কান্নবশিং

খ) মসি মালেম পুম্বনা স্ত্রেস বুস্তর হায়না লৌনরবনি

মমাংগী চহিশিংদা আই.দি.ৱাই. অসি ভারতকী নাৎ অমসুং চৎনবীগী পালন তৌবনি হায়না লৌনৈ। হন্দক্কী চহিদদি, হৌজিক্কী ওইরিবা লুরবা তাঞ্জাসিদা, মসিবু ৱাখল অমসুং হকচাংগী শান্তি থীনবা পাম্বৈনি হায়না লৌনরি। মরম অদুনা হন্দক্কী চহিগী ওইনা মিৎয়েং পীরিবসি যোগগী নুমিৎ, জুন ২১, ২০২০, অসিদা য়ুমদা যোগ তৌবনি। আয়ুশ মন্ত্রালয়না মখোয়গী লৈজবা ইলেক্ত্রোনিক, দিজিতেল অমসুং অতোপ্পা মীদিয়াশিং শিজিন্নদুনা মীয়াম্না যোগ তম্নবা কন্না হোৎনরি। মন্ত্রালয় অসিনা মখোয়গী যোগ পোর্তেল অমসুং সোসিএল মীদিয়া হেন্দলদা ওনলাইনগী তোঙান তোঙানবা থৌওং কয়া ফংহল্লি। মমাংগী চহিগুম্না মীয়াম পুন্না যোগ তৌমিন্নবগী থবক অদুসু জুন ২১, ২০২০গী অয়ুক্কী পুং ৭তা পাংথোক্কনি। তৌবতবু হন্দক্তি মীয়াম্না মখোয় মখোয়গী য়ুমদগী ওইনা শরুক য়ারক্কনি। মীয়াম পুন্না পাংথোকমিন্নবগী ইথিল অদুনা হন্দক্তি থৱাই য়াওবা মীওইশিংনা য়ু ত্যুব, ফেসবুক, ত্বীত্তর অমসুং ইন্সতাগ্রামদগী মখোয়গী যোগ হৈবা (মমাংগী চহিগুম্না কমন যোগ প্রোতোকোলদা য়ুম্ফম ওইবা) অদু উৎনরগনি।

কমন যোগ প্রোতোকোল (সি.ৱাই.পি.) অসি হৌবদগী হৌনা আই.দি.ৱাই.গী থমোয় ওইদুনা লাক্লি। সি.ৱাই.পি. অসি মকোক থোংবা যোগগী গুরুশিং অমসুং অখং-অহৈশিংনা শেম্লম্বনি অমসুং মসিদা মীয়ামগী হকচাংগী, ৱাখলগী, পুক্নিংগী অমসুং থৱাইগী ফরবা অমসুং শাফরবা থৌওং কয়া অমা য়াওই। অসি মালেমদা খ্বাইদগী মমিং চৎপা যোগগী কাংলোন অমা ওইবতা নত্তনা চহি খুদিংগী মালেমগী যোগ নুমিত্তা মীয়াম্না পাংথোক্নৈ। মসি চহি অমসুং নুপা নুপী খায়দনা মীয়াম পুম্বনা পাংথোকপা য়ানবা শেম শারবনি অমসুং ইচম চম্বা ত্রেনিং সেসন অমসুং ওনলাইন ক্লাস্তা তম্বা য়াই (হকশেলগী খুদোংচাদবা লৈবা মীওইশিংদি যোগ তৌদ্রিঙৈগী মমাংদা মখোয়গী দাক্তর তান্নগদবনি)।

*****