কেন্দ্রগী দিবেলপমেন্ত ওব নোর্থ ইস্তর্ন রিজন (দোনর), এম.ও.এস. পি.এম.ও., পার্সনেল, পব্লিক গ্রিভান্সেস, পেন্সন, এতোমিক ইনর্জী অমসুং স্পেসকী রাজ্য মন্ত্রী (ইন্দিপেন্দেন্ত চার্জ) দা. জিতেন্দ্র সিংহনা ঙসি জম্মু অমসুং কশ্মীর অমসুং লদাখ য়ুনিয়ন তেরিতোরীশিংগী সেন্ত্রেল এদমিনিস্ত্রেতিব ত্রিব্যুনেল (সি.এ.তি.) ভিদিও কনফরেন্সকী খুথাংদা হৌদোকখ্রে। হৌদোকপগী থৌরমদুদা ৱা ঙাংলদুনা দা. সিংহনা হায়খি মদুদি, সরকারগী কর্মচারীশিংগীদমক অখন্ননা থবক্কী মতাংদা নৈননবা জম্মুগী সি.এ.তি. বেঞ্চ অমা হাংদোকপা অসিনা কোর্তশিংদা লৈরিবা পোৎলুমশিং হন্থহনবদা নত্তনা মখোয়দা অতোপ্পা কেসশিং পায়নবগী মতম ফংহনলগনি, মসিদা নত্তনা এদমিনিস্ত্রেতিব ত্রিব্যুনেল অসিনা কোনশিল্লিবা মীওইশিংদা মখোয়গী ৱাকৎশিং অমসুং থবক্কা মরী লৈননবা রিলিফশিং পীরগনি। মহাক্না হায়খি, মোদী সরকার অসিনা মতম চুপ্পদা মনুং মপান ফাওনা উবা লৈঙাক অমা ওইহন্নবা অমসুং "জস্তিস ফোর ওল" হায়বা পান্দম অসি ফংনবা হোৎনরি অমসুং হৌখিবা চহী তরুক্লোম অসিদা মীয়ামগী য়াইফনবগীদমক লৌরকখিবা শেমদোক-শেমজিন কয়া অসিনা জম্মু অমসুং কশ্মীর অমসুং লদাখকী মীয়াম য়াওনা লৈবাক অসিগী মীয়াম পুম্নমক্তা কান্নবা কয়া ফংহনখ্রে। মহাক্না হায়, জম্মু অমসুং কশ্মীরদা চৎনবা য়ারমদবা সেন্ত্রেল লো ৮০০ লোম হেন্না আর্তিকল ৩৭০ অমসুং ৩৫ এবু ওগস্তকী তাং ৫, ২০১৯দা মুথৎখিবদগী চৎনবা য়াহন্দুনা জম্মু অমসুং কশ্মীর অমসুং লদাখকী মীয়ামদা ভারতকী অতৈ লমশিংগী মীয়াম পুম্নমক্কা মান্ননা চপ মান্নবা হক পীবীরে। কেস ৩০,০০০ রোম হেন্না লোইশিন্দনা লৈরিবা অসিসু মতম চানা অমসুং জুদিসিয়স ওইনা লোইশিনলগনি হায়না দা. জিতেন্দ্রনা থাজবা ফোংদোকখি।

দা. জিতেন্দ্র সিংহনা হায়খি, দি.ও.পি.তি.-সি.এ.তি., সি.আই.সি. অমসুং সি.ভি.সি.গী মরু ওইবা এজেন্সীশিংসু হৌজিক্তি জম্মু অমসুং কশ্মীর অমসুং লদাখকী য়ুনিয়ন তেরিতোরীশিংদা চৎনরে। মমাঙদা, ২৮.০৫.২০২০দা এদমিনিস্ত্রেতিব ত্রিব্যুনেল এক্ত, ১৯৮৫ (১৯৮৫কী ১৩)গী সেক্সন ৫কী সব সেক্সন (৭)না পীবা শক্তি শীজিন্নদুনা থোকখিবা চেরোল অমদা কেন্দ্র সরকারনা জম্মু অমসুং শ্রীনগরবু সেন্ত্রেল এদমিনিস্ত্রেতিব ত্রিব্যুনেলগী বেঞ্চনা জম্মু অমসুং কশ্মীর য়ুনিয়ন তেরিতোরী অমসুং লদাখ য়ুনিয়ন তেরিতোরীগীদমক ইচম চম্না ফম্নবা খংহনখিবনি। মসিগা মান্ননা, সেন্ত্রেল ইনফোর্মেসন কম্মিসন (সি.আই.সি.)না জম্মু অমসুং কশ্মীর অমসুং লদাখতগী এপ্লিকেন্তশিংনা থারকপা রাইৎ তু ইনফোর্মেসন (আর.তি.আই) এক্ত এপ্লিকেসনশিং তাং ১৫.০৫.২০২০দগী তাবা হৌখ্রবনি। দা. সিংহনা হায়খি, মে ৫, ২০২০দা ফোন তৌরকখিবা শ্রী সঞ্জয় কোথারিনা মন্ত্রীদা পাউদম্লমই মদুদি, সেন্ত্রেল ভিজিলেন্স কম্মিসন্না কোনশিল্লিবা জগা অসি প্রিভেন্সন ওব করপ্সন এক্তকী মখাদা জম্মু অমসুং কশ্মীরগী য়ুনিয়ন তেরিতোরী য়াওনা কোনশিল্লে।

সেন্ত্রেল এদমিনিস্ত্রেতিব ত্রিব্যুনেলগী চেয়রমেন ওইরিবা ইকাইখুম্ননিংঙাই ওইরবা জস্তিস এল. নরসিমহা রেদ্দীনা ময়াম্বু তরাম্না ওকপগী পাউদম থমখি। হৌদোকপগী থৌরম অদু জম্মু অমসুং কশ্মীর হায় কোর্তকী চীফ জস্তিস ওইরিবা ইকাই খুম্ননিংঙাই ওইরবা শ্রীমতী গিতা মিত্তল অমসুং জম্মু অমসুং কশ্মীর য়ুনিয়ন তেরিতোরীগী লেফতনেন্ত গবর্নর শ্রী গিরিশ চন্দ্র মুর্মুনসু ৱা ঙাংখি। জম্মুগী সেন্ত্রেল এদমিনিস্ত্রেতিব ত্রিব্যুনেলগী জুদিসিএল মেম্বর শ্রী রাকেশ সাগর জৈন্না থৌরম অদুদা থাগৎ ৱাহৈ ফোংদোকখি।

*****