পি.এস.য়ু. অমা ওইরিবা ওইল ইন্দিয়া লিমিতেদ (ও.আই.এল.)না অসমগী তিন্সুকিয়া জিলাগী বাঘজান ওইলফিল্দগী মখাদা লৈবা গ্যাস প্রদ্যুসিং গুহা বাঘজান-৫দা ৱর্কওবরগী থবক চত্থরিঙৈদা মে ২৭, ২০২০দা গুহা অদু খংহৌদনা এক্তিব ওইরকপদগী গ্যাস পাথোকখি। মসিনা গুহা অদুদগী লাকশিনবা ঙমদবা গ্যাস থোকখি। ও.আই.এল. ইন্দিয়ানা ও.এন.জি.সি.দগী মতেং নিবদা খুদক্তা ক্রাইসিস মেনেজমেন্ত তীম (সি.এম.তি.) থারক্তুনা তেংবাংলকখি। ও.আই.এল.না সিঙ্গাপোরদা য়ুম্ফম ওইবা ফর্ম এম./এস. এলর্ত দিজাজতর কন্ত্রোলসু থবক ওইনা শিজিন্নখি।

গুহা অদু অখং-অহৈশিংনা তাকপগী মতুং ইন্না চেকশিন থৌরাং কয়া লৌদুনা খুমজিন্নবা শেম শাদুনা লৈরবনি। গুহাগী সাইৎ অদু শেংদোকপগী থবক চত্থরিঙৈদা জুন ৯, ২০২০গী নুমিৎ য়ুংবা মতমদা গুহাদু মৈ হৌরকখি অমসুং গুহাগী অকোয়বা মীতর ২০০দা মৈ শন্দোকরকখি। মৈ অদু মতৌ করম্না হৌরকপগে হায়বদু হৌজিক ফাওবা খংদ্রি।

পেত্রোলিয়ম অমসুং নেচরেল গ্যাসকী কেন্দ্রগী মন্ত্রীনা অসমগী মুখ্য মন্ত্রীগা লোয়ননা ওইল ইন্দিয়া, ও.এন.জি.সি., মালেমগী অখং অহৈশিং অমসুং এম.ও.পি.এন.জি.গী ওফিসিএলশিংগা ভিদিও কনফরেন্সিংগী খুত্থাংদা হঙ্গৎনা য়েংমিন্নখি। অসমগী মুখ্য মন্ত্রীনা মসিনা মীয়ামদা খুদোংথিবা থোক্লোই হায়বগী থাজবা পীফম থোকই হায়খি। শ্রী ধরমেন্দ্র প্রধান্না এম.ও.পি.এন.জি. অমসুং ও.আই.এল.গী মাইকৈদগী পাংফম থোকপা মতেং পাংগনি হায়বগী থাজবা পীখি। থৌদোক অসিনা শোকহল্লবা মীওইশিংদা রাজ্য সরকারগা য়ান্নবগী মতুং ইন্না খেতি পুরোন মতিক চানা পীগনি।

পেত্রোলিয়ম অমসুং নেচেরেল গ্যাসকী মন্ত্রী শ্রী প্রধান্না ভিদিও কনফরেন্সিংগী খুত্থাংদা মফম অদুদা লৈরিবা ইরাং লাকশিন্নবা কাংবু, ওইল ইনিদয়া লিমিতেদ অমসুং মন্ত্রালয়গী ওফিসিএলশিংগা য়েংশিনবগী ৱারী শনখি। গুহাগী মমায় ওইবা মফম নত্তনা অতৈ মফমদদি মৈ মুথৎখ্রে হায়না পাউদমলকখি। তৌবতবু গুহা অদু খুমজিন্দ্রিঙৈদি মমায়দা চাক্লিবা মৈ অদু মুৎখিরোই।

গুহাগী মীতর ২০০গী অকোয়বদা লৈবা য়ুম ১৫ মৈনা পুমচাক চাকখি অমসুং অতোপ্পা য়ুম ১০-১৫সু মৈনা খরা ৱাইখি। ওইল ইন্দিয়া লিমিতেদকী মৈ চাকপা থেংনবগী থৌমী অনি লৈখিদ্রে হায়না পাউদমলকই। অহানবদা লাকখিবা পাউগী মতুং ইন্না মৈ থেংননবা থৌমী অহুম, ওইল ইন্দিয়াদগী অনি অমসুং ও.এন.জি.সি.গী মীওই অমা, মনাক নকপা পুখ্রিদা চোংথখি। ও.এন.জি.সি.গী মীওই অদু অশোক অপন নংখি অদুবু ওইল ইন্দিয়াগী মীওই অনিদুদি মশা কঞ্জবা ঙমখিদ্রে। মখোয়গী হকচাংশিং অদু ফংবা ঙমখ্রে।

গুহাগী অকোয়বদা লৈরিবা মৈনা চাকখ্রবা রিগ, ফায়র ইঞ্জিন অমসুং অতোপ্পা পোৎশিংগী লেমহৌবশিং অদু গুহা মখুম খুমজিনবগী থবক হৌদ্রিঙৈদা লৌথোক্কনি। থবক অসি হৌদ্রিঙৈগী মমাংদা ঈশিং লেপ্তনা পীনবগী পথাপ অমা শেমগনি অমসুং মসিগী শেম-শাবদা নুমিৎ ৫-৬নি চংগনি অমসুং মৈ মুথৎপগী থবক অসিদা চাউরাক্না চয়োল ৪ চংগনি।

থৌদোকসিনা শোকহল্লবা মফমগী অকোয়বদা লৈবা ইমুং ৬০০মুক মফমসিদ্গী পুথোকখ্রে অমসুং মনাক নকপা তেক্ত কায়দবা মফমদা কেম্প তৌদুনা থমখ্রে। শোকহল্লবা ইমুং খুদিংদা খুদক্কী তেংবাং ওইনা লুপা ৩০,০০০ পীনবা ৱারেপ লৌখ্রে।

গুহা অসি দিব্রু-সাইখোৱা নেস্নেল পার্ক অমসুং ৱেৎলেন্দ অমা ওইরিবা মাগুরি মোতাপুং বীলগী মনাক্তা লৈবনি। ওইলনা শক-খংলবা এজেন্সী অমা দিব্রু-সাইখোৱা নেস্নেল পার্ক অমসুং মাগুরি মোতাপুং বীলগী অকোয়বদা থৌদোক অসিনা শোকহনবগী মতাংদা য়েংশিন্নবা শিনখ্রে।

মন্ত্রীনা থৌদোক অসিগী মতাংদা তত্তনা মীকুপ নাহুং শিংনা য়েংশিল্লি।

*****