কেন্দ্রগী মন্ত্রী দা. জিতেন্দ্রা সিংহনা জম্মু অমসুং কশ্মীর ম্যুনিসিপাল বোদীশিংগী মীহুৎশিংগা লোয়ননা কোবিদ ঙাকথোকনবা পাম্বৈশিংগী মরমদা খন্ননবা ভিদিও কনফরেন্সকী মীফম অমা পাংথোকখ্রে।

কোবিদকী লাইচৎকী মমাংগী তাঙ্কক অনি অসিদা মরু ওইনা হায়না খন্নখিবা অদুদি লৈবাক অসিগী তোঙান তোঙানবা শরুকশিংদা চৎথোক-চৎশিন য়াদনা লৈরিবা মীয়ামদা তঙাই ফদবা পোৎশিং ফংনবা শিনবনি অমসুং অকোনবা তাঙ্কক্তনা লৈবাক অসিগী তোঙান তোঙানবা শরুকশিংদা লৈরিবা মীয়ামবু ময়ুমদা হনবা য়াহন্নবা চৎথোক-চৎশিন তৌনবা শীনবা অসিনা মরুওইবা থৌদাং ওইরি হায়বা অসি মীফম অদু হৌদোকপদা দোক্তর জিতেন্দ্রা সিংহনা হায়খি। অদুম ওইনমক হৌজিক্কী তাঙ্কক অসিদা মীৎয়েং থম্লিবা সমস্যা অনিদি মমিং ওইনা পল্লবদা ঙাকথোকপা অমসুং এৱেরনেসনি, অমসুং মসিগী পান্দম অনি অসি ফংনবগীদমক লোকেল বোদীশিং অমসুং মখোয়গী মীহুৎশিং লোয়ননা সিভিল সোসাইতী অসিনা থৌদাং লৌবা মরু ওই।

পুং অনি চুপনা ফমখিবা মীফম অসিদা জম্মু ম্যুনিসিপাল কোর্পরেসনগী মেয়র চন্দ্রা মোহন গুপ্তা, জম্মু ম্যুনিসিপাল কোর্পরেসনগী দিপুতী মেয়র পুর্নিমা শর্মা, শ্রীনাগর ম্যুনিসিপাল কোর্পরেসনগী মেয়র জুনাদ এজিম মাত্তো অমসুং শ্রীনাগর ম্যুনিসিপাল কোর্পরেসনগী দিপুতী মেয়র পারভেজ ক্বাদ্রি য়াওনা ৱাখল্লোনশিং ফোংদোখি। অসিগী মথক্তা বিল্লাৱর, বাশোলি, হীরানগর, ভদের্ৱাহ, দোদা, ভিজেপুর, কুপৱারা, বারামুল্লা, অনন্তনাগ, চেনানি, পামগরহ, পরোলে, বাতোতে অমসুং অতোপ্পা ম্যুনিসিপাল বোদীশিংগী চিয়রমেনশিংসু ৱারী শাবা অসিদা শরুক য়াখি।

দোক্তর জিতেন্দ্রা সিংহনা ফোংদোকখি মদুদি হৌজিক্কী ওইনা মথৌ তারিবা অসি “ৱাখল ৱাগদবা নত্তে এৱেরনেসকী” মন্ত্র অসি লৌগদবনি। মসিদীদমক গ্রাসরুৎশিংগী লুচিংবা ওইরিবা ম্যুনিসিপাল বোদীশিংগী খনগৎলবা মীহুৎশিংনা মীয়ামবু পাখৎহন্দনা চেকশিন থৌরাংশিং অসি লৌখৎপগী মরু ওইবশিং অদু খঙহনবদা অচৌবা থৌদাং অমা লৌগদবনি।

দোক্তর জিতেন্দ্রা সিংহনা হায়, কোরোনা পোজিতিব কেসকী মশীং ৱাংখৎলবসু মসি পাক শান্না মশীং য়াম্না স্কীনিং তৌবা অমসুং সেম্পলশিংগী মশীং য়াম্না থারকপনা মরম ওইরিনি হায়বা অসি ঐখোয়না মীয়ামদা খঙহনবা মথৌ তারি। নৎলমদ্রবদি থোরক্লিবা পর্সন্তেজ অমসুং শিখিবগী চাং অসি অদুমক হৌখিবা চয়োল তরা অসিদা অহোংবা লৈরম্লোই হায়না মহাক্না হায়খি।

কোবিদকী লাইচৎকী হৌজিক লৈরিবা তাঙ্কক অসিদা ফ্যুমিগেসন, লুনান্না অমসুং হাইজিনিক ওইনা লৈহনবা, সোসিএল দিস্তেন্সিং অসিনচিংবা ম্যুনিসিপালগী থবক থৌরমশিং অসিনা য়াম্না মরু ওই হায়না দোক্তর জিতেন্দ্রা সিংহনা হায়খি অমসুং অহেনবা ওইনা দিস্ত্রিক এদমিনিস্ত্রেসনদা ম্যুনিসিপাল বোদীশিং পোরম য়াৎপা অমসুং থবক পাংথোক্নবা শেম শাদুনা লৈহনগদবনি হায়খি।

নুমিৎ খুদিংগী ওইনা ম্যুনিসিপাল বোদীশিংগী মকোকশিংগা চাং নাইনা পাও ফাওননবা দোক্তর জিতেন্দ্রা সিংহনা শিনবিবা অদুবু মখোয়না থাগৎপা ফোংদোকখ্রে। লোকেল বোদীশিংগী ওইবা ফন্দশিং থাদোরকপা থেংবগী মতাংদসু মখোয়না মন্ত্রীগী পুক্নিং চীংশিনখি।

কোরোনাগী অৱাবা অসিগী মনুংদা ম্যুনিসিপাল বোদীশিং অমসুং সিভিল সোসাইতীনা লৌখিবা থৌদাং অদুবু দোক্তর জিতেন্দ্রা সিংহনা থাগৎখি অমসুং মহাক মশা য়াওনা মখোয়গা হেন্না চুশিন্ননবা তৌগনি হায়না থাজবা পীখি।

******