লৈদা কেন্সর নাহনবদা মতেং পাংবা ‘এম.আই.আর-১৫৫’ কৌবা অকক্নবা মাইক্রো আর.এন.এ. অমা আই.আই.তি. মাদ্রাস, কেন্সর ইন্সতিতুৎ, শ্রী বালাজি দেন্তেল কোলেজ অমসুং হোস্পিতাল অমসুং ইন্দিয়ান ইন্সতিতুৎ ওফ সাইন্স, বেঙ্গালুরুগী রিছর্স তৌবা কাংবু অমনা মশক খঙলে। মখোয় কেন্সর নাহনবা য়াওনা মখল কয়াগী বাইওলোজীকেল অমসুং পেথোলোজীকেলগী থবকশিংদা শরুক য়াবা নন-কোদিং আর এন এশিংনি। লৈগী কেন্সর লায়েংনবা ‘এম.আই.আর-১৫৫’ শেমদোকপা য়াবগী খুদোংচাবা লৈবা মরম্না থিজিনবা অসিদগী ফংলিবা অসি য়াম্না মরুওইবা অমনি।

এম.আই.আর.এন.এ.গী মরুওইবা মথৌদি অতোপ্পা জিনশিং তুমিন্না লৈহনবনি। করিগুম্বা ওনকোজিনশিং তুমিন্না লৈহল্লবদি কেন্সর নমথবা ঙমগনি। করিগুম্বা, মখোয়না ত্যুমর সপ্রেসর জিনশিং নমশিল্লবদি কেন্সর হেনগৎলক্কনি। মরম অদুনা মখোয়না পাংথোকলিবা থবক অদুগী মতুংইন্না, এম.আই.আর.এন.এ.না ওনকোজিন নৎত্রগা ত্যুমর সপ্রেসর জিনশিং ওইনা থবক তৌগনি। মসিদা ওইথোকপা য়াবা লায়েংনবগী থৌরাং অনি খক লৈরি। করিগুম্বা এম.আই.আর.এন.এ.না ওনকোজিন ওইনা থবক তৌরবদি, অতোপ্পা অমনা ইনহিবিত ওইবা পাম্মি,মসি এম.আই.আর.এন.এ. ইনহিবিসন থেরাপী হায়না খঙনৈ। করিগুম্বা এম.আই.আর.এন.এ.না ত্যুমর সপ্রেসর জিনশিং ওইনা থবক তৌরবদি, ত্যুমর অদু নমশিনবা ঙমগনি, অসিগুম্বা থেরাপী অসি এম.আই.আর.এন.এ. রিপ্লেসমেন্ত থেরাপী হায়না খঙনৈ হায়না আই.আই.তি. মাদ্রাসকী বাইওতেক্নোলোজী দিপার্তমেন্তগী লুচিংবা প্রোফেসার কারুনাগারন্না হায়খি। এম.আই.আর.এন.এ. শেমদোকপগী থবক অসি মহৌশাগী কেন্সর লায়েংবগী থবকশিং হায়বদি কেমোথেরাপী, রেদিওথেরাপী অমসুং ইমুনোথেরাপীগা পুনশিন্দুনা লাক্লি অমসুং অপুনবা কাংবু অসিনা থিজিনবদগী ফংলকপা অসিনা কেন্সর লায়েংবদা মতেং পাংলগনি।

থিজিনবা অসিগী মতাংদা প্রোফেসার কারুনাগারন্না হায়খি লৈগী কেন্সরদা এম.আই.আর.এন.এ. অসি ওনকোজিন অমা ওইনা খঙনদুনা লাক্লি অমসুং মসিনা কেন্সর নাবা হৌহনবা, মালিগনেন্ত ওন্থোকপা অমসুং মেতাসিস ওইহনবদা মরুওইবা থৌদাং লৌরি। কেন্সরগা মরী লৈনবা এম.আই.আর.এন.এ. অদু ‘ওনকোমিরস’ হায়না খঙনৈ।

প্রোফেসার কারুনাগারন্না মখা তানা হায়খি, কেন্সর সেলশিং শেমগৎলকপা অমসুং শন্দোরকপদা অথিংবা পীরিবা ত্যুমর-সপ্রেসিং এজেন্তশিংগী মথৌ পাংথোকহন্দনা থমদুনা ওনকোমিরশিংনা কেন্সর থোকহল্লি। ওনকোমরি খরনা ত্যুমর চাউখৎলকপা থিংবদা মতেং পাংই। মরম অদুনা কেন্সর সেলশিং নমশিনবা অমসুং থুগাইবদা শরুক য়ারিবা এম.আই.আর.এন.এ. মখলশিং মশক খঙদোকপা অসি য়াম্না মরুওই।

অকক্নবা প্রোতিন খরগী মথৌশিং হেনগৎহনবা নৎত্রগা হন্থহনবা তৌদুনা এম.আই.আর.এন.এ.না কেন্সর হেনগৎহনবদা অপনবা পী। খুদম ওইনা, মসিনা কেন্সর সেলশিং হেনগৎলকপা অমসুং শন্দোরকপা থিংবদা ‘প্রোগ্রাম সেল দেদ ৪’ কৌবা প্রোতিন মখল অমনা থবক পাংথোকপা উরে । মসিগী প্রোতিন অসিনা চিন-খৌনাউ, লং, ব্রিস্ত, লিভর, ব্রেন অমসুং কোলোন কেন্সরশিং থোকহল্লি হায়বা খঙলে।

‘এম.আই.আর.-১৫৫’ লৌথোকপনা কেন্সর সেলশিং শিহনবা ঙম্মি অমসুং এনিমেল মোদেলশিংদা ত্যুমর সাইজ হন্থহনবা ঙম্মি হায়বা উৎলি। রিছর্স স্কোলার সাবির জারগরনা হায়খি ‘এম.আই.আর.-১৫৫’না ‘প্রোগ্রাম সেল দেদ ৪’ হন্থহনবা ঙম্মি হায়বা অসি মতম কয়াগী মমাংদগী চিংনদুনা লাক্লি।

কাংবু অদু লুচিংলিবা প্রোফেসার কারুনাগরন্না হায়খি ‘এম.আই.আর.-১৫৫’ না লৈগী কেন্সর সেলশিং অমসুং লৈগী ত্যুমর তিসুশিং শেমগৎপদা মতেং পাংই। ‘এম.আই.আর.-১৫৫’গী থবকশিং অসিনা ‘প্রোগ্রাম সেল দেদ ৪’গী থবক থিন্থহন্দুনা লৈগী কেন্সর শন্দোকপা অমসুং হেনগৎলকপদা মতেং পাংই।

মখোয়না থিজিনবদগী ফংলকপা কয়া অসি মোলিকুলার এন্দ সেল্লুলার বাইওলোজী জর্নেলদা ফোংখি। কাংবু অদুদা সাবির জারগার, বিবেক তোমার, বিদ্যারানি স্যামসুন্দর, রামসানকার, কুমারাভেল সোমাসুন্দরম অমসুং প্রোফেসার কারুনাগারন য়াওরি।

*****