প্রধানমন্ত্রীগী লোইশঙ
প্রধান মন্ত্রী অমসুং মোজাম্বিক্কী রাস্ত্রপতি হিজ এক্সিলেন্সী ফিলিপ জাসিন্তো য়ুসিগী মরক্তা তেলিফোন্দা ৱারী শানখ্রে
Posted On:
03 JUN 2020 7:32PM by PIB Imphal
ঙসি প্রধান মন্ত্রীনা মোজাম্বিক্কী রাস্ত্রপতি হিজ এক্সিলেন্সী ফিলিপ জাসিন্তো য়ুসিগা তেলিফোন্দা ৱারী শানখ্রে।
লুচিংবা অনিনা লৈবাক অনিমক্তা থেংনরিবা কোবিদ-১৯ লাইচৎকী মতাংদা খন্নখি। তঙাইফদবা হিদাক-লাংথকশিং অমসুং পোৎ-চৈশিং পীদুনা হকশেলগী খুদোংথিবা তারবা মতম অসিদা ভারতনা মোজাম্বিক্তা মতেং পাংনিংবা অদু প্রধান মন্ত্রীনা ফোংদোকখি। অনা-লায়েং অমসুং হিদাক-লাংথকশিংগী লমদা লৈবাক অনিগী মরক্তা মতেং পীনবা অসিদা রাস্ত্রপতি য়ুসিনা থাগৎপা ফোংদোকখি।
মোজাম্বিক্তা ভারতনা শেন থাদরিবা অমসুং পায়খৎলিবা চাউখৎ-থৌরাংগী প্রোজেকশিংগী হিরমশিং য়াওনা মরুওইবা ৱাফমশিং লুচিংবা অনিনা খন্নখি। ভারতনা অফ্রিকাগা মরুপ-মপাং ওইবা অসিদা মোজাম্বিক য়াম্না মরুওইবা য়ুম্বী অমনি হায়না প্রধান মন্ত্রীনা থমখি অমসুং মোজাম্বিক্কী কয়লা অমসুং নেচরেল গ্যাস সেক্তরদা ভারতকী কম্পেনিশিংনা পায়খৎলিবা থবকশিং পনখি।
ঙাকশেনগী লমদা লৈবাক অনিগী মরক্তা মতেং পাংনবা হেনগৎলকপদা লুচিংবা অনিনা অপেনবা ফোংদোকখি। অৱাংথংবা মোজাম্বিক্তা তেরোরিজমগী থৌদোকশিং থোকলকপদা রাস্ত্রপতি য়ুসিনা লাংতক্নরিবা অদু প্রধান মন্ত্রীনা শরুক য়াখি অমসুং মোজাম্বিক্কী পুলিস অমসুং সেক্যুরিতী ফোর্সশিং ত্রেনিং পীবা য়াওনা পীবা য়াবা মতেং পীগনি হায়খি।
মোজাম্বিক্তা লৈবা ভারতমচাশিং অমসুং ভারত্তগী হৌখিবা মীওইশিং অশোই-অঙাম থোক্তনবা মোজাম্বিক ওথোরিতিশিংনা পায়খৎলিবা থবকশিংদা প্রধান মন্ত্রীনা থাগৎপা ফোংদোকখি।
হৌজিক মায়োক্নরিবা লাইচৎ মনুংদা মখা তানা মতেং পীননবা লৈবাক অনিগী ওফিসিয়েলশিং পাউ ফাওনবা হায়না লুচিংবা অনিনা য়ানখি।
*****
(Release ID: 1629227)
Visitor Counter : 182
Read this release in:
English
,
Urdu
,
Marathi
,
Hindi
,
Bengali
,
Assamese
,
Punjabi
,
Gujarati
,
Odia
,
Tamil
,
Telugu
,
Kannada
,
Malayalam